އާންމު ކޮމިޓީގެ ބައްދަލުވުމުގައި މި ގޮތަށް ފާސްކުރީ ސަރުކާރުގެ މެންބަރުންގެ އަގުލަބިއްޔަތުން
20 ވަނަ މަޖިލީހުގެ މެމްބަރުން
ރައްޔިތުންގެ މަޖިލިސް މެންބަރުންގެ އިތުރުން އެބޭފުޅުންނާ އެކު ފުރާ ހުރިހާ އެންމެންނަށް ވެސް ވެލާނާ އިންޓަނޭޝަނަލް އެއާޕޯޓު (ވީއައިއޭ)ގެ ވީއައިޕީ ލައުންޖުން ޚިދުމަތްދޭން ކޮމެޓީން ފާސްކުރުމަށްފަހު އަނެއްކާ ވެސް އެ އުސޫލު ބޭރުކޮށްލައިފިއެވެ.
މަޖިލިސް މެންބަރުންނަށް ވީއައިޕީ ލައުންޖުން ޚިދުމަތްދޭ އުސޫލަށް ބަދަލު ގެންނަން ކޮމިޓީއަށް ހުށަހެޅުއްވީ ފޭދޫ ދެކުނު ދާއިރާގެ މެމްބަރު އިބްރާހިމް ދީދީ އެވެ. ބުދަ ދުވަހު މެންދުރު ބޭއްވި މަޖިލީހުގެ 7 ވަނަ އާންމު ކޮމިޓީގެ ބައްދަލުވުމުގައި ފުރަތަމަ ސަރުކާރު މެންބަރުންގެ އަގުލަބިއްޔަތުން ފާސްކުރީ މެންބަރުންނާއެކު ފުރާ ހުރިހާ އެންމެނަކަށް ވީއައިޕީ ލައުންޖުން ޚިދުމަތްދޭ ގޮތަށެވެ.
މި ނިންމުމާ ގުޅޭގޮތުން މެންބަރު އިބްރާހިމް ދީދީ ވިދާޅުވީ ވީއައިޕީ ލައުންޖު ބޭނުންކުރުމާ ގުޅޭގޮތުން 19 ވަނަ މަޖިލީހުން ފާސް ކޮށްފައި އޮތް އުސޫލު އޮތީ ޕާކުކޮށްފައި ކަމަށާއި، އެއުސޫލު ބޭރުކޮށްލުމަށްފަހު 18 ވަނަ މަޖިލީހުގައި އަމަލުކުރަމުން އައި އުސޫލަށް އަމަލުކުރަންޖެހޭ ކަމަށެވެ.
ނަމަވެސް ބުދަ ދުވަހުގެ ރޭ ބޭއްވި އާންމު ކޮމިޓީގެ ބައްދަލުވުމުގައި މި އުސޫލު ވަނީ ބޭރުކޮށްލާފައެވެ. މި ބައްދަލުވުމުގައި މި ނިންމި ނިންމުން މުރާޖައާކޮށް މަޖިލީހުގެ މެންބަރުންނާއި މެންބަރުންގެ އާއިލާއަށް އެކަނި އެ ޚިދުމަތް ލިބޭގޮތަށް ބޭއްވުމަށް ވަނީ ނިންމާފައެވެ.
މެންބަރުންނާއެކު ފުރާ ހުރިހާ އެންމެނަކަށް ވީއައިޕީ ލައުންޖުން ޚިދުމަތްދޭ ގޮތަށް ފުރަތަމަ ފާސްކުރުމާއި ގުޅިގެން ކަނޑިތީމު ދާއިރާގެ މެންބަރު އަމީން ފައިސަލް ވިދާޅުވީ މިނިންމުން ނިންމުމުގައި އެމްޑީޕީގެ ބައިވެރިވުމެއް ނޯންނާނެ ކަމަށާއި، މިނިންމުން ނިންމާފައިވަނީ އެމްޑީޕީގެ ތާއީދާއި ވޯޓާ ނުލައި ކަމަށެވެ. މިއީ ކުރަންހެޔޮވާވަރުގެ ކަމެއްނޫންކަން ފާހަގަކޮށްފައިވާ ކަމަށް މެންބަރު ފައިސަލް ވިދާޅުވިއެވެ.
މިއުސޫލަކީ މީގެ ކުރިން ވެސް އާއްމު ރައްޔިތުންގެ ފާޑުކިޔުންތައް ވަރަށް ބޮޑަށް އަމާޒުވި އުސޫލެކެވެ.
އެގޮތުން 19 ވަނަ މަޖިލީހުން 2021 ވަނަ އަހަރުގެ ތެރޭގައި ވެސް މަޖިލިސް މެންބަރުންގެ އިތުރުން އެ މެންބަރެއްގެ އާއިލާއަށް ލިބޭ ލައުންޖު ޚިދުމަތުގެ އިތުރުން އެ މެންބަރަކު ހިޔާރުކުރާ އިތުރު ދެ މީހަކަށް އެއާޕޯޓުގެ ވީއައިޕީ ލައުންޖުން މަޖިލީހުގެ ހަރަދުގައި ޚިދުމަތް ލިބޭ ގޮތަށް އާންމު ކޮމިޓީން ފާސްކުރިއެވެ. ނަމަވެސް ގިނަ ބައެއްގެ ފާޑުކިޔުމާއި ނުރުހުން އަމާޒުވުމާ ގުޅިގެން އެ އުސޫލަށް އަމަލުކުރުން ފަސްކޮށް، އުސޫލު އަލުން މުރާޖައާކުރަން ނިންމިއެވެ. މީގެ އިތުރުން ކުރީގެ ރައީސް އަބްދުﷲ ޔާމީންގެ ވެރިކަމުގެ ތެރޭގައި 18 ވަނަ މަޖިލީހުން ވެސް ވީއައިއޭގެ ވީއައިޕީ ލައުންޖު ބޭނުންކުރައްވައި، ބިލަށް ބޮޑު ހޭދައެއް ކޮށްފައިވެއެވެ.
މީގެކުރިން ވެސް މެންބަރުންގެ އިތުރުން އެބޭފުޅެއްގެ އަނބިކަނބަލުންނަށް ނުވަތަ ފިރިކަލުންނަށާއި ދަރިންނަށް އަދި މައިންބަފައިންނަށް އެއާޕޯޓުގެ ވީއައިޕީ ލައުންޖުގެ ޚިދުމަތް ލިބެއެވެ. އަދި މެންބަރުންނަށް ދޭ ވީއައިޕީ ލައުންޖުގެ ޚިދުމަތަށް އެއާޕޯޓުން ބިލު ކުރާނީ މަޖިލީހަށެވެ.
