ފާޑުކިޔުންތަކަށް ބެލުމެއް ނެތި، ގަވަރުނަރަކަށް މުނައްވަރު އައްޔަންކުރަން މަޖިލީހުން ފާސްކޮށްފި
30 ޖުލައި 2024 | އަންގާރަ 10:38މުނައްވަރު އާއި މެދު ކުރެވޭ ތުހުމަތުތަކާއި މެދު އޭސީސީން ޖަވާބުދީފައެއް ނުވޭ
މަޖިލިސް
މަރުކަޒީ ބޭންކް، އެމްއެމްއޭގެ ގަވަރުނަރަކަށް ކުރީގެ މާލީ ވަޒީރު އަޙްމަދު މުނައްވަރު އައްޔަން ކުރުމާއި މެދު ބޮޑެތި ފާޑުކިޔުންތަކެއް އަމާޒުވެފައި ވަނިކޮށް އެކަންކަމަށް ބެލުމެއް ނެތި، އޭނާ އެ މަޤާމަށް އައްޔަންކުރުމަށް ރައީސުލްޖުމްހޫރިއްޔާއަށް ލަފާއެރުވުމަށް ރައްޔިތުންގެ މަޖިލީހުން ފާސްކޮށްފިއެވެ.
އަންގާރަ ދުވަހުގެ މަޖިލީހުގެ ޖަލްސާގައި އޭނާ އެ މަޤާމަށް އައްޔަންކުރަން ލަފާދޭން ފާސްވީ މަޖިލީހުގެ 78 މެންބަރުންގެ ވޯޓާއި އެކުގައެވެ.
މުނައްވަރު އެމަޤާމަށް އައްޔަންކުރަން ފާސްކޮށްފައި ވަނީ މަޖިލީހުގެ މާލިއްޔަތު ކޮމިޓީން އިންޓަވިއު ކުރުމަށްފަހު އޭނާ އެމަގާމަށް ޝަރުތުހަމަވާކަށް ނިންމާފައިވާތީއެވެ.
މި ސަރުކާރު ވެރިކަމަށް އައި އިރު އެ މަގާމުގައި ކުރިން ހުންނެވި ޢަލީ ހާޝިމް އެ މަގާމުން ވަކިކުރެއްވުމާއި އެކު އާއްމުންނާއި ސިޔާސީ މީހުން އައީ މަޖިލީހާއި ސަރުކާރަށް އެކަމާއި ގުޅިގެން ވަރަށް ބޮޑަށް ފާޑުކިޔަމުންނެވެ. ހާޝިމް މަގާމުން ވަކިކޮށްފައިވަނީ މަގާމުގެ މަސްއޫލިއްޔަތު އަދާނުކުރެވޭ ކަމަށްބުނެ ކަމަށް ވީ ނަމަވެސް އޭނާ މަޤާމުން ވަކި ކުރީ ސަރުކާރުން ބޭނުންވާ ކަންކަމަށް އޭނާ އިޖާބަ ނުދޭތީ ކަމަށް ގިނަ ބަޔަކު ދަނީ ތުހުމަތުކުރަމުންނެވެ. މީިހާތަނަށް މުވައްވަރު ހުންނެވީ މާލީ ވަޒީރުގެ އެޑްވައިޒަރުގެ މަޤާމުގައެވެ. މީގެ ކުރިން ކުރީގެ ރައީސް އަބްދުﷲ ޔާމީންގެ ވެރިކަމުގައި އެނާ ވަނީ ރާއްޖޭގެ މާލީ ވަޒީރުގެ މަގާމު އަދާކުރައްވާފައެވެ. އޭގެ ކުރިން 2014ވަނަ އަހަރުން ފެށިގެން 2016 ވަނަ އަހަރާ ހަމައަށް އެ ވުޒާރާގެ ސްޓޭޓް މިނިސްޓަރުގެ މަގާމު ވެސް އަދާކުރެއްވިއެވެ.
މުނައްވަރުގެ މައްޗަށް ތުހުމަތުކުރެވޭ ގިނަ މައްސަލަތަކެއް ހުރުމާއި އެކު އާއްމުން ގިނަ ކަންބޮޑުވުންތަކެއް ފާޅުކުރަމުން އައި ނަމަވެސް އޭސީސީން އެކަމާއި މެދު އެއްޗެއް ބުނެފައެއް ނުވެއެވެ. މުނައްވަރަށް ކުރެވޭ ތުހުމަތުގެ މައްސަލާގައި އެންޓި ކޮރަޕްޝަން ކޮމިޝަން (އޭސީސީ)ން އޭނާގެ މައްޗަށް ދައުވާ ކޮށްދިނުމަށް އެދި 2020 ވަނަ އަހަރުގެ ތެރޭގައި ޕްރޮސެކިއުޓަރ ޖެނެރަލް (ޕީޖީ) އޮފީހަށް ވަނީ ފޮނުވާފައެވެ. އެހެންނަމަވެސް ތަހުގީގުގައި އިތުރަށް ފުރިހަމަ ކުރަންޖެހޭ ކަންކަން ފުރިހަމަ ކުރުމަށް އެމައްސަލަ އަނބުރާ އޭސީސީއަށް ފޮނުވާލިއެވެ. އޭސީސީން 21 ސެޕްޓެންބަރު 2020 ގައި ބުނެފައިވަނީ މުނައްވަރުގެ މައްޗަށް ތުހުމަތު ކުރެވޭ މައްސަލަތަކުގެ ތަހުގީގު އިތުރަށް ފުރިހަމަ ކުރުމުގެ މަސައްކަތް ކުރިއަށްދާ ކަމަށެވެ. ނަމަވެސް އޭގެފަހުން މިއަދާ ހަމައަށް މިމައްސަލާއާ ގުޅިގެން އޭސީސީގެ ބަހެއް ވަނީ ލިބޭ ގޮތް ނުވެފައެވެ. މިމައްސަލާގައި ތަހުގީގު ގޮސްފައިވާ ހިސާބާ ގުޅޭގޮތުން ރާއްޖެއެމްވީއިން ތަކުރާރުކޮށް އޭސީސީގައި ސުވާލު ކުރި ނަމަވެސް އެކޮމިޝަނުން ރަސްމީ ޖަވާބު ދީފައެއްނުވެއެވެ.
