ބަޖެޓުގައި އޮތް އެއްޗެއް ރައީސަށް ނޭގުމަކީ ކަންބޮޑުވާންޖެހޭ ކަމެއް - އަމީރު

ބަޖެޓުގައި އޮތް އެއްޗެއް ރައީސް ޑރ. މުހައްމަދު މުއިއްޒުއަށް އެނގިވަޑައިނުގަތުމަކީ ކަންބޮޑުވާންޖެހޭ ކަމެއް ކަމަށް ކުރީގެ ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެއެވެ.

އަމީރު މިފަދައިން ވިދާޅުވީ މި ފަހަރުގެ ބަޖެޓް ފާސްވާއިރުގައިވެސް ޤާނޫނުގައި އޮތް ގޮތަށް ބްލޮކް ގްރާންޓުގެ ގޮތުގައި ފަސް އިންސައްތަ ކައުންސިލްތަކަށް ލިބޭނެކަމުގައި ރައީސް ވިދާޅުވުމާއި ގުޅިގެންނެވެ. ރައީސް ވިދާޅުވެފައިވަނީ ކައުންސިލްތަކަށްލިބޭ އާމްދަނީ އިތުރުކުރުމަށް ކައުންސިލްތަކަށް ފަޅުރަށްތައް ލިބޭނެ މަގުފަހިކޮށްދެއްވުމާއި، ލޯކަލް ޓޫރިޒަމްގެ ތެރެއިން ލިބޭ ޓެކްސްގެ ވަކި އިންސައްތައެއް ކައުންސިލްތަކަށް ޖަމާކޮށްދިނުމަށް ނިންމާމަވާފައިވާކަން އެމަނިކުފާނު ފާހަގަކުރެއްވިއެވެ.

މި މޭރުމުން ވާހަކަފުޅު ކުރިއަށްގެންދަވަމުން ރައީސް ވަނީ ބްލޮކް ގްރާންޓުގެ 5 އިންސައްތައިގެ އިތުރަށް ލޯކަލް ޓޫރިޒަމްގެ ތެރެއިން ލިބޭ ޓެކްސްގެ ވަކި އިންސައްތައެއް ކައުންސިލުތަކަށް ލިބޭގޮތް ހެދުމަށް ޤާނޫނަށް އިސްލާހުގެނައުމަށް ފޮނުއްވާނެކަމުގައި ވިދާޅުވެފައެވެ.

އަންނަ އަހަރުގެ ބަޖެޓަކީ 56,647,600,859 (ފަންސާސް ހަ ބިލިޔަން، ހަސަތޭކަ ސާޅީސް ހަތް މިލިޔަން، ހަ ލައްކަ، އަށްސަތޭކަ ފަންސާސް ނުވަ) ރުފިޔާއެވެ. ބަޖެޓް ހުށަހަޅުއްވަމުން ފިނޭންސް މިނިސްޓަރު ޒަމީރު ވިދާޅުވީ ހަރަދުގެ ގޮތުގައި ހިނގާނީ 49.2 ބިލިޔަން ރުފިޔާއެވެ. އޭގެތެރޭގައި ހިމެނެނީ ރިކަރަންޓް ހަރަދުގެ ގޮތުގައި 35.9 ބިލިޔަން ރުފިޔާއާއި ކެޕިޓަލް ހަރަދުގެ ގޮތުގައި 13.3 ބިލިޔަން ރުފިޔާއެވެ. ބަޖެޓުގައި ދައުލަތުގެ އާމްދަނީގެ ގޮތުގައި ލަފާކޮށްފައި ވަނީ 34,955,459,058 (34 ބިލިއަން) ރުފިޔާއެވެ.

2025 ވަނަ އަހަރުގެ ބަޖެޓުގައި ކައުންސިލްތަކަށް ދިނުމަށް ޖަހާފައި 1,447,316,071 (1.4 ބިލިއަން) ރުފިޔާއެވެ. ނަމަވެސް އާމްދަނީގެ 5 އިންސައްތައަކީ 1،747،772،952 (1.7 ބިލިއަން) ރުފިޔާއެވެ.

ކައުންސިލް ބްލޮކް ގްރާންޓާއި ގުޅޭގޮތުން ރައީސް ދެއްކެވި ވާހަކަފުޅާއި ގުޅިގެން އަމީރު އެކްސްގައި ކުރެއްވި ޕޯސްޓުގައި ވިދާޅުވީ ކޮންމެ ކަމެއް އުނބަށްޖެހީމަ ސިޔާސީ ގޮތުން ހަޖޫޖަހަން ފުރުސަތު ލިބުނަސް، އެއީ ވަރަށް ހައިރާންވާންޖެހޭ ކަމެއް ކަމަށެވެ. އަދި ދައުލަތުގެ ބަޖެޓު މަޖިލީހަށް ފޮނުވާއިރު ބަޖެޓުގައި އޮތް އެއްޗެއް ރައީސަށް ނޭގުމަކީ ކަންބޮޑުވާންޖެހޭ ކަމެއް ކަމަށް އަމީރު ވިދާޅުވިއެވެ.

އަމީރު ވިދާޅުވީ ލާމަރުކަޒީ ޤާނޫނާއި ޚިލާފަށް، ލާމަރުކަޒީ ޤާނޫނު ފުނޑާލަން، ކައުންސިލްތަކުގެ ބަޖެޓް ކުޑަކޮށް މަޖްލިސްއަށް ފޮނުވިއިރު، އޭގައި އޮތް އެއްޗެއް ނޭގުމަކީ ދެރަކަމެއް ކަމަށެވެ. މި ދިޔަ އެއް އަހަރު ތެރޭގައި ސަރުކާރުން އިއުލާންކުރި ގިނަ ކަންތައްތައް ފަހުން ބަދަލުކުރަން ޖެހުމުން ދޭހަކޮށްދެނީ ބޮޑެތި ކަންތައްތައް ނިންމާއިރު ރަނގަޅަށް ބަހުސް ނުކުރެވޭ ކަން ކަމަށާއި، ނިންމާ ނިންމުންތަކުަން ރައްޔިތުންނަށް ކުރާނެ އަސަރެއް ދިރާސާކުރެވި ދެނެގެނެވިފައި ނުވާކަން ކަމަށެވެ. އަދި އަބަދު އާ ރަށުގައި މަޖާކުރަން އުޅުއްވުމުން ގިނަ ކަންކަން އަތުން ދޫވެގެންދާ ތަން ފެންނަމުންދާކަން އަމީރު ވިދާޅުވިއެވެ.