ޒަމީރު ފަޅެއް ވިއްކައިގެން ނެގި ފައިސާ އެކައުންޓުގައި އެބަހުރި، އެ މައްސަލަ ބަލަން ރައީސް މުއިއްޒުއަށް ކެރިވަޑައިނުގަންނަވާނެ - ޔާމީން
އަބްދުއްރަހީމްފަދަ ބޭބޭފުޅުން ތިބެގެން މި ސަރުކާރުން އެ މައްސަލަ ނުބަލާނެ
ރައީސުލްޖުމްހޫރިއްޔާ އަދި ފޮރިން މިނިސްޓަރު ޒަމީރު
ފޮރިން މިނިސްޓަރު މޫސާ ޒަމީރު ރަށެއް ވިއްކައިގެން ނެގި ފައިސާ އެކައުންޓުގައި އެބަހުރި ކަމަށާއި، ކޮރަޕްޝަންގެ މައްސަލަ ބައްލަވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވާއިރު، ޒަމިރުގެ އެ މައްސަލަ ބަލަން ރައީސް މުއިއްޒުއަށް ކެރިވަޑައިނުގަންނަވާނެ ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެއެވެ.
ފްރަންޓް އޮފީހުގައި ހޯމަ ދުވަހުގެރޭ ބޭއްވި ޖަލްސާގައި ރައީސް ޔާމީން ވިދާޅުވީ ރައީސް ޑރ. މުހައްމަދު މުއިއްޒުގެ އަރިހުގައި ތިއްބެވި އިސް ބޭފުޅުންގެ އޮތީ ކޮރަޕްޝަން ކަމަށެވެ. އަދި މިހާރުގެ ފޮރިން މިނިސްޓަރު މޫސާ ޒަމީރު އަރިއަތޮޅުގެ ފަޅެއް އޭނާގެ އަނބިކަނބަލުންގެ ދޮންބައްޕަގެ ނަމުގައި ނަންގަވާފައި، ލިކުއިޑޭޓްކޮށްފައި ހުރިހާ ލާރިއެއް ނަންގަވައިގެން ހުންނެވީ މޫސާ ޒަމީރު ކަމަށެވެ. އަދި އެ ފައިސާ ހުރީ އޭނާގެ އެކައުންޓުގައި ކަމަށް ވެސް ރައީސް ޔާމީން ވިދާޅުވިއެވެ.
މަޖީލިހުގެ ރައީސް އަބްދުއްރަހީމް އަބްދުﷲ އަށް އިޝާރާތްކުރައްވާ ރައީސް ޔާމީން ވަނީ ރައީސް މުއިއްޒުއަށް އަބްދުއްރަހީމުގެ މައްސަލަތައް ބަލަންކެރިވަޑައިގަންނަވާނެތޯ ސުވާލު އުފައްދަވާފައެވެ. ރައީސް ޔާމީން ވިދާޅުވީ އެ މައްސަލަ ބަލަން ރައީސް މުއިއްޒުއަށް ކެރިވަޑައިނުގަންނަވާނެ ކަމަށެވެ.
އަދި ރައީސް މުއިއްޒު ކޮރަޕްޝަންގެ އެންމެ ބޮޑު މައްސަލަ، އެމްއެމްޕީއާރުސީގެ މައްސަލަ ބައްލަވާނެ ވާހަކަފުޅު ދައްކަވާއިރު، އެމްއެމްޕީއާރުސީގެ ލިސްޓު އާންމުކުރައްވަން ފުލުހުންނަށް ދެންނެވޭނެ ކަމަށެވެ. އެއީ ދައުލަތުގެ ސިއްރެއް ނޫން ކަމަށާއި، އެއީ ދައުލަތާއި ރައްޔިތުންގެ މުދާ ކަމަށާއި، އެއީ ރައްޔިތުންގެ ފައިސާ ކަމަށެވެ. އަދި އެ ފައިސާ ކާކު ކިހާވަރަކަށް ނަގާފައިވޭތޯ އެނގެންޖެހޭ ކަމަށެވެ.
ރައީސް ޔާމީން ވިދާޅުވީ އެމްއެމްޕީއާރުސީގެ ކަޅު ފައިސާ ނަގާފައިވާ މީހުން މިހާރު ތިބީ ރައީސް އޮފީހުގައި ވަޒީރުންގެ ގޮތުގައި ކަމަށެވެ.
ފްރަންޓް އޮފީސް ޖަލްސާފައި ރައީސް ޔާމީނުގެ ވަކީލު އާދަމް އާސިފް ވަނީ އެމްއެމްޕީއާރުސީ ލިސްޓުގައި އަބްދުއްރަހީމްގެ ވާހަކަ އިންކަމަށް ވިދާޅުވެފައެވެ. 8ށް ވުރެ ގިނަ ޕޭމަންޓް އޮއިއްޓޭގެ ބަޔާނުގައި އެކަނި ވެސް އެބަހުރި ކަމަށާއި، އަބްދުއްރަހީމަށް ލާރި ގެންގޮސް ދިން މީހުން 20،000 ޑޮލަރުން، 5 ލައްކަ ރުފިޔާއިން 1 ލައްކަ ރުފިޔާއިން ގެންގޮސްދީފައިވާ ކަމަށް ވިދާޅުވެފައެވެ.
