އެހެން ސަރުކާރަކަށް ނުބެލޭ ފެންވަރަށް އެމްއެމްޕީއާރުސީގެ މައްސަލަ ބެލުމަށް ކޮމިޝަނެއް އުފައްދަން ރައީސް ޔާމީން ރައީސް މުއިއްޒުއަށް ޗެލެންޖު ކުރައްވައިފި

އެހެން ސަރުކާރަކަށް ނުބެލޭ ފެންވަރަށް އެމްއެމްޕީއާރުސީގެ ހިޔަނާތުގެ މައްސަލަ ބެލުމަށް ކޮމިޝަނެއް އުފައްދަން ކުރީގެ ރައީސް އަބްދުﷲ ޔާމީން ރައީސް ޑރ. މުހައްމަދު މުއިއްޒުއަށް ޗެލެންޖުކުރައްވައިފިއެވެ.

ދަ ފްރޮންޓް އޮފީހުގައި ހޯމަ ދުވަހުގެ ރޭ ބޭއްވި ޖަލްސާގައި ރައީސް ޔާމީން ވިދާޅުވީ އެމްއެމްޕީއާރުސީގެ މައްސަލަ ތަހުގީގުކުރާނެ ވާހަކައާއި ކެރޭނެކަމަށް ރައީސް ޑރ. މުހައްމަދު މުއިއްޒު ވިދާޅުވިއިރު، އެ ވާހަކައަކީ ޕީއެންސީގެ ޖަގަހައިގައި ތިއްބެވި ބޭބޭފުޅުންނަށް ބަލައިގަންނަން ފަސޭހަ ވާހަކައަކަށް ނުވި ކަމަށެވެ. އެބޭބޭފުޅުންގެ މޫނުން ފެނިގެންދިޔައީ ހިތް ނުތަނަވަސްކަމާއި އުދާސްކަމާއި ނަފްރަތު ކަމަށެވެ.

ރައީސް ޔާމީން ވިދާޅުވީ ކުރީގެ ނައިބުރައީސް އަހުމަދު އަދީބުގެ ފަރާތުން ފުލުހުންނަށް ލިބިފައިވާ ލިސްޓެއް އޮންނާނެ ކަމަށެވެ. އަދި އެމްއެމްޕީއާރުސީގެ މައްސަލައަކީ އެންމެ ބޮޑު މައްސަލައެއްކަމަށް މިހާރުގެ ރައީސް ވެސް ވިދާޅުވަމުން އަންނަ އިރު، އެ ލިސްޓް އާންމު ނުކޮށް ފުލުހުން ލިސްޓް ފޮރުވައިގެން ގެންގުޅެނީ ކިހާވަރެއްގެ ގާނޫނޫ އަސާސެއް އޮވެގެންތޯ ސުވާލު އުފައްދަވާފައިވެއެވެ.

އަދި މި މައްސަލައަކީ ރައްޔިތުންނާއި ގުޅުން އޮތް ބޮޑު މައްސަލައަކަށް ވާތީ އެކަމާއި ގުޅޭ ޝަރީއަތްތައް ލައިވްކުރާ ކަމަށާއި، އެހެންކަމުން އެ ލިސްޓް ފޮރުވައިގެން ހާމަނުކޮށް އުޅުއްވަނީ ކީއްވެގެންތޯ ސުވާލު އުފައްދަވާފައެވެ. ރައީސް ޔާމީން ވިދާޅުވީ މި ސަރުކާރާއި މަޖިލީހުގެ ސުޕަރމެޖޯރިޓީ އޮވެގެން އެ ހާމަކުރައްވާނެކަމަށް ގަބޫލުފުޅު ނުކުރައްވާ ކަމަށެވެ.

ރައީސް ޔާމީން ވިދާޅުވީ މާލެ ސިޓީ ކައުންސިލްގައި ހުރި ރައީސް މުއިއްޒުއާއި ގުޅޭ ކޮރަޕްޝަންގެ އެއްވެސް މައްސަލައެއް ވެސް އޭސީސިއަކަށްވެސް ފުލުހުންނަކަށްވެސް ނުބެލޭނެ ކަމަށެވެ. އަދި ރައީސް މުއިއްޒަށް ކެރިވަޑައިގަންނަވާނަމަ، ރައީސް ކުރައްވަންވީ ކަމަކީ ގާނޫނޫއަސާސީން ލިބިވަޑައިގަންނަވާ ބާރުގެ ދަށުން ކޮމިޝަނެއް އުފެއްދެވުން ކަމަށެވެ.

އަދި އެ ކޮމިޝަނުގައި ދައުލަތުގެ ބަންޑާރަނައިބާއި ޕްރޮސެކިއުޓަރ ޖެނެރަލްގެ އިތުރުން ދެން ތިބެންވާނީ ސަރުކާރާއި ސަރުކާރުގެ ކުންފުނިތަކާއި ޕާޓީތަކުގެ މީހުން ނޫން މިނިވަން މީހުންކަމަށެވެ. އަދި އެވަރުގެ ކޮމިޝަނެއް ނަގައިގެން މި މައްސަލަ ބަލާކަމުގައިވާނަމަ ރައްޔިތުން މިކަން ބަލައިގަންނާނެ ކަމަށެވެ.

ރައީސް ޔާމީން ވިދާޅުވީ އެމްއެމްޕީއާރުސީގެ މައްސަލަތައް ރައީސް މުއިއްޒަށް ނުބެއްލެވުނުތާގައި، އެމަނިކުފާނު ސިޓީ ކައުންސިލްގައި އުޅުއްވި އިރު ކޮރަޕްޝަނަށް މަގުފަހިވާގޮތަށް ކުރައްވާފައިވާ އެތައް މައްސަލައެއްވެސް އެބަހުރި ކަމަށެވެ. އަދި މިއިން އެއްވެސް މައްސަލައެއް ބެއްލެވިޔަ ނުދޭނެ ކަމަށާއި، ރައްޔިތުންގެ އިތުބާރު ހޯއްދަވަން ބޭނުންވާނަމަ ރަސްމާލެ މަޝްރޫއުގެ ކަންކަން ރައްޔިތުންނަށް ކިޔައިދީ، އެމްއެމްޕީއާރުސީގެ މައްސަލަ ބަލަން ކޮމިޝަނެއް ހައްދަވަންޖެހޭ ކަމަށެވެ.