ގެދޮރުވެރިޔާ ސްކީމްގައި ކަސްޓަމްސް އަށް ޚާއްސަކޮށް 100 ފްލެޓް ނުހިމެނޭ ކަމަށް ރައްޔިތުންގެ މަޖިލީހުގެ ޕެޓިޝަން ކޮމިޓީގައި ވިދާޅުވުމަށް ފަހު، 4000 ފްލެޓްގެ ތެރެއިން ފުރަތަމަ ދޫކުރާ ފްލެޓްތަކުން 100 ފްލެޓް ކަސްޓަމްސް އަށް ލިބޭނެ ކަމުގެ ޔަގީންކަން އެތަނުގެ ވެރިންނަށް ހައުސިންގ މިނިސްޓަރ އަލީ ހައިދަރު ދެއްވައިފިއެވެ.
މިނިސްޓަރ މިގޮތައް ނިންމެވިކަން އަންގާރަ ދުވަހު މޯލްޑިވްސް ކަސްޓަމްސް ސާވިސްގެ ހުރިހާ މުވައްޒަފުންނަށް އެތަނުގެ ފަރާތުން ވަނީ އަންގާފައެވެ.
މޯލްޑިވްސް ކަސްޓަމްސް ސާވިސްގެ ސެކްރެޓޭރިއަޓް އޮފް ކޮމިޝަނަރ ޖެނެރަލްސް ބިއުރޯ އިން 30 ޖުލައި 2024 ގެ ތާރީޚްގައި ކޮމިޝަނަރ ޖެނެރަލް އޮފް ކަސްޓަމްސް ފާތިމަތު ދިޔާނާ ސޮއިކުރައްވާ އެތަނުގެ ހުރިހާ މުވައްޒަފުންނަށް ފޮނުވާފައިވާ މެމޯ އެއްގައި ހައުސިންގ މިނިސްޓަރ އެ ޔަގީންކަން ދެއްވާފައިވާ ކަމަށް ބުނެފައިވެއެވެ.
މި ނޫހަށް ކޮޕީ ލިބިފައިވާ އެ މެމޯގައި ބުނެފައިވަނީ "ވަޒީރު އާ އެކު މިއަދު (30 ޖުލައި 2024) ބޭއްވުނު ބައްދަލު ވުމުގައި، ކުރިންވެސް ކަސްޓަމްސް އަށް ދެއްވާނެ ކަމަށް ކަނޑައަޅުއްވާފައިވާ 100 ފްލެޓް ކަސްޓަމްސް އަށް ލިބޭނެ ކަމުގެ ޔަގީން ކަން ވަނީ ވަޒީރު ދެއްވާފައި" ކަމަށެވެ.
ގެދޮރުވެރިޔާ ޕްރޮގްރާމްގެ ދަށުން ފުރަތަމަ ދޫކުރާ ފްލެޓްތަކުން 100 ފްލެޓް ކަސްޓަމްސް މުވައްޒަފުންނަށް ލިބޭނެ ކަމުގެ ޔަގީން ކަން އަންގާރަ ދުވަހު ހައުސިން މިނިސްޓަރ ދެއްވި އިރު އޭގެ އެއް ދުވަސް ކުރިން، ހޯމަ ދުވަހު ބޭއްވުނު ރައްޔިތުންގެ މަޖިލީހުގެ ޕެޓިޝަން ކޮމިޓީގައި އެ 4،000 ފްލެޓްގެ ތެރޭގައި ކަސްޓަމްސްގެ 100 ފްލެޓް ނުހިމެނޭ ކަމަށް މިނިސްޓަރ ވަނީ ވިދާޅުވެފައެވެ.
ރައީސް އިބްރާހިމް މުހައްމަދު ސާލިހްގެ ސަރުކާރުން ގެދޮރުވެރިޔާ ސްކީމްގެ ދަށުން ފްލެޓް ލިބޭނެ ކަމަށް ގެޒެޓް ކޮށްފައިވާ ލިސްޓުން އެއްވެސް ފަރާތެއް އުނިނުކުރުމަށް ސަރުކާރަށް ގޮވާލާ ރައްޔިތުންގެ މަޖިލީހަށް ހުށަހަޅާފައިވާ ޕެޓިޝަނާ ގުޅޭ ގޮތުން އެ ކޮމިޓީގެ މެމްބަރުން ކުރެއްވި ސުވާލުތަކަށް ޖަވާބު ދެއްވަމުން ފްލެޓް ލިބޭ މީހުންގެ ލިސްޓްގައި ކަސްޓަމްސްގެ 100 ފްލެޓް ނުހިމެނޭ ކަމަށް ވަރަށް ސާފު ބަހުން މިނިސްޓަރ ވިދާޅުވިއެވެ.
މިނިސްޓަރ ކޮމިޓީގައި ވިދާޅުވީ މި ސަރުކާރުން ބަލަނީ ކުރީގެ ސަރުކާރުން އިއުލާންކޮށް، ހުޅުވާލި ފުރުސަތުގައި ފްލެޓަށް ކުރިމަތިލީ މީހުންގެ ތެރެއިން ފްލެޓް ލިބޭ ކަމަށް ކަނޑައެޅި ފުރަތަމަ 4،000 މީހުންގެ ލިސްޓުގެ މައްސަލަ ކަމަށެވެ.
މި 4،000 ފްލެޓްގެ ތެރޭގައި ކަސްޓަމްސްގެ މުވައްޒަފުންނަށް ކަނޑައަޅާފައި އޮތް އެއްޗެއް އޮތް ކަމަކަށް އަޅުގަނޑުމެންނަށް މިހާތަނަށް ފެނިފައެއް ނެތް.
ޕެޓިޝަން ކޮމިޓީގެ މެމްބަރަކު ކުރެއްވި ސުވާލަކަށް ޖަވާބު ދެއްވަމުން މިނިސްޓަރ ވިދާޅުވިއެވެ.
އޭގެ އިތުރުން، ކަސްޓަމްސްގެ ވެރިންނާ ފްލެޓް އާ ބެހޭ ގޮތުން މަޝްވަރާ ކުރެއްވުމުން ކަސްޓަމްސްގެ މުވައްޒަފުންނަށް ފްލެޓް ހޯދުމަށް އެ ތަނުގެ ވެރިންގެ މާ ބޮޑު އިންޓަރެސްޓެއް ނެތް ކަމަށް ވެސް މިނިސްޓަރ ހައިދަރު ވަނީ ވިދާޅުވެފައެވެ.
މިނިސްޓަރ ހައިދަރު މިހެން ވިދާޅުވިއިރު، ކަސްޓަމްސް އިން އެ ތަނުގެ މުވައްޒަފުންނަށް 29 ޖުލައި 2024 ގެ ތާރީޚްގައި ނެރުނު މެމޯއެއްގައި މައުލޫމާތު ދީފައިވާ ގޮތުގައި ކުރީގެ ރައީސް އިބްރާހިމް މުހައްމަދު ސޯލިހު ގެ ސަރުކާރުން ގެދޮރުވެރިޔާ ސްކީމްގެ ދަށުން 100 ފްލެޓް ކަސްޓަމްސްގެ މުވައްޒަފުންނަށް ދިނުމަށް ނިންމާ ރައީސުލް ޖުމްހޫރިއްޔާގެ އޮފީހުގެ ސިޓީ އަކުން ހުސްވި އަހަރުގެ ސެޕްޓެމްބަރު، 19 ގައި އެކަން ވަނީ އަންގާފައެވެ.
ކަސްޓަމްސްގެ މުވައްޒަފުންނަށް ސަރުކާރުން ދިނުމަށް ކަނޑައަޅާފައިވަނީ ތިން ކޮޓަރީގެ 85 ފްލެޓާއި، ދެ ކޮޓަރީގެ 15 ފްލެޓް ކަމަށްވެސް އެ މެމޯގައި ބުނެފައިވެއެވެ.
