ބުޅާ ފެސިލިޓީގެ %70 މަސައްކަތް ނިމިފައިވާ ކަމަށައި ޓެކްނިކަލް ގޮންޖެހުންތައް އެބަ ހުރި ކަމަށް މާލޭގެ މޭޔަރ އާދަމް އާޒިމް ވިދާޅުވެއްޖެއެވެ.

އާޒިމް އެފަދައިން ވިދާޅުވީ ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުންނެވެ.

މާލެސިޓީގެ މަގުތަކުގައި އުޅޭ ބުޅާތައް އަންނަ މަހު ޝެލްޓަރއަށް ބަދަލުކުރަން ފަށާނެ ކަމަށް މާލެ ސިޓީ ކައުންސިލުން ވަނީ ލަފާކޮށްފައެވެ. އެ މަސައްކަތް އަވަސްކުރުމަށް ކުރެވެން ހުރި ހުރިހާ ކަމެއް ކުރަމުންދާ ކަމަށް އާޒިމް ވަނީ ވިދާޅުވެފައެވެ. އެގޮތުން ބުޅާތައް މަގުމަތީގައި އުޅޭ މައްސަލަ ހައްލުކުރުމަށް 2000 އަކަފޫޓޫގެ އިތުރު 3 ކޮމްޕާޓްމެންޓް ހެދުމުގެ މަސައްކަތް ކުރަމުންދާ ކަމަށާއި އެ މަސައްކަތް ކުރަމުން ދަނީ ބުޅަލުގެ ހައްގުގައި ވަކާލާތުކުރާ ޖަމިއްޔާތަކާއި އެކު ވާހަކަދައްކަގެން ކަމަށް ވެސް އާޒިމް ވިދާޅުވިއެވެ. މިއީ ހައްލުކުރަން ޖެހޭ މުހިންމު މައްސަލައެއްކަން އާޒިމް ވަނީ ފާހަގަކުރައްވާފައެވެ.

މި ފެސިލިޓީއަކީ މާލެ ސަރަހައްދުގެ ޕާކުތަކާއި މަގުމަތީގައާއި އަދި މި ނޫންވެސް އާންމުން އެއްވެ އުޅޭ ސަރަހައްދުތަކުގައި ބުޅާ ގިނަވާ މައްސަލަ އަށް ހައްލު ހޯދުމަށް އަޅާ ފެސިލިޓީއެކެވެ. މި ފެސިލިޓީގެ ސަަބަބުން ބުޅާތަކަށް ލިބެމުންދާ އަނިޔާތަކާއި އަދި ތަފާތު ބަލިތައް ޖެހުމުން ސަލާމަތްވެގެންދާނެ ކަމަށް އުންމީދުކުރެވެއެވެ. މީގެ އިތުރުން މިއީ ބުޅާތައް ދިރިއުޅޭނެ ރައްކާތެރި މާހައުލެއް ގާއިމުކުރުމަށާއި އާންމު ތަންތަނުގައި ބުޅާ ގިނަވުމުގެ ސަބަބުން ފެތުރިދާނެ ބަލިތަކުން އާންމު ސިއްހަތު ރައްކާތެރި ކުރުމުގެ ބޭނުމުގައި ގާއިމުކުރާ ފެސިލިޓީއެކެވެ.

މި ފެސިލިޓީގައި ބުޅާތައް ކަރަންޓީނު ކުރެވޭ ސަރަހައްދަކާއި، ކްލިނިކަކާއި، ފާމަސީއާއި، ލެބޯޓްރީ އަދި ހިޔާވަހިކަމާއި، އެކަށީގެންވާ ސިއްހީ ފަރުވާ އަދި ކުޅޭ ސަރަހައްދު ފަދަ ތަފާތު ޚިދުމަތްތައް އެއްފުރާޅެއްގެ ދަށުން ލިބިގެންދާނެއެވެ.

މީގެ އިތުރުން ގޭގައި ގެންގުޅޭ ބުޅާތަކަށްވެސް ފެންވަރު ރަނގަޅު ސިއްހީ ފަރުވާ މި ފެސިލިޓީން ލިބިގެންދާނެއެވެ. އަދި މި ފެސިލިޓީ ގާއިމުކުރުމުން މާލެ ސަރަހައްދުގައި ބުޅާތައް ގިނަވެފައި ވުމުން ކުރިމަތިވާ މައްސަލަތަކަށް ދާއިމީ ހައްލެއް ލިބިގެންދާނެއެވެ.