އެފްއޭއެމްގެ ވެރިން ޚިޔާނާތްވި ފައިސާ ހޯދުމުގެ ބާރު ނޯމަލައިޒިން ކޮމިޓީއަށް
24 ޖުލައި 2024 | ބުދަ 04:52އެފްއޭއެމުގެ ވެރިން ޚިޔާނާތްވެފައިވާ އެއިދާރާގެ ފައިސާ ހޯދުމުގެ ބާރު އައްޔަންކުރާ ނޯމަލައިޒިން ކޮމިޓީއަށް ފީފާއިން ދީފި އެވެ.
އެފްއޭއެމްގެ ރައީސް ބައްސާމް އަދީލް ޖަލީލް އިދާރާ ބޭރުގައި
އެފްއޭއެމުގެ ވެރިން ޚިޔާނާތްވެފައިވާ އެއިދާރާގެ ފައިސާ ހޯދުމުގެ ބާރު އައްޔަންކުރާ ނޯމަލައިޒިން ކޮމިޓީއަށް ފީފާއިން ދީފި އެވެ.
ފީފާއިން ރޭ އެފްއޭއެމަށް އަންގާފައިވަނީ 2 ޖުލައިގައި އެ އިދާރާގެ އެކްސްކޯގެ މުއްދަތު ހަމަވެފައިވާތީވެ ދެން އައްޔަންކުރާނީ ނޯމަލައިޒިން ކޮމިޓީއެއް ކަމަށެވެ. މި ކޮމިޓީ އަށް މެމްބަރުން އަދަދު ކަނޑައަޅައި މެމްބަރުން އައްޔަންކުރާނީ ފީފާ އަދި އޭއެފްސީން ކަމުގައި ވެސް ބުނެފައިވެ އެވެ. އަލަށް އައްޔަންކުރާ ނޯމަލައިޒިން ކޮމިޓީއަށް ހަ ކަމެއް ކުރުމުގެ ބާރު ދޭންް ވެސް ފީފާއިން ވަނީ ނިންމާފަ އެވެ. އޭގެ ތެރޭގައި އެންމެ މުހިންމު ކަމެއްގެ ގޮތުގައި ހިމެނެނީ އެފްއޭމަށް ފީފާ އަދި އޭއެފްސީން ދީފައިވާ ފައިސާ އަށް ޚިޔާނާތްތެރިވެފައިވާނަމަ އެ ފައިސާ ރާއްޖޭގެ ގާނޫނީ އޮނިގަނޑުގެ ތެރެއިން ހޯދުމުގެ ބާރެވެ.
މީގެ އިތުރުން އެފްއޭއެމުގެ އަސާސީ ގަވައިދާއި އިލެކްޓޯރަލް ކޯޑު އިސްލާހު ކުރުމާއި ދަރަނި ރީސްޓްރަކްޗާ ކުރުމާއި ފީފާއިން އައްޔަންކޮށްފައިވާ މާލީ ކޮންސަލްޓަންޓާ ގުޅިގެން ކަންކަން އިންތިޒާމް ކުރުމާއި ފީފާގެ ފޮރެންސިކް އޮޑިޓް ރިޕޯޓްގައި ބަޔާންކޮށްފައިވާ ކަންކަން ތަންފީޒު ކުރުން ވެސް ހިމެނެ އެވެ.
އެފްއޭއެމަށް ނޯމަލައިޒިން ކޮމިޓީއެއް އައްޔަންކުރަން ނިންމިއިރު މީގެ ތިން ހަފުތާ ކުރިން އެ އިދާރާގެ ރައީސްކަމުގައި ހުންނެވި ބައްސާމް އަދީލް ޖަލީލް ވަނީ ސަސްޕެންޑްކޮށްފަ އެވެ. އެއީ ފީފާ އޭއެފްސީން ދިން ފައިސާ އަށް ހިޔާނާތްވި މައްސަލާގަ އެވެ.
ބައްސާމްގެ ދައުރު ނިމުނުއިރު އެފްއޭއެމަށް ވަނީ އިދާރީ އެތައް މައްސަލައަކާއި ދަރަނީގެ މައްސަލަ އާއި މުސާރަނުދެވުމާއި ގަވައިދުން މުބާރާތް ނުބޭއްވުން ފަދަ އެތައް މައްސަލައެއް ކުރިމަތިވެފަ އެވެ.
