އިޒްރޭލުން ރަތް ރޮނގު ހުރަސްކޮށްފި، ބަދަލު ހިފަން މަޖުބޫރުވެއްޖެ: ހިޒްބުﷲ ގެ ވެރިޔާ
ނަސްރުﷲ ދެއްވި ބަޔާނެއްގައި ވިދާޅުވީ، ދުޝްމަނާއި ދުޝްމަނުގެ ފަހަތުގައި ވާ ފަރާތްތަކުން ރައްދުގެ އިންތިޒާރުގައި ތިބުމަށެވެ.
ލުބުނާނުގެ ދެކުނުގެ ޓަޔާގެ ކެފޭއެއްގައި ލުބުނާނުގެ ހިޒްބުالله ލީޑަރު ހަސަން ނަސްރުالله ތަގުރީރު ކުރައްވާ މަންޒަރު ފެންނަ ބްރޯޑްކާސްޓެއް ރައްޔިތުން ބަލަނީ
ހިޒްބުﷲ ގެ އިސް އަސްކަރީ ކޮމާންޑަރަކާއި ހަމާސް ގެ ލީޑަރ ޝަހީދު ކޮށްލުމުން އިޒްރޭލުން ވަނީ ރަތް ރޮނގު ހުރަސްކޮށްފައި ކަމަށާއި، އެހެން ކަމުން އެކަމުގެ ބަދަލު ހިފުމަށް އިޒްރޭލަށް ހަމަލާ ދިނުމަށް އެ ޖަމާއަތައް މަޖުބޫރު ވެއްޖެ ކަމަށް ހިޒްބުﷲ ގެ އިސް ލީޑަރ ހަސަން ނަސްރުﷲ ބުރާސްފަތި ދުވަހު ވިދާޅުވެއްޖެއެވެ.
އިޒްރޭލުން ހަމަލާދީ ޝަހީދު ކޮށްލި ހިޒްބުﷲ ގެ އިސް ކޮމާންޑަރ ފުއާދް ޝުކޫރު ގެ ޖަނާޒާ ވަގުތުން ޓީވީން ދައްކަމުން ދިޔައިރު ނަސްރުﷲ ދެއްވި ބަޔާނެއްގައި ވިދާޅުވީ، ދުޝްމަނާއި ދުޝްމަނުގެ ފަހަތުގައި ވާ ފަރާތްތަކުން ރައްދުގެ އިންތިޒާރުގައި ތިބުމަށެވެ.
ހަނިއްޔާ އަވަހާރާކޮށްލި ހަމަލާ އާ ބެހޭ ގޮތުން އިޒްރޭލުން ސީދާ އެއްޗެއް މިހާތަނަށް ބުނެފައި ނެތަސް، ޝުކޫރު އަށް ދިން ހަމަލާ އާ ބެހޭ ގޮތުން އިޒްރޭލުން ނެރުނު ބަޔާނުގައި އޭނާ މަރާލާފައިވާ ކަމަށާއި، އޭނާ އަކީ ހިޒްބުﷲ ގެ އެންމެ އިސް އަސްކަރީ ކޮމާންޑަރު ކަމާށާއި އަދި ޝުކޫރަކީ ނަސްރުﷲ ގެ ކަނާތުގެ ގޮތުގައި ހުންނަ މީހާ ކަމުގައި ބުނެފައިވެއެވެ.
