ޕާޓީތައް ވަކި ގޮތަކަށް ލޭބަލް ކުރުމުން އެއިން އުފެދޭ ނަފްރަތަކީ މުޅި ޤައުމަށް އޮތް ނުރައްކަލެއް: ޝާހިދު

ނަފްރަތު އުފެއްދުމަށް ސިޔާސީ ޕާޓީތައް ވަކި ގޮތަކަށް ލޭބަލް ކުރުން ހުއްޓާލުމަށް އެމްޑީޕީގެ ރައީސް އަދި ކުރީގެ ޚާރިޖީ ވަޒީރު އަބްދުﷲ ޝާހިދު ގޮވާލައްވައިފިއެވެ.

މިނިވަން ދުވަހު ރާއްޖެޓީވީއަށް ދެއްވި ޚާއްސަ އިންޓަވިއުއެއްގައި ޝާހިދު ވިދާޅުވީ، ރާއްޖެއިން އިސްލާމް ދީން ފޮހެވޭނެ ވާހަކަ ސިޔާސީ ވާހަކައެއްގެ ގޮތުގައި ބައެއް ފަރާތްތަކުން ދައްކާ ކަމަށާއި، ނަމަވެސް ދުވަހެއް ދުވަހަކަށް ރާއްޖޭގައި އިސްލާމް ދީނަށް ދޭ އިސްކަން ދާނީ އިތުރުވަމުން ކަމަށެވެ.

ޝާހިދު ވިދާޅުވީ، ކާބަފައިން ގެނެސްދިން މިނިވަންކަމާއި، އިސްލާމް ދީން މި ޖީލުގައިވެސް ދަމަހައްޓާނެ ކަމަށެވެ. އެހެންކަމުން އެކަމުގައި ޖެހިލުންވާން ޖެހޭ އަދި ބިރުވެރިކަން އުފައްދަން ޖެހޭ ސަބަބެއްވެސް ނެތްކަމަށް ޝާހިދު ވިދާޅުވިއެވެ.

އިސްލާމް ދީނުގެ ހިދާޔަތުގައި ތިބޭއިރު، މިއަދު ދިވެހިން ފަޚުރުވެރިވާން ޖެހޭކަންވެސް ޝާހިދު ފާހަގަ ކުރެއްވިއެވެ.

ޝާހިދު އިތުރަށް ވިދާޅުވީ، މިނިވަންކަމަކީ ބައިބައިވެގެން ހިފެހެއްޓޭނެ އެއްޗެއް ނޫން ކަމަށެވެ. އެއީ އެންމެން އެކަތިގަނޑަކަށް ވެގެން ހިފެހެއްޓޭނެ އެއްޗެއްކަން ޝާހިދު ފާހަގަ ކުރެއްވިއެވެ.

ޝާހިދު ވިދާޅުވީ، ވަކި ފިކުރަކަށްވީތީ ދީނާ ދެކޮޅު، ޤައުމުގެ މިނިވަންކަމާ ދެކޮޅު ބައެއްގެ ގޮތުގައި ލޭބަލް ކުރުމަކީ ކޮށްގެންވާނެ ކަމެއް ނޫން ކަމަށެވެ. އެއީ ދިވެހިން ދެކޭ މިނިވަން ދައުލަތެއްގައި ކަން ހިނގަން ޖެހޭ ގޮތެއް ނޫންކަމަށް ޝާހިދު ވިދާޅުވިއެވެ.

ޝާހިދު ވަނީ ނަފްރަތު އުފައްދައި، މީހުންގެ ހިތްތަކުގައި ބިރުވެރިކަން އުފެއްދުން ހުއްޓާލުމަށް ގޮވާލައްވާފައެވެ. 

ޝާހިދު އިތުރަށް ވިދާޅުވީ، ބައިބައިވުން އުފެދޭ ގޮތަށް ވާހަކަ ދެއްކުމާ އެންމެންވެސް ދެކޮޅުވާން ޖެހޭ ކަމަށެވެ.