ސަރުކާރުގެ ބަސްމަގު ހުރީ މާލީ ހާލަތު ރަނގަޅުކުރާ ކަހަލަ ގޮތަކަށް ނޫން - އަމީރު
މިހާރު ސަރުކާރުން ޢަމަލުކުރާ ގޮތުން ރާއްޖެ އަށް އިންވެސްޓަރުން ހޯދުމަށް ގޮންޖެހުމަކަށް ވާނެ ކަމަށް އޭނާ ވިދާޅުވި
ރާއްޖެޓީވީގެ ޓީވީ ޓޯކް ޝޯ ޕްރޮގްރާމްގެ ތެރެެއިން
ސަރުކާރުގެ ބަސްމަގު ހުރީ މާލީ ހާލަތު ރަނގަޅުކުރާ ކަހަލަ ގޮތަކަށް ނޫންކަމަށް ކުރީގެ ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެއެވެ.
އޭނާ އެފަދައިން ވިދާޅުވީ ރާއްޖެޓީވީގެ ޓީވީ ޓޯކް ޝޯގައި ވާހަކަދައްކަވަމުންނެވެ.
އޭނާ ވިދާޅުވީ ނިމިދިޔަ ސަރުކާރަށް މި ސަރުކާރަށް ވުރެ މާ ބޮޑަށް އިޤްތިޞާދީ ގޮންޖެހުންތަކާއި ދިމާވި ކަމަށެވެ. ކޮވިޑް-19އިގެ އާލަމީ ވަބާގެ އިތުރުން ރަޝިއާ ޔުކްރެއިން ހަނގުރާމަ ފަދަ ސަބަބުތައް މެދުވެރިވުމުން އިގްތިޞާދަށް ވަރަށް ބޮޑެތި ގޮންޖެހުންތަކާއި ދިމާވި ކަމަށް އޭނާ ވިދާޅުވިއެވެ. އެ ގޮންޖެހުންތައް ދިމާވި ނަމަވެސް ސަރުކާރުން ވިސްނުން ބެހެއްޓީ ވަރަށް ޕޮޒިޓިވްކޮށް ކަމަށް އަމީރު ވިދާޅުވިއެވެ. ކަންކަން ނުވާނެ ކަމަށް ދެކުމުގެ ބަދަލުގައި ކުރެވެން ހުރި ކަންކަން ކޮށް ޚަރަދު މެނޭޖްކުރުމަށް އެޅެން ހުރި ފިޔަވަޅުތައް އެޅުމަށް ކަމަށް އަމީރު ވިދާޅުވިއެވެ. އޭރު ސަރުކާރުން މާލީ ކަންކަން މެނޭޖްކުރީ މިހާރަށް ވުރެ މާ ދަތީގައި ކަމަށް އަމީރު ވިދާޅުވިއެވެ. އަމީރު ވަނީ ބޭރުގެ ޖަމިއްޔާ ޖަމާއަތްތަކުން ވެސް އޭރު ސަރުކާރުން ގެންގުޅުނު ސިޔާސަތުތަކަށް ތައުރީފްކުރައްވާފައިވާކަމަށް އަމީރު ވިދާޅުވިއެވެ.
އަމީރު ވަނީ މި ސަރުކާރުން ކަންކަމުގައި ޒިންމާ ނުނަގާކަަމށް ފާހަގަކުރައްވާ އެކަމާއި މެދު ކަންބޮޑުވުން ފާޅުކުރައްވާފައެވެ. ޒިންމާދާރު މަޤާމުތަކުގައި ތިބި މީހުން މިހާރު މަސައްކަތް ކުރަންވާނީ ރާއްޖެ އަށް އިންވެސްޓަރުން ހޯދުމަށާއި، ރާއްޖެ އަށް ބޭނުންވާ މާލީ އެހެނިހެން ކަންކަން ފުރިހަމަކުރުމަށް މަގުފަހިވާނެ ގޮތަކަށް ކަމަށް އަމީރު ވިދާޅުވިއެެވެ. މިހާރު ސަރުކާރުން ޢަމަލުކުރާ ގޮތުން ރާއްޖެ އަށް އިންވެސްޓަރުން ހޯދުމަށް ގޮންޖެހުމަކަށް ވާނެ ކަމަށް އޭނާ ވިދާޅުވިއެވެ.
