އީރާނުގެ މެހުމާނެއްގެ ގޮތުގައި ހުންނަވަނިކޮށް އިސްމާއީލް ހަނިއްޔާ އަވަހާރަ ކޮށްލުމުގެ ބަދަލު ހިފުމަކީ އީރާނުގެ މައްޗަށް އޮތް ވާޖިބެއް ކަމަށާއި، އެކަމުގައި އިޒްރޭލަށް ހަރުކަށި އަދަބު ދޭނެ ކަމަށް އީރާނުގެ ރޫހާނީ ލީޑަރު އާޔަތުﷲ ސައްޔިދު އަލީ ޚާމަނާއީ ވިދާޅުވެއްޖެއެވެ.

އަލީ ޚާމަނާއީ މިހެން ވިދާޅުވީ، ހަނިއްޔާ އަވަހާރަ ކޮށްލި ޚަބަރު ފެތުރުނުތާ މާ ގިނަ އިރެއް ނުވެ ބުދަ ދުވަހު އެކަމާ ގުޅިގެން ނެރުއްވި ބަޔާނެއްގައެވެ.

ހަނިއްޔާ އަށް އިޒްރޭލުން ހަމަލާދީ އަވަހާރަ ކޮށްލީ އީރާނުގެ އައު ރައީސް މަގާމުގެ ހުވައި ކުރެއްވުމުގެ ރަސްމިއްޔާތުގައި ބައިވެރިވެ ވަޑައިގަތުމަށް އީރާނުގެ ވެރިރަށް ތެހެރާން ގައި ހުންނަވަނި ކޮށް ބުދަ ދުވަހުގެ ފަތިހުގެ ވަގުތެއްގައެވެ.

އީރާނުގެ ރޫހާނީ ލީޑަރު އަލީ ޚާމަނާއީ ނެރުއްވި ބަޔާނުގައި، މުޖުރިމު، ނިރުބަވެރި ޔަހޫދީ ދައުލަތުން ހަނިއްޔާ ޝަހީދު ކޮށްލީ އީރާނުގެ ލޮބުވެތި މެހްމާނެއްގެ ގޮތުގައި، އީރާނުގެ ހިޔާވަހި ކަމުގައި ހުންނަވަނިކޮށް ކަމަށް ވުމީ ފުން ހިތާމައެއް ލިބިވަޑައިގެންނެވި ކަމެއް ކަމަށާއި، އެއާ އެކުއެކީ އަނިޔާވެރިންނަށް ހަރުކަށި އަދަބު ދިނުމަށް އީރާނުން ތައްޔާރަށް އޮތް ކަމަށް ވެސް ވިދާޅުވެފައިވެއެވެ.

އަލީ ޚާމަނާއީ ވަނީ ހަނިއްޔާގެ ފަލަސްތީނުގެ މިނިވަންކަމާއި ފަލަސްތީނު ރައްޔިތުންގެ ހައްގުގައި ހަނިއްޔާ ދިގު މުއްދަތަކަށް ކުރެއްވި ޚިދުމަތަށް ތައުރީފް ކުރައްވާފައެވެ. އަލީ ޚާމަނާއީ ވިދާޅުވީ، ހަނިއްޔާ ހުންނެވީ ޝަހީދު ވުމަށް ތައްޔާރަށް ކަމަށާއި، އޭނާގެ ކުދިންނާއި މުޅި އާއިލާވެސް އެ މަގުން ގުރުބާން ވެގެން ދިޔަ ކަމަށެވެ.

އީރާނުގެ އޮފިޝަލުން ގެންދަނީ މި ހާދިސާ ހިނގި ގޮތުގެ ވަރުގަދަ ތަހުގީގެއް ހިންގަމުންނެވެ.

އީރާނުން ވަނީ ގައުމީ ހިތާމައިގެ ތިން ދުވަހުގެ ގޮތުގައި ކުރިއަށް އޮތް ތިން ދުވަސް ފާހަގަ ކުރުމަށް ނިންމާ އިއުލާން ކޮށްފައެވެ.

ހަނިއްޔާގެ ތިން ކުދިން ޝަހީދުވީ އޭޕްރީލް މަހު ގާޒާ އަށް ޔަހޫދީ ސިފައިން ބޮން އަޅާ ދިން ހަމަލާއެއް ގައެވެ.

ޤޮމް ސިޓީގެ ޖަމްކަރާން މިސްކިތުގައި ބަދަލު ހިފުމުގެ ރަތް ދިދަ އީރާނުން ވަނީ ނަގާފައެވެ.