"މިނިވަންކަން ލިބުމާއި އެކު ނާސިރު ނިންމެވި އެންމެ މުހިންމު ނިންމެވުމަކީ އދ.ގެ މެމްބަރު ޤައުމަކަށް ރާއްޖެވުން"
އަސާސީ ހައްގުތައް ލިބޭނެ މަގުފަހިކުރެވުނީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ން ކުރި ބުރަ މަސައްކަތުން ކަމަށް ޝާހިދު ވިދާޅުވި
ރާއްޖެޓީވީގެ މިނިވަން ދުވަހުގެ ކަވަރޭޖްގައި އަބްދުﷲ ޝާހިދު ވާހަކަދައްކަވަނީ
1965 ވަނަ އަހަރުގެ ޖުލައި މަހުގެ 26 ވަނަ ދުވަހު މިނިވަންކަން ލިބުމާއި އެކު، މިނިވަންކަމުގެ ބާނީ ކުރީގެ ރައީސް އިބްރާހިމް ނާސިރު ނިންމެވި އެންމެ މުހިއްމު ނިންމެވުމަކީ އދ.ގެ މެމްބަރު ޤައުމަކަށް ރާއްޖެވުންކަމަށް އެމްޑީޕީގެ ރައީސް އަދި ކުރީގެ ފޮރިންގ މިނިސްޓަރ އަބްދުﷲ ޝާހިދު ވިދާޅުވެއްޖެއެވެ.
ރާއްޖެޓީވީގެ މިނިވަންދުވަހުގެ ޚާއްސަ ކަވަރޭޖްގައި ވާހަކަދައްކަވަމުން ޝާހިދު ވަނީ ރާއްޖޭގެ ޚާރިޖީ މިނިވަންކަމުގެ ތާރީހާއި، މިނިވަންކަމާއި މެދު ވިސްނާލުން މުހިންމު ކަންކަމަށް އަލިއަޅުވާލައްވާފައެވެ. ޚާރިޖީ ސިޔާސަތު އަދި ދިފާއީ ކަންކަން އަމިއްލަ އަށް ނިންމުމުގެ ޒިންމާ ލިބުނީ 1965 ވަނަ އަހަރު ލިބުނު މިނިވަންކަމާއި އެކުގައި ކަމަށް އެމަނިކުފާނު ވިދާޅުވިއެވެ. މިނިވަންކަން ލިބުމާއި އެކު އެންމެ ފުރަތަމަ ނިންމެވި ނިންމެވުމަކީ އދ.ގެ މެމްބަރު ޤައުމަކަށްވުން ކަމަށާއި މިނިވަންކަން ލިބުމާއި ހަމައަށް ދިވެހިންނަކީ އދ.ގެ މެމްބަރު ޤައުމެއް ނޫންކަމަށް ޝާހިދު ވިދާޅުވިއެވެ. އެކަމުގެ ސަބަބުން އޭރުގެ ލީޑަރުންގެ ވިސްނުންފުޅަކީ ވީހާވެސް އަވަހަށް ދުނިޔެ އާއި ލާމެހުންކަން އެނގޭ ކަމަށް ޝާހިދު ވަނީ ވިދާޅުވެފައެވެ. އެފަދަ ނިންމެވުމެއް ނިންމެވުމުގެ ހަގީގީ ބޭނުމަކީ ރާއްޖެ ފަދަ ކުޑަކުޑަ ޤައުމަކަށް ބޭނުންވާ އެންމެ ބޮޑު ރައްކާތެރިކަމެއް ލިބޭނީ ގައުމުތަކާއި ގުޅުން ބަދަހިކޮށް، ބައިނަލްއަޤުވާމީ ޤާނޫނުތަކުން ރައްކާތެރިކަން ލިބިގެންކަމަށް ވާތީ އެކަމަށް މަގުފަހިކޮށްދިނުން ކަމަށް ޝާހިދު ވަނީ ވިދާޅުވެފައެވެ.
ޝާހިދު ވަނީ ޚިޔާލު ފާޅުކުރުން ފަދަ އަސާސީ ހައްގުތައް ހޯދުމަށް ރާއްޖެއިން ކުރި ދަތުރުގެ މުހިންމުކަމަށް އަލިއަޅުވާލައްވާފައެވެ. އެގޮތުން ދުނިޔޭގެ ގައުމުތަކާއި އެއް ފެންވަރަށް ރާއްޖޭގައި ރައްޔިތުންނަށް އަސާސީ ހައްގުތައް ލިބޭނެ މަގުފަހިކުރެވުނީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ން ކުރި ބުރަ މަސައްކަތުން ކަމަށާއި އެކަމާއި މެދު ފަޚުރުވެރިވެވަޑައިގަންނަވާ ކަމަށް ޝާހިދު ވަނީ ވިދާޅުވެފައެވެ. މިއަދު އާއްމުން ބޭނުންވާ މައުލޫމާތެއް ފެތުރުމުގެ ފުރުސަތު ވަރަށް ފުޅާކޮށް ލިބިފައިވާ ކަމަށާއި ކޮންމެ މީހަކީ ޖަރނަލިސްޓެއް ކަަމަށް ބައެއް ޢިލްމުވެރިން ބުނަމުންދާ ކަމަށް ޝާހިދު ވިދާޅުވިއެވެ. އެ ހައްގުގެ ބޭނުންކޮށްގެން "ފޭކް ނިއުސް" ނުވަތަ ހަގީގަތާއި ޚިލާފު ޚަބަރުތައް ފަތުރައިގެން އެކި މީހުންގެ އަބުރު ކަތިލުމުގެ ޢަމަލުތައް ހިންގަމުންދާ ކަމަށް ޝާހިދު ވިދާޅުވިއެވެ. އެކަން ހުއްޓުވޭނެ ގޮތެއް ހޯދަން ޤައުމުތަކުން މަސައްކަތްކުރަމުންދާ ކަމަށް ޝާހިދު ވިދާޅުވިއެވެ.
މީގެ އިތުރުން މިއަދު ޤާނޫނު އަސާސީގައި ހައްގުތައް ލިޔެވިފައި ހުރި ނަމަވެސް އެ ހައްގުތައް ލިބޭ މިންވަރާއި މެދު މިއަދު ސުވާލުކޮށްލަން ޖެހޭ ކަމަށް ޝާހިދު ވިދާޅުވިއެވެ. އަދި އެ ހައްގުތަކުގެ ފައިދާ ކިހާމިންވަރަކަށް ލިބިގެންވޭތޯ މިއަދު އަމިއްލަ ނަފްސާއި ސުވާލުކޮށްލުން މުހިންމު ކަމަށް ޝާހިދު ވަނީ ވިދާޅުވެފައެވެ.
