21 އަހަރަށް ފަހު ސެރީ އޭ އަށް ޕްރޮމޯޓްވި ކޯމޯގެ ހެޑް ކޯޗުކަމަށް ސްޕެއިންގެ ކުރީގެ މިޑްފީލްޑަރ ސެސް ފެބްރިގާޒް ހަމަޖައްސައިފި އެވެ.

އިޓަލީގެ ދެވަނަ ޑިވިޝަންގައި ކޯމޯ އަށް ކުޅެ, އެޓީމްގެ ވަގުތީ ކޯޗެއްގެ ގޮތުންވެސް ފަހުން މަސައްކަތް ކުރި ފެބްރިގާޒް ކްލަބްގެ ކޯޗުކަމަށް ހަމަޖެއްސިކަން ކްލަބުން ވަނީ އިއުލާނުކޮށްފައެވެ. އެކްލަބުން ފެބްރިޒާގް 4 އަހަރުގެ އެއްބަސްވުމެއް ވަނީ ދީފައެވެ މިއީ މަތީ ޑިވިޝަންގެ ހެޑް ކޯޗެއްގެ ގޮތުގައި ފެބްރިގާޒް މަސައްކަތް ކުރާ ފުރަތަމަ ފަހަރެވެ. 37 އަހަރުގެ ފެބްރިގާޒް ބުނީ ހެޑް ކޯޗެއްގެ ގޮތުގައި ސީޒަން ފަށަން ލިބުމަކީ ބޮޑު އުފަލެއް ކަމަށެވެ. އޭނާއަށް އިތުބާރުކޮށް ފުރުޞަތު ދިނީތީ ކްލަބްގެ މެނޭޖްމަންޓަށް ވަނީ ޝުކުރު އަދާކޮށްފައެވެ. ކުރިމަތީގައި އޮތް އުނދަގޫ ޗެލެންޖިންގ މަސައްކަތާ ކުރިމަތިލާން އޭނާއާ ކޯޗިންގ ތީމް ތައްޔާރަށް އޮތް ކަމަށްވެސް ފެބްރިގާޒް ބުންޏެވެ.

ކުރިން ޗެލްސީއާއި އާސެނަލް އަދި ބާސެލޯނާއަށް ކުޅުނު މިޑްފީލްޑަރ ކެރިއަރު ނިންމާލީ ކޯމޯގައެވެ. އޭނާ އަކީ 2010 ވަނަ އަހަރު ވަރލްޑްކަޕް ހޯދި ސްޕެއިން ޓީމްގެ ކުޅުންތެރިއެކެވެ. ފެބްރިގާޒްގެ އިރުޝާދުގެ ދަށުން ކޯމޯ އަށް ފުރަތަމަ އޮތީ އަންނަ މަހު 19 ވަނަ ދުވަހު ޔުވެންޓަސްއާ ދެކޮޅަށް ކުޅޭ މެޗެވެ.