މޫސުން ގޯސްވުމުގެ ސަބަބުން ފިލިޕީންސް ކައިރިން އަޑިޔަށް ދިޔަ އެމްޓީ ޓެރަ ނޯވާ އިން ބޭރުވާ ތެޔޮ ވެރިރަށް މެނީލާގެ އައްސޭރި ފަށާ ހަމައަށް ފެތުރަނަ ނުދޭން ފިލިޕީންސްގެ ކޯސްޓް ގާޑުން ހުއްޓުމެއްނެތި މަސައްކަތް ކުރަމުންދާ ކަމަށް ފިލިޕީންސްގެ ރަސްމީ އިދާރާތަކުން ހާމަ ކޮށްފިއެވެ.

ތެޔޮގަނޑު ހިފެހެއްޓޭތޯ ގޯސްޓްގާޑުން ފްލޯޓިންގ ބެރިއަރ ބޭނުން ކުރުމުގެ އިތުރުން، މޫދުން ބާލިދީ ޖަހާފައި ތެޔޮ ނަގަމުންދާ މަންޒަރު ފެންނަ ވީޑިއޯތައް ސޯޝަލް މީޑިއާގައި ދަނީ ދައުރުވަމުންނެވެ.

މޫސުން ގޯސްވެގެން 213 ފޫޓުގެ ދިގު މި ބޯޓު އަޑިއަށް ދިޔައީ ބުރާސްފަތި ދުވަހުގެ ވަގުތެއްގައެވެ.

އޮފިޝަލުން ހާމަ ކުރާ ގޮތުގައި ބޯޓުން ތެޔޮ ލީކުވަމުން ދަނީ އިންޖީނުންނެވެ. އަނެއްކޮޅުން ބޯޓުގައި މައިގަނޑު ކާގޯގެ ގޮތުގައި ހުރީ 1.5 މިލިއަން ލިޓަރުގެ އިންޑަސްޓްރިއަލް ފިއުލް ކަމަށް ފިލިޕީންސް ކޯސްޓްގާޑުން ބުނެފައިވެއެވެ. އެހެންނަމަވެސް ކާގޯ ބައިން ތެޔޮ މިހާތަނަށް ލީކު ވެފައި ނުވާކަމަށް ކޯސްޓްގާޑުން ބުނެފައިވެއެވެ.

ބޯޓުން ބޭރުވި ތެޔޮ މިހާރުވެސް އެތައް ކިލޯ މީޓަރެއްގެ ދުރުމިނަށް ފެތުރިގެން ގޮސްފައިވާއިރު، ތެޔޮގަނޑު ނުހިފެހެއްޓިއްޖެނަމަ މިކާރިސާ ވެގެން ދާނީ ފިލިޕީންސްގެ ތާރީޚްގައި ހިނގި މިފަދަ އެންމެ ބޮޑު ކާރިސާ ކަމަށް އޮފިޝަލުން ވަނީ ބުނެފައެވެ.

ބޯޓުން ތެޔޮ ލީކުވަމުންދާ ސަރަހައްދަކީ ފިލިޕީންސްގެ މަސްވެރިކަމުގެ ސަރަހައްދަކަށް ވުމާއެކު މި ކާރިސާގެ ސަބަބުން ފިލިޕީންސްގެ މަސްވެރިންނަށް ބޮޑެތި ގެއްލުން ތަކެއް ލިބިދާނެ ކަމަށްވެސް ވަނީ ބެލެވިފައެވެ.

ބޯޓު އަޑިއަށް ދިޔަ މެނީލާ ބޭ ސަރަހައްދަކީ ފިލިޕީންސްގެ އެންމެ ބޮޑު ބަނދަރު ކަމަށްވާ ޕޯޓް އޮފް މެނީލާ އާ ވަރަށް ގާތުގައި ވާ ސަރަހައްދަކަށް ވުމާއެކު ތެޔޮގަނޑު ފެތުރުން ކޮންޓްރޯލް ނުކުރެވިއްޖެ ނަމަ، ބަނދަރުގެ ޚިދުމަތްތައް ހުއްޓި އިގްތިސާދަށް ފޫނުބެއްދޭ ވަރުގެ ގެއްލުމެއް ވެދާނެ ކަމަށް ތަޖުރިބާކާރުން ވަނީ ބުނެފައެވެ.

ބޯޓު އޮތީ 111 ފޫޓު އަޑީގައި ކަމަށް ވުމާއެކު، ހުއްޓާނުލާ މަސައްކަތް ކުރި ކަމުގައި ވިޔަސް ބޯޓުން ތެޔޮ ހުސްކުރަން ހަފްތާއެއްގެ މުއްދަތު ނަގާނެ ކަމަށް ވަނީ ބެލެވިފައެވެ.

ފިލިޕީންސް އަށް ތޫފާން ގައާމީ ގެ އަސަރު ވަރަށް ބޮޑަށް މި ދުވަސްކޮޅު ކުރަމުން ދިއުމާއެކު ކަނޑުގަދަވުމާއި ވިއްސާރައިގެ ސަބަބުން ކޯސްޓްގާޑުގެ މަސައްކަތައް ވަނީ ހުރަސްއެޅިފައެވެ. މި ތޫފާންގެ އަސަރު ވެރިރަށް މެނީލާ އަށް ކޮށް މެނީލާ އާއި ވަށައިގެންވާ ސަރަހައްދުތަކުގައި ފެންބޮޑުވެފައިވާ ކަމަށް ފިލިޕީންސްގެ މީޑިއާ އިން ބުނެފައިވެއެވެ.

ޚަބަރުތައް ބުނާ ގޮތުގައި މި ތޫފާންގެ ސަބަބުން މި ސަރަހައްދުގައި އަޑިއަށް ދިޔަ މިއީ ދެވަނަ ބޯޓެވެ. އަނެއް ބޯޓު އަޑިއަށް ދިޔައީ ތައިވާންއާ ދިމާ ބޭރުންނެވެ. ތައިވާން ކަރިން އަޑިއަށް ދިޔަ ބޯޓުން ދަތުރުކުރި 16 މީހުން ސަލާމަތް ކުރެވިފައިވާއިރު، އެ ހާދިސާގައި ބޯޓުން ދަތުރުކުރި އެކަކު ވަނީ މަރުވެފައެވެ.

ފިލިޕީންސްގައި ހިންގައިގެން އުޅޭ ޙާދިސާ އަށް ޒިންމާވާ ހުރިހާ ފަރާތްތަކެއް ޖަވާބުދާރީ ކުރުވުމަށް ތިމާވެއްޓަށް މަސައްކަތް ކުރާ އަމިއްލަ ޖަމްއިއްޔާ އެއް ކަމަށްވާ "އޯޝޭނާ" އިން ވަނީ ފިލިޕީންސްގެ ސަރުކާރަށް ގޮވާލާފައެވެ.