ކޮމިޝަނަށް ހުށަހަޅާ މައްސަތަކުގެ އަދާހަމަ ލިބުން ޑިޖިޓަލައިޒްކޮށް އޮޓޮމޭޓްކޮށްފި
އެސްއެމްއެސް މެދުވެރިކޮށް މައްސަލަ ކޮމިޝަނަށް ހުށަހަޅާ ހިސާބުން ފެށިގެން މައްސަލަ ނިމެންދެން މައްސަލަ ހުށަހަޅާ ފަރާތަށް މަޢުލޫމާތު ފޯރުކޮށްދެވޭނެ
"ލިބީގެ" ނަމުގައި މިއަދު ތަޢާރަފުކުރެވުނު މި ނިޒާމް އިފްތިތާހުކޮށްދެއްވީ ކޮމިޝަންގެ ރައީސް
އެންޓި-ކޮރަޕްޝަން ކޮމިޝަނަށް ހުށަހެޅޭ މައްސަލަތަކުގެ އަދާހަމަ ކާކުކަން އެނގޭގޮތަށް އެ މައްސަލަ ހުށަހަޅާ ފަރާތްތަކަށް އޮޓޯމޭޓްޑް ނިޒާމެއްގެ ތެރެއިން ލިބޭނެ އިންތިޒާމް އެންޓި-ކޮރަޕްޝަން ކޮމިޝަނުން ހަމަޖައްސައިފިއެވެ.
"ލިބީގެ" ނަމުގައި މިއަދު ތަޢާރަފުކުރެވުނު މި ނިޒާމުގެތެރެއިން، މައްސަލަ ހުށަހަޅާ ހިސާބުން ފެށިގެން މައްސަލަ ނިމެންދެން މައްސަލައާ ގުޅިގެން ކޮމިޝަނުން ކުރިއަށް ގެންދާ ކޮންމެ މަރުޙަލާއެއް ފެށުމުން އަދި ނިމުމުން އެކަމުގެ އަދާހަމަ، ކާކުކަން އެނގޭގޮތަށް ފޯނު ނަންބަރާއިއެކު މައްސަލަ ހުށަހަޅާ ފަރާތަކަށް، އެސް އެމް އެސްގެ ޒަރީޢާއިން ލިބެމުން ދާނެއެވެ.
"ލިބީގެ" ފަންކަޝަންގެ ސަބަބުން، ކޮމިޝަނަށް ޙާޟިރުނުވެ، މައްސަލައިގެ އަދާހަމަ ބެލުމަށް އިތުރު ވަގުތު ހޭދަ ކުރުމަކާނުލައި މައްސަލައިގެ އަދާހަމަ ލިބިގެންދާނެއެވެ. އަދި މި ފަންކްޝަންގެ ސަބަބުން، މައްސަލަތަކުގެ އަދާހަމަ ހޯދުމަށް އެދި ހުށަހަޅާ ހުށަހެޅުންތަކަށް ޖަވާބުދިނުމަށް ހޭދަކުރަމުންދާ ވަގުތު ސަލާމަތްކުރެވި، ހުށައަޅާ މައްސަލައާއި ގުޅިގެން ކޮމިޝަނުން ނިންމާ ނިންމުން ފަސޭހައިން އެނގިގެންދާނެއެވެ.
"ލިބީގެ" އިފްތިތާޙު ކޮށްދެއްވީ 2024 ޖުލައި 29 ގައި މިކަމަށްޓަކައި އެންޓި-ކޮރަޕްޝަން ކޮމިޝަނުގައި ބޭއްވި ޚާއްސަ ރަސްމިއްޔާތެއްގައި ކޮމިޝަނުގެ ރައީސް އާދަމް ޝާމިލްއެވެ.
