ޙަމާސްގެ ޖަމާޢަތުގެ ވެރިޔާ ޙަނިއްޔާގެ މައްޗަށް ރާއްޖޭގެ ހުރިހާ މިސްކިތެއްގައި ޣައިބަށް ކަށުނަމާދު ކޮށްފި ކަމަށް ބުނެ ދައުލަތުގެ މީޑިއާ އިން ދޮގު ހަދައިފި

ޙަމާސްގެ ޖަމާޢަތުގެ ވެރިޔާ ޙަނިއްޔާގެ މައްޗަށް ރާއްޖޭގެ ހުރިހާ މިސްކިތެއްގައި ޣައިބަށް ކަށުނަމާދުކޮށްފި ކަމަށް ބުނެ ދައުލަތުގެ މީޑިއާ އިން ދޮގު ހަދާ އެ ދޮގު ޚަބަރު ފަތުރައިފިއެވެ.

ދައުލަތުގެ މީޑިއާ ޕީއެސްއެމްނިއުސް ގައި ހުކުރު ދުވަހު މެންދުރުފަހު "ޙަމާސްގެ ޖަމާޢަތުގެ ވެރިޔާ ޙަނިއްޔާގެ މައްޗަށް ރާއްޖޭގައި ޣައިބަށް ކަށުނަމާދުކޮށްފި" މި ސުރުޚީގެ ދަށުން ލިޔެފައިވާ ޚަބަރުގައި " ޙަނިއްޔާގެ މައްޗަށް ދިވެހިރާއްޖޭގެ ހުރިހާ މިސްކިތެއްގައި މިއަދުގެ ހުކުރު ނަމާދަށްފަހު ވަނީ ޣައިބަށް ކަށުނަމާދު ކޮށްފައި،" ކަމަށް ބުނެފައިވެއެވެ.

އެހެން ނަމަވެސް ރާއްޖޭގެ ވަރަށް މަދު މިސްކިތެއްގައި ނޫނީ ހުކުރު ނަމާދަށް ފަހު ހަނިއްޔާގެ މައްޗަށް ކަށު ނަމާދު ނުކުރާކަން އަދި ކަށު ނަމާދު ކުރުމަށް ސަރުކާރުން އަންގާފައި ނުވާކަން ވަނީ ކަށަވަރު ކުރެވިފައެވެ.

ދައުލަތުގެ މީޑިއާ އިން މި ދޮގު ޚަބަރު ފެތުރިއިރު ސަޙްޔޫނީންގެ އަނިޔާވެރި ހަމަލާއަކުން ޝަހީދު ކޮށްލާފައިވާ ހަމާސްގެ ސިޔާސީ ގޮފީގެ އިސްވެރިޔާ އަދި ފަލަސްތީނުގެ ކުރީގެ ބޮޑު ވަޒީރު އިސްމާއީލް ހަނިއްޔާ ގެ މައްޗަށް ހުކުރު ނަމާދަށް ފަހު ރާއްޖޭގައި ހުކުރު ކުރާ އެންމެހާ މިސްކިތްތަކެއްގައި ޣައިބަށް ކަށު ނަމާދު ކުރެވޭނެ އިންތިޒާމް ހަމަ ޖައްސައި ދިނުމަށް އަދާލަތު ޕާޓީން ސަރުކާރަށް ވަނީ ގޮވާލައިފިއެވެ.

އަދާލަތު ޕާޓީގެ އިލްމްވެރިންގެ މަޖިލީހުގެ ނައިބު ރައީސް ޑރ. މުހައްމަދު އިޔާޟް އަބްދުއްލަތީފް ސޮއިކުރައްވާ އިސްލާމިކް މިނިސްޓަރ ޑރ. މުހައްމަދު ޝަހީމް އަލީ ސައީދަށް މި ކަމަށް އެދި ފޮނުވާފައިވާ ސިޓީ ގައި ޝަހީދު އިސްމާއީލް ހަނިއްޔާ އަކީ މަސްޖިދުލް އަގްސާ މިނިވަން ކުރުމަށް ކުރެވޭ މަތިވެރި ޖިހާދުގައި ގިނަ ގުރުބާނީ ތަކެއް ވެވަޑައިގެންފައިވާ ބަތަލެއް ކަން ފާހަގަ ކޮށްފައިވެއެވެ.

"އިސްލާމީ އުންމަތައްޓަކައި މިފަދަ ބޮޑެތި ގުރުބާނީ ތައް ވެވަޑައިގެންފައިވާ އަބްތާލުންގެ އަގު ވަޒަން ކުރުމަކީ އުންމަތުގެ ކޮންމެ ފަރުދެއްވެސް ކުރަން ޖެހޭ ކަމެއް ކަމުގައި ދެކެމެވެ،" އަދާލަތުގެ ސިޓީގައި ވެއެވެ.

އަދާލަތު ޕާޓީގެ އިލްމްވެރިންގެ މަޖިލީހުން އިސްލާމިކް މިނިސްޓްރީ އަށް 31 ޖުލައި 2024 ގައި ފޮނުވި ސިޓީގައި ޝަހީދު އަލްގާއިދު އިސްމާއީލް ހަނިއްޔާގެ މައްޗަށް ޣައިބަށް ކަށު ނަމާދު ކޮށް ދިނުމަކީ އެމަނިކުފާނާއި ފަލަސްތީނުގެ ރައްޔިތުންނާއި އަދި އިސްލާމީ އުއްމަތުގެ ހައްގުގައި ކުރަން ޖެހޭ ކަމެއް ކަމުގައި ބުނެފައިވެއެވެ.

އަދާލަތު ޕާޓީގެ މި ސިޓީއަށް އިސްލާމިކް މިނިސްޓްރީން ޖަވާބެއް ދީފައި ނުވާ ކަމަށް އެ ޕާޓީގެ އޮފިޝަލަކު މި ނޫހަށް މައުލޫމާތު ދެމުން ބުނެފައިވެއެވެ.

ހުކުރު ދުވަހު އިސްލާމީ މަރުކަޒު ގައި ހުކުރު ނަމާދަށް ފަހު މި ދިޔަ ހަފްތާގައި ރާއްޖޭން ބޭރުގައި ނިޔާވި، ރައީސް އޮފީހުގެ ކުރީގެ ޗީފް ޓެކްނިކަލް އޮފިސަރ ހާމިދު ޝަފީއުގެ މައްޗަށް ޣައިބަށް ކަށުނަމާދު ކުރުން އޮތެވެ.

ހަނިއްޔާ އަވަހާރަ ކޮށްލީ އީރާނުގެ އައު ރައީސް މަސްއޫދު ޕެޒެޝްކިއާން ހުވައި ކުރުއްވުމުގެ ރަސްމިއްޔާތައް ތެހެރާން އަށް ވަޑައިގެން ދަތުރުފުޅުގައި އޭނާ ހުންނެވި ގެސްޓް ހައުސްގައި އަންގާރަ ދުވަހުގެ ރޭ ބޮމެއް ގޮއްވާލައިގެންނެވެ.

ސަރުކާރުން އިންތިޒާމް ކޮށްގެން ހަނިއްޔާގެ މައްޗަށް ދިވެހިރާއްޖޭގެ ހުރިހާ މިސްކިތެއްގައި މިއަދުގެ ހުކުރު ނަމާދަށްފަހު ޣައިބަށް ކަށުނަމާދު ކޮށްފައިނުވި ނަމަވެސް، ވަކި ވަކި ބައެއް މިސްކިތްތަކުގައި ކަށުނަމާދު ކޮށްފައިވާ ކަމަށް ބައެއް އާއްމުން ބުނެފައިވެއެވެ.