ޖިބްރޯލްޓާ، ސްޕޭނުގެ ތަނަކަށް ހެދުމުން ރޮޑްރީ އާއި މޮރާޓާ އަށް ފިޔަވަޅު އަޅަނީ

އިބޭރިއަން ޕެނިންސިއުލާގައިވާ ޖިބްރޯލްޓާ އަކީ ސްޕޭނުގެ ތަނެއް ކަމަށް ބުނުމުން ސްޕޭނުގެ ދެ ކުޅުންތެރިން ކަމަށްވާ ކެޕްޓަން އަލްވާރޯ މޮރާޓާ އާއި ވައިސް ކެޕްޓަން ރޮޑްރީ ފިޔަވަޅު އެޅުމާ ދިމާލަށް ޔޫއޭފާއިން މިސްރާބު ހިފައިފި އެވެ.

މި ދެ ކުޅުންތެރިންގެ މައްސަލަ ޔޫރަޕުގެ ފުޓްބޯޅައިގެ އެންމެ އިސް އިދާރާ އަށް ހުށަހެޅީ ޖިބްރޯލްޓާގެ ފުޓްބޯޅަ އެސޯސިއޭޝަނުންނެވެ. ޔޫރަޕުގެ ޗެމްޕިއަންކަން ހޯދުމަށްފަހު އުފާފާޅު ކުރަން ބޭއްވި ޕެރޭޑުގައި ރޮޑްރީ އާއި މޮރާޓާ ވަނީ ޖިބްރޯލްޓާ އަކީ ސްޕޭނުގެ ތަނެއް ކަމަށް ބުނެ ލަފަކިޔާފަ އެވެ.

ޖިބްރޯލްޓާ އަކީ ސްޕޭނާ އިންވެގެން އޮތް ތަނަކަސް އެމީހުން ބޭނުންވަނީ ސްޕޭނުގެ ސަރުކާރުގެ ދަށަށް ނުގޮސް މިނިވަންވާށެވެ. މިވަގުތު ޖިބްރޯލްޓާ އަކީ އިނގިރޭސިންގެ ބެލުމުގެ ދަށުގައި، އެކަމަކު ވަކި ސަރުކާރެއް ހިންގާ ތަނެކެވެ.

ތަޖުރިބާކާރުން ބުނަނީ މި މައްސަލާގައި ރޮޑްރީ އާއި މޮރާޓާ އަށް ދެ މެޗުގެ ސަސްޕެންޝަނެއް އައުން ގާތް ކަމަށެވެ.

ޔޫރޯ ކާމިޔާބު ކުރުމަށްފަހު ސްޕޭނުގެ ކުޅުންތެރިން އުފާފާޅު ކުރުމަށް ބޭއްވި ރަސްމީ ހަރަކާތްތައް ނިމުމާއެކު އެ ގައުމުގެ ފުޓްބޯޅަ ފެޑަރޭޝަނުގެ ރައީސް ވެސް ވަނީ ސަސްޕެންޑްކޮށްފަ އެވެ. އެއީ އޭނާގެ މައްޗަށް ތުހުމަތުކުރެވޭ ކޮރަޕްޝަނުގެ މައްސަލަތަކާހެދި އެވެ.