މާލެސިޓީގެ %21 ގޭބިސީތަކުގެ ކަރަންޓް ބިލު ގަބޫލު ނުކުރެވޭ މިންވަރަށް ބޮޑު، ހަކަތައިގެ އޮޑިޓެއް ހަދަނީ

މާލެސިޓީގެ 21 ޕަސެންޓު ގޭބިސީތަކުގެ ކަރަންޓް ބިލު ގަބޫލުނުކުރެވޭ ވަރަށް ބޮޑުވެފައިވާ ކަމަށާއި، ހަކަތާގެ އޮޑިޓެއް ހަދަން ނިންމާފައިވާ ކަމަށް ސްޓެލްކޯގެ މެނޭޖިން ޑިރެކްޓަރު ހުސައިން ފަހުމީ ވިދާޅުވެއްޖެއެވެ.

ހޮނިހިރު ދުވަހު ސްޓެލްކޯގެ ހެޑް އޮފީހުގައި ބޭއްވި ނޫސްވެރިންގެ ބައްދަލުވުމުގައި ފަހުމީ ވިދާޅުވީ މިދިޔަ މަހަށްވުރެ މިމަހުގެ ކަރަންޓު ބިލުތަކުގެ 94 ޕަސެންޓު ކުޑަ ވެފައިވާ ކަމަށެވެ. ނަމަވެސް މާލޭގެ 6 ޕަސެންޓް ގޭބިސީ، ހުޅުމާލޭގެ 15 ޕަސެންޓް ގޭބިސީތަކުގެ ކަރަންޓު ބިލު ގަބޫލު ނުކުރެވޭ މިންވަރަށް ބޮޑުވެފައިވާ ކަމަށާއި، އެ ވަރަށް ބިލު ބޮޑުވެފައިވާތީ އެކްސްޕްލެނޭޝަނެއް ބޭނުންވާ ކަމަށް ފަހުމީ ވިދާޅުވިއެވެ.

އެހެންކަމުން ސްޓެލްކޯގެ މުވައްޒަފުން މި ގެތަކަށް ޒިޔާރަތް ކުރާނެ ކަމަށާއި، އެހެން ދިމާވި ސަބަބު ސްޓެލްކޯއިން ޓެކްނިކަލްކޮށް ބަލާނެ ކަމަށް ފަހުމީ ވިދާޅުވިއެވެ. އަދި ވިދާޅުވީ ސްޓެލްކޯގެ ޓީމުތައް ފޮނުވާނެ ތަންތަން ކަނޑައަޅާނީ ތަފާސްހިސާބުތަކަށް ބަލައިގެން ކަމަށާއި، އެނާޖީ އޮޑިޓެއް ހަދާނެ ކަމަށެވެ.

ފަހުމީ ވިދާޅުވީ ސްޓެލްކޯގެ ޓީމުގެތަކުން ގޭތަކަށް ގޮސް ކުރާ މަސައްކަތުން ކަރަންޓު ބިލު ބޮޑުވަނީ ކޮން ކަންތައްތަކަކުންތޯ ބަަލައި ގިނަ މައުލޫމާތުތައް ގޭގައި އުޅޭ މީހުންނަށް ވެސް ލިބޭނެ ކަމަށާއި، ފިޔަވަޅު އަޅަން ވެސް ފަސޭހަވާނެ ކަމަށެވެ. އަދި ކަރަންޓު އިގުތިސާދު ކުރަން ކަސްޓަމަރުންނަށް ވެސް ފަސޭހަވާނެ ކަމަށް ފަހުމީ ވިދާޅުވިއެވެ.