އިރާގުގައި ހުންނަ އެމެރިކާގެ ބޭސް އަކަށް ހޯމަ ދުވަހު ދިން ރޮކެޓް ހަމަލާ އެއްގައި އެމެރިކާގެ ސިފައިންތަކެއް ޒަޚަމްވެއްޖެއެވެ.
އިރާގުގެ ހުޅަނގުގައި ހުންނަ އައިން އަލް-އަސަދު އެއަރ ބޭސް އަށް ދިން ހަމަލާ އާ ބެހޭ ގޮތުން އެމެރިކާގެ ޑިފެންސް އޮފިޝަލަކު އަލް-އަރަބިއްޔާ އަށް މައުލޫމާތު ދެމުން ބުނެފައިވަނީ އެތައް ސިފައިންނެއް ޒަޚަމް ވި ކަމަށާއި ހަމަލާގެ ގެއްލުމުގެ އެސެސްމެންޓެއް ހެދުމުގެ މަސައްކަތް ކުރިއަށް ދާ ކަމުގައެވެ.
އެމެރިކާގެ އޮފިޝަލަކާ ހަވާލާ ދީ ރޮއިޓާސް އިން ބުނެފައިވަނީ 5 މީހުން މި ހަމަލާގައި ޒަޚަމްވެފައިވާ ކަމަށެވެ. އެކަކަށް ސީރިއަސް ޒަޚަމްތަކެއް ލިބިފައިވާ ކަމަށްވެސް ބުނެފައިވެއެވެ.
އިރާގުގެ އޮފިޝަލަކު ހާމަ ކޮށްފައިވާ ގޮތުގައި ދެ ކަޓްޔޫޝާ މިސައިލް ބޭސް އާ ދިމާލަށް ފޮނުވާލި ކަމަށާއި ދެ މިސައިލް ވެސް ވެއްޓުނީ ބޭސް ގެ ތެރެއަށް ކަމަށެވެ.
މި ހަމަލާ އަކީ އީރާން އާއި ހިޒްބު ﷲ އަށް އިޒްރޭލުން ދާދި ފަހުން ދިން ހަމަލާއާ ގުޅިގެން މިހާރު މެދުއިރުމަތީގައި އުފެދިފައިވާ ނުތަނަވަސް ކަމާ ގުޅޭ ހަމަލާ އެއް ކަމެއް ޚަބަރުތަކުން އަދި ސާފެއް ނުވެއެވެ.
އީރާނުގައި ހުންނަވަނިކޮށް ހަމާސްގެ ލީޑަރު އަވަހާރަ ކޮށްލުމުގެ ޒިންމާ އެމެރިކާއިން ނަގަން ޖެހޭނެ ކަމަށް މިދިޔަ ބުދަ ދުވަހު އީރާނުން ވަނީ ބުނެފައެވެ. އެއީ އިޒްރޭލުން ދިން ހަމަލާ އެއް ކަމަށާއި އިޒްރޭލުން ހަމަލާ ދިނީ އެމެރިކާގެ ރުހުމާ އެކުގައި ކަމަށް އީރާނުން ބުނެފައިވެއެވެ.
ހުސްވި ހަފްތާގައި އެމެރިކާ އިން ވަނީ އިރާގުގެ ބައެއް ފަރާތްތަކަށް އަމާޒު ކޮށް ހަމާލާތަކެއް ދީފައެވެ. އޭގެ ސަބަބެއް ކަމަށް އެމެރިކާ އިން ބުނެފައިވަނީ އެމެރިކާގެ އޮފިޝަލުންނަށް ނުރައްކާ ކުރަން ރާވަމުން ދިޔަ ހަނގުރާމަވެރިން ކަމަށް ވާތީ ކަމަށެވެ.
އިރާގުގައި މިހާރުވެސް އެމެރިކާގެ 2500 އެމެރިކާ ސިފައިން ގާއިމްވެ އެބަތިއްބެވެ. އިރާގުން ބޭނުން ވަނީ އިރާގުގައި ތިބި އެމެރިކާ އާއި އެމެރިކާގެ ކޯލިޝަން ސިފައިން އިރާގުން ފައިބާ 2025 ގެ ސެޕްޓެމްބަރު މަހުގެ ނިޔަލަށް އިރާގުގައި ހިންގާ ކޯލިޝަންގެ ހަރަކާތްތައް ނިމުމަކަށް އަންނާށެވެ.
