ކަރަންޓު ބޭނުންނުކުރާ މިންވަރަށް ބިލް ހަދާކަމަށް ތުހުމަތު ކުރަނީ ބިލް ހަދާ މެކޭނިޒަމް ނޭނގޭތީ ކަމަށް ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން ބުނެފިއެވެ.
ހޮނިހިރު ދުވަހު ހެނދުނު ސްޓެލްކޯއިން ވަނީ ނޫސްވެރިންގެ ބައްދަލުވުމެއް ބާއްވާފައެވެ.
މި ނޫސްވެރިންގެ ބައްދަލުވުމުގައި އެކުންފުނީގެ ޖެނަރަލް މެނޭޖަރު އިބްރާހިމް ނާޝިދު ވިދާޅުވީ ކަރަންޓު ބިލު ހަދާނީ ބޭނުންކުރާ މިންވަރަށް ކަމަށާއި، ބިލު ބޮޑު ކުރުމަށް ސްޓެލްކޯއިން ވަކި ގޮތްތަކެއް ނުހަދާނެ ކަމަށެވެ. ކަރަންޓު ބިލު ބޮޑު ކުރުމަށް ސްޓެލްކޯއިން ސިސްޓަމްއަށް ބަދަލުތައް ގެންނަ ކަމަށް ކުރެވޭ ތުހުމަތުތަކަށް އިޝާރާތް ކުރައްވައި ނާޝިދު ވިދާޅުވީ އެހެން ޝައްކު ކުރެވެނީ ބިލް ހަދާ މެކޭނިޒަމް ނޭނގޭތީ ކަމަށާއި، ސިސްޓަމް ހެދިފައި ހުންނަނީ މަކަރު ހެދޭ ގޮތަށް ނޫން ކަމަށެވެ. އަދި ވިދާޅުވީ ސްޓެލްކޯއިން އެއްވެސް އޮޅުވާލައި މަކަރު ނުހަދާނެ ކަމަށާއި، ކަރަންޓު ބިލުތައް ބޮޑު ކުރުމަކީ ސްޓެލްކޯގެ އަމާޒެއް ނޫން ކަމަށެވެ.
މީގެ އިތުރުން ނާޝިދު ވިދާޅުވީ ގޭބިސީތަކުން ރީޑިން ނަގަމުންދަނީ މެނުއަލްކޮށް ކަމަށާއި، ބައެއް މަސްތަކުގައި 29 ދުވަސް އަނެއް ބައި މަސްތަކުގައި 31 ދުވަސް އަދި 30 ދުވަހަށް ވެސް ރީޑިން ނަގާ ކަމަށެވެ. އެހެންކަމުން ބިލު ކުރުމުގައި ބައެއް ތަފާތުތައް އައިސްދާނެ ކަމަށް އޭނާ ވިދާޅުވިއެވެ.
ޔޫއާރްއޭއިން ޓެރިފް ސްޓްރަކްޗަރ ޕާސްކޮށްފައި މިއޮންނަނީ ބޭންޑްގައި މިއޮންނަނީ 30 ދުވަހަށް 100 އޭ. ދެން ވާ ގޮތަކީ އަޅުގަނޑުމެން މެނުއުއަލީ ގޭގެއަށް ގޮސް ރީޑިން ނަގާތީ ބަރާބަރު 30 ވަނަ ދުވަހު ރީޑިން ނުނެގިދާނެ. ބައެއް ފަހަރު 29 ވަނަ ދުވަހު ހިނގާދާނެ. ބައެއްފަހަރު 31 ވަނަ ދުވަހު ރީޑިން ނަގާފާވާނެ. އެހެންވީމަ ބޭންޑަކުން އެމީހަކަށް ޖެހޭ ނިސްބަތް ތަފާތުތަކެއް އުޅޭނެ.ސްޓެލްކޯގެ ޖެނަރަލް މެނޭޖަރު އިބްރާހިމް ނާޝިދު
ސްޓެލްކޯއިން ބުނީ ޒަމާނުއްސުރެ ވަކި ދުވަސްވަރެއްގައި ބިލްތައް ބޮޑުވެގެން ޝަކުވާ އަންނަ ކަމަށާއި، މިއަހަރު ޝަކުވާ އައުން ދިގު ދެމިގެން ގޮސްފައިވާ ކަމަށެވެ. އެހެންކަމުން މިމައްސަލަ ހައްލު ކުރުމަށް މަސައްކަތް ފަށާފައިވާ ކަމަށާއި، ގަބޫލުނުކުރެވޭ މިންވަރަށް ކަރަންޓު ބިލު ބޮޑުވެފައިވާ ނަމަ އެ މައްސަލަ ހުށަހެޅުމަށް ސްޓެލްކޯއިން ވަނީ އެދިފައެވެ.
