ރޮޑްރީގޯގެ ދެ ލަނޑުން ރެއާލް މެޑްރިޑް ކޮޕަ ޑެލް ރޭ ކާމިޔާބުކޮށްފި!
ފައިނަލް މެޗު ރެއާލް ކާމިޔާބުކުރީ 2-1 ން
ސްޕެނިޝް ކަޕްގެ ތައްޓާއެކު ރެއާލްގެ ކުޅުންތެރިން
2014 ވަނަ އަހަރުގެ ފަހުން ރެއާލް މެޑްރިޑުން ފުރަތަމަ ފަހަރަށް ކޮޕަ ޑެލް ރޭ ކާމިޔާބުކޮށްފިއެވެ.
ރެއާލް މެޑްރިޑް ޗެމްޕިއަންކަން ހޯދީ ފައިނަލްގައި 2-1 ން އޮސަސޫނާ ބަލިކޮށްގެންނެވެ. ފައިނަލް މެޗުގައި ރެއާލް މެޑްރިޑްގެ ދެ ލަނޑުވެސް ޖެހީ ބްރެޒިލްގެ ޒުވާން ފޯވާޑް ރޮޑްރީގޯއެވެ. ފުރަތަމަ ލަނޑު މެޗު ފަށައިގެން ދެވަނަ މިނެޓުގައި ޖެހީ އެކުގައި ޤައުމީ ޓީމަށްވެސް ކުޅޭ ވިނީޝިއުސް ޖޫނިއަރ ތަނަވަސްކޮށްދިން ފުރުޞަތަކުންނެވެ. މިއީ މިދިޔަ 17 އަހަރުގެ ތެރޭގައި ސްޕެނިޝް ކަޕްގައި ފެނުނު އެންމެ އަވަސް ގޯލެވެ. ރޮޑްރީގޯ ލަނު ޖެހީ 106 ވަނަ ސިކުންތުގައެވެ. ކުރިން ލީޑް ހޯދުނަސް މެޗުގެ ފުރަތަމަ ހާފްގައި ރެއާލްއަށް އިތުރު ލަނޑެއް ނުޖެހުނެވެ. ބަދަލުގައި ފެނުނީ ދެވަނަ ހާފްގެ ކުރީކޮޅު އޮސަސޫނާއިން ނަތީޖާ ހަމަހަމަކުރި ތަނެވެ. ނަތީޖާ ހަމަހަމަކޮށްދިނީ 58 ވަނަ މިނެޓުގައި ޓޯރޯއެވެ. ރޮޑްރީގޯ ދެވަނަ ފަހަރަށް ކުރި ހޯދައިދިނީ 70 ވަނަ މިނެޓުގައެވެ.
މިއީ އޮސަސޫނާއިން މިމުބާރާތުގެ ފައިނަލްގައި ކުޅުނު ދެވަނަ ފަހަރެވެ. މި ކާމިޔާބީއަށްފަހު ރެއާލްއަށް ކުރިއަށް އޮތީ ޗެމްޕިއަންސް ލީގު ސެމީފައިނަލްއެވެ. ސެމީފައިނަލްގައި ވާދަކުރަން ޖެހެނީ މެންޗެސްޓަރ ސިޓީއާއެވެ.
