2024 ވަނަ އަހަރުގެ ބަޖެޓާ ގުޅޭ ގޮތުން ރައީސުލްޖުމްހޫރިއްޔާ ޑރ މުޙައްމަދު މުއިއްޒު ބޮޑު އިތުރުފުޅެއް ހައްދަވައިފިއެވެ.
ރައީސް މުއިއްޒު އއ. އަތޮޅަށާއި ކ. އަތޮޅުގެ ބައެއް ރަށްތަކަށް ކުރައްވާ ދަތުރުފުޅުގެ ތެރެއިން، އާދިއްތަ ދުވަހު އއ. ތޮއްޑޫއަށް ވަޑައިގެން ދެއްކެވި ވާހަކަފުޅުގައި 19 ވަނަ މަޖިލީހުން ފާސްކޮށްފައިވާ 2024 ވަނަ އަހަރުގެ ބަޖެޓާ ގުޅޭ ގޮތުން ހަގީގަތް އޮޅޭގޮތަށް ވަނީ ވާހަކަފުޅު ދައްކަވާފައެވެ.
އެގޮތުން އެމަނިކުފާނު ވިދާޅުވީ، 2024 ވަނަ އަހަރު ކަންކަން ނުކުރެވި ދިއައީ، ތަންފީޒުކުރަން ޖެހުނީ މި ސަރުކާރުން ފާސްކޮށް ނިންމި ބަޖެޓަކަށް ނުވާތީ ކަމަށެވެ.
"ސަރުކާރުން ފާސްކޮށް ނިންމި ބަޖެޓެއް ނޫން ތަންފީޒުކޮށް ނިންމަން މިޖެހުނީ. މިއަހަރު މިމަހާ އެކީގައި ވެސް މިދިއަ ސަރުކާރުގެ ފިނޭންސް މިނިސްޓަރ، މިދިއަ ސަރުކާރުގެ މެޖޯރިޓީ އޮތް މަޖިލީހަކަށް ހުށަހަޅައިގެން އޭރު އަޅުގަނޑުމެން ޓްރާންސިޝަނަލް ޕީރިއަޑްގައި ހުށަހެޅިކަންކަމަށް އެއްވެސް ވަރަކަށް ރިއާޔަތް ނުކޮށް ފާސްކޮށްފައި އޮތް ބަޖެޓެއް. އެއްވެސް ވަރަކަށް މަސައްކަތެއް ކުރިއަށް ނުގެންދެވޭ ގޮތަށް ފާސްކޮށްފައިވާ ބަޖެޓެއް. އެ ހަގީގަތް ބަދަލެއް ނުވޭ، ޕީއެންސީއަށް މެޖޯރިޓީ އޮތް މަޖިލީހެއް ހޮވި ނަމަވެސް ބަޖެޓުގެ މަރުހަލާ މިނިމެނީ މިއަހަރުގެ ނިޔަލަށް" ރައީސް މުއިއްޒު ވިދާޅުވިއެވެ.
ރައީސް މުއިއްޒުގެ މިވާހަކަފުޅުތައް ދޮގު ކުރައްވާ ކުރީގެ ފިނޭންސް މިނިސްޓަރ އިބްރާހިމް އަމީރު ވިދާޅުވީ، "ތިއީ ކަނޑައެޅިގެން ދޮގެއް" ކަަމަށެވެ. އަމީރު ވިދާޅުވީ، ޓްރާންސިޝަން މުއްދަތުގައި ހުށަހެޅުނު ސަޕްލެމެންޓަރީ ބަޖެޓް ވެސް އަދި 2024 ވަނަ އަހަރުގެ ބަޖެޓް ވެސް ހުށަހެޅީ ޓްރާންސިޝަން ކޮމިޓީގެ މަޝްވަރާއެކު ކަމަށެވެ.
"2024 ވަނަ އަހަރަށް ހުށަހެޅުނު ބަޖެޓްގައި ތި ބޭފުޅުން ފޮނުވި ލިސްޓް އޮތް ގޮތަށް ބަޖެޓްގައި ހިމެނިފައިވާނެ. އެހެން ނޫނަސް ބަޖެޓު އޮތް ގޮތުން ކަންތައް ނުވިޔޭ، ވިދާޅުވާއިރު މި ހާލަތަށް އައީވެސް ސީދާ ބަޖެޓްގައި ނުވެސް ހިމެނޭ އާ ކަންތައްތަކެއް ކުރުމުގެ ސަބަބުން. ބަޖެޓް ޕްލޭނާއި އެއްގޮތަށް ގެންދިޔަ ނަމަ އިޤްތިސާދީ ހަރަކާތްތައް ނުހުއްޓި ކުރިޔަށް ދާނެ. އަމިއްލަ ފަރުދުންނާއި ކުންފުނިތައް ބަނގުރޫޓް ނުވީސް" ރައީސް މުއިއްޒުގެ ވާހަކަފުޅުތަކަށް ރައްދުދެއްވާ އަމީރު އެކްސްގައި ލިޔުއްވާފައިވެއެވެ.
މީގެ އިތުރުން ބަޖެޓްގައި ނުހިމަނާ ރައީސް މުއިއްޒު ސަރުކާރުން ކުރި ބައެއް ކަންކަން ފާހަގަ ކުރައްވާ އަމީރު ވަނީ މި ކަންތައްތަކަކީ ބަޖެޓްގެ ކޮންތާކު ހިމަނައިގެން ކުރެއްވި ކަންތައްތަކެއްތޯ ސުވާލުކުރައްވާފައެވެ. އެގޮތުން ފުށިދިއްގަރު ފަޅު ހިއްކަން އެތައް ސަތޭކަ މިލިއަން ޚަރަދުކުރި ކަމަށާއި، 37 މިލިއަން ޑޮލަރު ހޭދަކޮށްގެން ތުރުކީން ގެނައި ޑްރޯންގެ ވާހަކަ ފާހަގަކުރައްވާ ފައިވެއެވެ. އަދި މިދިޔަ އަހަރާއި އަޅާބަލާއިރު މިއަހަރުގެ މިހާތަނަށް ހަމައެކަނި މުސާރަޔަށް 1.425 ބިލިއަން ރުފިޔާ އިތުރަށް ޚަރަދުކޮށްފައިވާ ކަމަށް އަމީރު ވިދާޅުވިއެވެ.
"މީގެ އިތުރުންވެސް އެބަހުރި ބަޖެޓްގައި ނުހިމެނޭ އެތައްކަމެއް ކޮށްފައި. ދެން ރަށްރަށުގައި ޕްރޮޖެކްޓް ނުހިނގާތީ ސުވާލުކުރީމަ ކުރީ ސަރުކާރު، ކުރީ ސަރުކާރު ކިޔުން ހުއްޓަން ވެއްޖެއެއްނު! ރައްޔިތަކަށް ކަމެއްކޮށްދޭންވީމަ ކުރީ ސަރުކާރު ބަޖެޓާއި ހެދި ކަމެއް ނުވޭ. އެކަމަކު ކޮށްފަ ހުރީ ބަޖެޓްގައި ނުވެސް ނެތް ކަންތައްތައް. އޭގެއިން އަރައިނުގަނެވިގެން މިހާރު މި އުޅެންޖެހެނީ! ތިބޭފުޅުންނަށް މިއަހަރު ނުވި ކަމެއް ކުރިޔަށް އޮތް 4 އަހަރުވެސް ނުވާނެ. ސަރުކާރު ބަދަލުވެ އާ ބޭފުޅަކު ބަޖެޓް ހުށަހެޅީމަ ޕްރޮޖެކްޓްތައް ކުއްލިޔަކަށް ހިނގަން ނުފަށާނެ" އަމީރު ވިދާޅުވިއެވެ.
އަމީރު ވިދާޅުވީ، ކަންތައްތައް ކުރާނެ ވިސްނުމެއްވެސް، ޤާބިލްކަމެއްވެސް އަދި އެ އިޚްލާސްތެރިކަމެއްވެސް މި ސަރުކާރުގައި ނެތް ކަމަށެވެ.
ތޮއްޑޫގައި ވާހަކަފުޅުދައްކަވަމުން ރައީސް މުއިއްޒު ވިދާޅުވީ ސިޔާސީ ވިސްނުމުގަައި އެއްވެސް މަސައްކަތެއް ނުކުރެވޭ ގޮތަށް 2024 ވަނަ އަހަރުގެ ބަޖެޓް ފާސްކޮށްފައިވާ ކަމަށެވެ. ނަމަވެސް މިހާރު އޮތް ބަޖެޓަކީ ރައްޔިތުންނަށް ކަންތައް ކޮށްދެވޭގޮތަށް އަންނަ އަހަރު މަޝްރޫއުތައް ކުރިއަށް ގެންދިޔުމަށް ފާސްކޮށްފައިވާ ބަޖެޓެއް ކަމަށެވެ.
2025 ވާނީ ރިޔާސީ އިންތިހާބުގައި ރަށްރަށަަށް ގޮސްވީ ވައުދުތައް ފުއްދައިދޭ އަހަރަކަމަށް ކަމަށް އެމަނިކުފާނު ވިދާޅުވިއެވެ.
