މާލީ ކަންކަން މެނޭޖްކުރުމުގެ ޤާބިލްކަން މި ސަރުކާރުގެ ކިބައިން ނު ފެންނަކަމަށް އޭނާ ވިދާޅުވި
އެމްޑީޕީގެ ކުރީގެ ރައީސް ޑރ.ޑީޑީ
އަހަރެއް ވެގެންދާ އިރު ކުރީ ސަރުކާރުން ނުނެއްޓުނު ބަޔަކު ދެން އެ ވާހަކައިން ވެރިކަން ނިމެންދެން ވެސް ނު ނެއްޓޭނެ ކަމަށް އެމްޑީޕީގެ ކުރީގެ ރައީސް ޑރ.އިބްރާހިމް ޑީޑީ ވިދާޅުވެއްޖެއެވެ.
ޑީޑީ އެފަދައިން ވިދާޅުވީ ރާއްޖެޓީވީގެ ފަލަސުރުޚީ ޕްރޮގްރާމްގައި ވާހަކަދައްކަވަމުންނެވެ. ދައުރު ނިމިގެންދާ އިރުވެސް އެއްވެސް މަޝްރޫޢު އެއް ކުރީ ސަރުކާރުގެ ބޮލުގައި ޒިންމާތަކެއް، އިލްޒާމްތަކެއް ނާޅުވާ ކުރިއަށް ގެންދެވޭނެ ކަަމަށް ޤަބޫލު ނުކުރެވޭ ކަމަށް އޭނާ ވިދާޅުވިއެވެ. އަހަރެއްވެގެން ދާއިރު ސަރުކާރާއި މެދު ސަރުކާރަށް އެއްވެސް ޒިންމާ އެއް ނުނެގޭ ކަމަށް އޭނާ ވަނީ ވިދާޅުވެފައެވެ. މާލީ ކަންކަން މެނޭޖްކުރުމުގެ ޤާބިލްކަން މި ސަރުކާރުގެ ކިބައިން ނު ފެންނަކަމަށް އޭނާ ވިދާޅުވިއެވެ.
އަދި ސަރުކާރަށް ފާޑުކިޔަން އަވަސް ކަމަށް ސަރުކާރަށް ތާއީދުކުރާ މީހުން ފާހަގަކުރާތީ އެކަމަށް ވެސް ޑީޑީ ވަނީ ފާޑު ވިދާޅުވެފައެވެ. މާލީ ހިސާބުތައް ހާމަ ނުކޮށް ސަރުކާރުން އުޅެނީ ރައްޔިތުންނަށް އޮޅުވާލަން ކަމަށާއި ސަރުކާރުގެ އެއްވެސް އިޚުލާސްތެރިކަމެއް ހުރި މަންޒަރު ނުފެންނަ ކަމަށް އޭނާ ވިދާޅުވިއެވެ.
މީގެ އިތުރުން ޗާގޮސް އާއި މެދު ސަރުކާރުން ދެއްކި ވާހަކަތަކާއި އިންޑިއާ އައުޓް ފަދަ ވާހަކަތަކަށް ބެލިޔަސް ފެންނަނީ ރައްޔިތުންނަށް އޮޅުވާލުމާއި ހީލަތްތެރިކަމުގެ މަންޒަރު ކަމަށް އޭނާ ވިދާޅުވިއެެވެ. ބަޖެޓް ހުސްވެގެންދާ ކަމަށް ބުނާ އިރު ސަރުކާރަށް އިތުރު އެއްވެސް ޕްރޮޖެކްޓެއް ކުރިއަށް ނުގެންދެވުނުތަނުގައި ކުރިން ހިނގަމުން އައި ޕްރޮޖެކްޓްތައް ވެސް ސަރުކާރަށް ކުރިއަށް ނުގެންދެވޭ ކަމަށް ޑީޑީ ވަނީ ވިދާޅުވެފައެވެ. އެކަމާއި ރައްޔިތުން އިންތިހާ އަށް ކަންބޮޑުވާ ކަމަށް އޭނާ ވިދާޅުވިއެވެ. ކުޑަ މިނުން ކުރީ ސަރުކާރުން ދިން ގޯއްޗާއި ފްލެޓްވެސް ނުދީ ހިފަހައްޓާ އާއްމު ރައްޔިތުންނަށް އެތައް ތަކުލީފުތަކެއް ސަރުކާރުން ވަނީ ކުރިމަތިކުރުވާފައި ކަމަށް އޭނާ ވަނީ ވިދާޅުވެފައެވެ.
