ދައުލަތުގެ މެދު ރާސްތާގެ ފިސްކަލް އަދި ދަރަނީގެ ސިޔާސަތުތައް ސިއްރުކުރަން އުޅުމަކީ ޒިންމާދާރުކަން ކުޑަ، ނުރައްކާތެރި ކަމެއް ކަމަށް ކުރީގެ ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެއެވެ.

އަމީރު އެފަދައިން ވިދާޅުވީ އޭނާ އެކްސްގައި ކުރެއްވި ޕޯސްޓެއްގައެވެ.

އޭނާ ވިދާޅުވީ އެއީ އެއްވެސް ގޮތަކަށް ބަލައިގަނެވޭނެ ކަމެއް ނޫން ކަމަށާއި އެއީ ފަހަތަށް އެޅޭ ފިޔަވަޅެއް ކަމަށެވެ. 2019 ވަނައަހަރުން ފެށިގެން، އޭރު އޮތް އެމްޑީޕީ ސަރުކާރުން އައީ ދައުލަތުގެ ފިސްކަލް އަދި ދަރަނީގެ ސްޓްރެޓެޖީ ވަކި ވަކިން ބަރާބަރަށް ޝާއިއުކުރަމުން ކަމަށް އަމީރު ވިދާޅުވިއެވެ. މާލީ ކަންކަން ހިނގަމުންދާ ގޮތާއިމެދު އެތެރެއާއި ބޭރުގެ ފަރާތްތަކުގެ އިތުބާރު ކޮންމެހެންވެސް ހިފަހައްޓަންޖެހޭ ދަނޑިވަޅެއްގައި މިކަން މިގޮތަށް ނުކުރުމަށް މަޖިލީހަށް އަމީރު ވަނީ ގޮވާލައްވާފައެވެ.

މީގެ އިތުރުން މާލީ އަދި އިޤްތިސާދީ ކަންތައްތައް މެނޭޖްކުރުމުގައި ސަރުކާރުގެ ޤާބިލްކަމާއި މެދު އިތުބާރު ގެއްލިފައިވާ މި ދަނޑިވަޅުގައި، ސަރުކާރުގެ ސިޔާސަތުތައް އެންމެންނަށް ފެންނަހެން ހާމަ ކުރުން ވަރަށް މުހިއްމު ކަމަށް އަމީރު ވިދާޅުވިއެވެ. މި 2 ބަޔާނުގެ މަގުސަދަކީ ދައުލަތުގެ ހަރަދާއި އާމްދަނީގެ ސިޔާސަތާ މެދު އާންމުން ހޭލުންތެރިކަން އިތުރުކުރުމާއި އެ ސިޔާސަތުގެ އަމާޒުތައް ހާސިލުކުރުމަށް ސަރުކާރުން އަޅަމުންދާ ފިޔަވަޅުތައް ވަޒަންކުރެވޭނެ ވަސީލަތެއް ގާއިމް ކުރުން ކަމަށް ވީހިނދު، މި ބަޔާން ސިއްރުކުރުމަކީ ޤާނޫނުގެ ރޫހާއި ޚިލާފް ކަމެއް ކަމަށް އަމީރު ވިދާޅުވިއެވެ.

ހަމައެހެންމެ ކުރިން އާއްމުކޮށް ކޮންމެ ހަފްތާއަކު ޝާއިއުކުރަމުން އައި "ވީކްލީ ފިސްކަލް ޑިވެލޮޕްމެންޓްސް" ޝާއިއުކުރުންވެސް މިހާރު ވަނީ މެދުކެނޑިފަ ކަމަށް އާމިރު ވިދާޅުވިއެވެ. އަދި މިއަދު ސަރުކާރުގަ އިސް މަޤާމްތަކުގަ ތިބީ، 2019-2023 ސަރުކާރު ބަންދެއް އައިސްގެންވެސް ދެންނެވި ރިޕޯޓެއް ޝާއިއުކުރުން ލަސްވިޔަސް އެ ކަންތައް ވަރަށް ބޮޑުކޮށްގެން ވާހަކަ ދެއްކި ބޭބޭފުޅުން ކަމަށް އަމީރު ވިދާޅުވިއެވެ. އެހެންކަމުން ޤާނޫނުގައި އެ ބުނާ ލަނޑުދަނޑި ހާސިލްކޮށް، އިތުބާރު ހޯދުމަށް މި 2 ބަޔާން ޝާއިއުކުރުމަށް އަމީރު ގޮވާލެއްވިއެވެ.