ރަޝިޔާ އާއި ޔޫކްރެއިން އާ ދެމެދު ހަނގުރާމައިގެ ކުށްވެރިން ބަދަލު ކޮށްފި

ކުށްވެރިން ދެ ގައުމުގެ ދެމެދުގައި ބަދަލު ކުރިކަން މޮސްކޯ އިން ވެސް އަދި ކިއެވް އިން ވެސް ވަނީ ބުދަ ދުވަހު މީޑިއާ އަށް ކަށަވަރު ކޮށްދީފައެވެ.

2022 ވަނަ އަހަރުގެ ފެބްރުއަރީގައި ރަޝިޔާ ޔޫކްރެއިން ހަނގުރާމަ ފެށުނު ފަހުން މިހާތަނަށް 50 ފަހަރުގެ މަތި އެތައް ހާސް ހަނގުރާމައިގެ ކުށްވެރިން ދެ ގައުމުގެ ދެމެދުގައި ވަނީ ބަދަލު ކޮށްފައެވެ.

މި ބުރުގައި ކޮންމެ ގައުމަކުން އަނެއް ގައުމަށް ނިސްބަތްވާ 95 އަސީރުން ވަނީ މިނިވަން ކޮށްފައެވެ.

ޔޫކްރެއިންގެ ރައީސް ވުލެޑިމިއަރ ޒެލެންސްކީ ވިދާޅުވީ ދެ ގައުމުގެ ދެމެދުގައި ކުށްވެރިން ބަދަލު ކުރުމުގެ މަގު ތަނަވަސްވީ ޔުނައިޓެޑް އެރަބް އެމިރޭޓްސް އިން މެދުވެރިއެއްގެ ރޯލު އަދާކޮށް ދެ ގައުމުގެ ދެމެދުގައި ކުރެވުނު މަޝްވަރާ ތަކުން ކަމުގައެވެ.

ޖޫން މަހު ރަޝިޔާގެ ރައީސް ވުލެޑިމިއަރ ޕުޓިން ވިދާޅުވެފައިވަނީ، ޔޫކްރެއިންގެ 6،465 އަސީރުން ރަޝިޔާ އިން ހައްޔަރުކޮށްފައިވާ ކަމަށާއި އަދި ޔޫކްރެއިން ރަޝިޔާގެ 1،348 ސިފައިން ހައްޔަރު ކޮށްފައިވާ ކަމަށެވެ.

ހަނގުރާމަ އާ ގުޅިގެން ދެ ގައުމުގެ އޮފިޝަލުން ބައްދަލުވެ މަޝްވަރާ ކުރެވޭ މަދު ހާލަތުގެ ތެރޭގައި ކުށްވެރި ބަދަލު ކުރުމުގެ މަޝްވަރާތައް ހިމެނެއެވެ.

ކުށްވެރިން ބަދަލު ކުރުމުގެ ވާހަކަ ތަކުގައި ކޮންމެ ގައުމަކުންވެސް ބައިވެރިވަނީ އެ ގައުމެއްގެ ހިއުމަން ރައިޓްސް ކޮމިޝަނެވެ.