މާލޭގައި މީހުން ދިރިނޫޅޭ ގެއެއްގައި ރޯވި އަލިފާންގަނޑު ނިއްވާލައިފި

މާލޭގެ ބުރުޒު މަގުގައި ހުރި މީހުން ދިރިނޫޅޭ ގެއެއްގައި ރޯވި އަލިފާންގަނޑު ނިއްވާލައިފިއެވެ.

އެމްއެންޑީއެފުން ބުނީ އާދިއްތަ ދުވަހުގެ ރޭ މ.އޯކިޑްޕްލާޒާގޭގައި (މީހުން ދިރިނޫޅޭ)، ޖަމާކޮށްފައި ހުރި ކުނިތަކެއްގައި ރޯވި އަލިފާން ފަޔަރ އެންޑް ރެސްކިޔު ސަރވިސްގެ ފަޔަރފައިޓަރުން ނިއްވާލާފައިވާ ކަމަށެވެ.

މި ހާދިސާގެ މައުލޫމާތު، އާދިއްތަ ދުވަހުގެ ރޭ 03:31 ހާއިރު ލިބިފައިވާ ކަމަށް އެމްއެންޑީއެފުން ބުނެއެވެ. އަދި އެ ސަރަހައްދަށް ގޮސް ފަޔަރ ފައިޓަރުން ކުރި މަސައްކަތުން، އަލިފާންގަނޑު އެއްކޮށް ނިއްވާލެވުނީ އާދިއްތަ ދުވަހުގެ ރޭ ފަތިހު 04:49 ހާއިރެވެ.

މި ހާދިސާގައި އެއްވެސް މީހަކަށް އަނިޔާއެއް ނުލިބެ އެވެ. ނަމަވެސް މުޅިގޭގައި އަލިފާން ރޯވެ، ވަރަށް ބޮޑަށް އަދާފައިވެއެވެ. މުޅި ސަރަހައްދު ދުން ބޯވެ، ކައިރި އިމާރާތްތަކަށް އަސަރުކުރުމާއެކު، އެ އިމާރާތްތަކުގައި ދިރިއުޅޭ ގެތަކުން މީހުން ހުސްކުރުމުގެ މަސައްކަތް ކޮށްފައިވެއެވެ.

މައުލޫމާތު ލިބިފައިވާ ގޮތުގައި އެގެ ފަޅަށް ހުރި ނަމަވެސް އެކި ކުށްތަކަށް އަރައިގަންނަ މީހުން އެގެއަށް ވަދެ އުޅެއެވެ. އެގޮތުން މަސްތުވާތަކެތި ބޭނުންކުރާ މީހުން މަސްތުވުމަށް އެގެއަށް ވަދެ އުޅޭ ކަމަށް ކައިރި ހިސާބުގައި ދިރިއުޅޭ މީހުން ބުނެއެވެ.