މިސަރުކާރުން ދަނީ މިވަގުތު ކުރަން ނުޖެހޭ ބައިވަރު ހަރަދުތައް ކުރަމުން
ބުދަ ދުވަހު ބޭއްވި ނޫސްވެރިންގެ ބައްދަލުވުމުގެ ތެރެއިން
ރާއްޖޭގެ އިގްތިސާދު ހަމަމަގަށް އެޅުވުމަށް މިސަރުކާރުން އަދިވެސް ހަރުދަނާ ފިޔަވަޅުތަކެއް ނާޅާ ކަމަށާއި، ގަވަރުނަރު ބަދަލުކޮށްގެން އިގްތިސާދުގެ ހާލަތު ރަނގަޅުވެ ޑޮލަރު ރޭޓް ދަށް ނުވާނެ ކަމަށް މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ޕީޖީ ގުރޫޕުން ބުނެފިއެވެ.
ބުދަ ދުވަހު ރައްޔިތުން މަޖިލީހުގައި ބޭއްވި ނޫސްވެރިންގެ ބައްދަލުވުމެއްގައި އެމްޑީޕީގެ ޕާލިމެންޓަރީ ގްރޫޕްގެ ލީޑަރު އަދި ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވިދާޅުވީ މިސަރުކާރަށް ބަޖެޓް ލިބި، ފައިނޭންސް މެނޭޖްކުރުމުގައި ބޮޑެތި ގޯސްތަކެއް ހެދިފައިވާ ކަމަށެވެ.
މެންބަރު ނާޒިލް ވިދާޅުވީ މިސަރުކާރުން ދަނީ މިވަގުތު ކުރަން ނުޖެހޭ ބައިވަރު ހަރަދުތައް ކުރަމުންދާ ކަމަށެވެ.
މިހާރު ރިކަރަންޓު ހަރަދު ބޮޑުތަނުން ބޮޑުވެފައިވާއިރު، ޕީއެސްއައިޕީ ޕްރޮޖެކްޓްގެ ގޮތުގައި ބަޖެޓުގައި ހުރި މަސައްކަތުން ކުޑަ ޕަސެންޓެއްގެ މަސައްކަތް އަދިވެސް ނުފެށޭ ކަމަށް މެންބަރު ނާޒިލް ވިދާޅުވިއެވެ. އަދި ވިދާޅުވީ އެފައިސާ ވެސް ބޭނުންކުރަނީ ރިކަރެންޓް ހަރަދުގެ ގޮތުގައި ކަމަށާއި، އެއީ މުސްތަގުބަލުގައި އިގްތިސާދަށް ލިބޭނެ ވަރަށް ބޮޑު ބުރައެއް ކަމަށެވެ.
އަދިވެސް އެކަށީގެންވާ ރަނގަޅު ފިޔަވަޅުތަކެއް އަޅައި ގައުމުގެ އިގްތިސާދު ހަމަ މަގަށް އަޅުވަން ސަރުކާރުން މަސައްކަތް ނުކުރާކަން ފާހަގަކުރައްވައި މެންބަރު ނާޒިލް ވިދާޅުވީ މިދަނޑިވަޅުގައި ގަވަރުނަރު ބަދަލުކުރުމަކީ އެކަމުގެ ނޭދެވޭ އަސަރުކުރާނެ ކަމެއް ކަމަށާއި، އެއީ ރަނގަޅު ނިންމުމެއް ނޫން ކަމަށެވެ. އަދި ވިދާޅުވީ ގަވަރުނަރު މަގާމުން އަލީ ހާޝިމް ވަކިކުރެއްވި ނަމަވެސް އެބޭފުޅާއަކީ މި ފާއިތުވި ދުވަސްތަކުގައި ފުރިހަމަ އެއްބާރުލުން ދީފައިވާ ބޭފުޅެއް ކަމަށާއި، ދުނިޔޭގެ އެކިއެކި ގައުމުތަކުގެ ގަވަރުނަރުންނާއި ގާތްގުޅުމެއް ބޭއްވެވި ބޭފުޅެއް ކަމަށެވެ.
މީގެ އިތުރުން މެންބަރު ނާޒިލް ވަނީ މިސަރުކާރުގެ ވަޒީރުންތަކެއް މިފަހުން ޗައިނާއަށް ކުރެއްވި ދަތުރުފުޅުގައި އިކޮނޮމިކް މިނިސްޓަރު މުހައްމަދު ސައީދު ބައިވެރިވަޑައިނުގެންނެވުމުން އެކަމާ ވެސް ސުވާލު އުފައްދަވާފައެވެ.
ރައްޔިތުންގެ މަޖިލީހުގެ ހަނިމާދޫ ދާއިރާގެ މެމްބަރު އަބްދުލްޣަފޫރު މޫސާ ވިދާޅުވީ މިސަރުކާރުން އިގްތިސާދު ރަނގަޅު ކުރުމަށް ކުރާ މަސައްކަތްތައް ކުރުމުގައި ނިޔަތް ރަނގަޅުކުރަންޖެހޭ ކަމަށެވެ. މިހާރު އަޅަމުންދާ ފިޔަވަޅުތަކުން މުސްތަގުބަލު ރަނގަޅުވާތަނެއް އަދި ބަޖެޓަށް ލުއިތަކެއް އަންނާނެ އެއްވެސް މަންޒަރެއް ނުފެންނަ ކަމަށް މެމްބަރު އަބްދުލްޣަފޫރު ވިދާޅުވިއެވެ.
މެންބަރު އަބްދުލްޣަފޫރު ވިދާޅުވީ އަންދާޒާ ކުރާ މިންވަރަށް ދައުލަތަށް މިހާރު ވެސް އާމްދަނީ ވަންނަމުންދާ ކަމަށާއި، ޓޫރިޒަމް އެރައިވަލް ވެސް ޓަރގެޓަށް ވާސިލްވާ ކަމަށެވެ. އަދި ދައުލަތުގެ ހަރަދުތައް ކުޑަކޮށްގެން ނޫނީ އިގްތިސާދުގެ ހާލަތު ރަނގަޅު ނުކުރެވޭނެ ކަމަށް މެންބަރު އަބްދުލްޣަފޫރު ވިދާޅުވިއެވެ.
