ގާޑިއޯލާ ބޭނުންނަމަ އިނގިރޭސި ކޯޗުކަން ދޭނީ އޭނާ އަށް

މެންޗެސްޓާ ސިޓީ އަށް ކޯޗުކޮށްދޭ ޕެޕް ގާޑިއޯލާ އަށް އިނގިރޭސި ކޯޗުކަން ދިިނުމުގެ މަސައްކަތް އެފްއޭއިން ފަށައިފި އެވެ.

އިނގިރޭސި އެފްއޭއިން މިވަގުތު މަސައްކަތް ކުރަމުންދަނީ މި މަގާމަށް ގާޑިއޯލާ ޝައުގުވެރިވޭތޯ ޔަގީން ކުރަމުންނެވެ. އިނގިރޭސި ކޯޗުކަން އޭނާ ބޭނުންވާނަމަ އިނގިރޭސިން މިވަގުތަށް އައްޔަންކުރާނީ ވަގުތީ ކޯޗެކެވެ. ސަބަބަކީ ގާޑިއޯލާ މެންޗެސްޓާ ސިޓީއާއެކު ހަދާފައިވާ ކޮންޓްރެކްޓް ހަމަވާނީ 2025ގެ މެދުތެރޭގައި ކަމަށްވުމެވެ.

ގާޑިއޯލާ މިކަމާ ބެހޭ ގޮތުން ވަކި އެއްޗެއް އަދި ނުބުނެ އެވެ. ނަމަވެސް ކުރިއަށް އޮތް ސީޒަނަށް ފަހު މެންޗެސްޓާ ސިޓީގެ އެގްރީމަންޓް އާކުރުމަށް އޭނާ އަދި ނުވިސްނަ އެވެ. މީގެ ކުރިން އޭނާ ބުނަމުން އައީ ކެރިއަރުގައި ދެން އޮތީ ގައުމީ ޓީމަކާ ހަވާލުވުމުގެ މަސައްކަތް ކަމަށެވެ. ނަމަވެސް އަބޫދާބީގެ މުއްސަނދިން ހިންގާ ސިޓީން ގާޑިއޯލާ ވަކިކުރުމަކީ އެއްވެސް ބަޔަކަށް ފަސޭހަކަމަކަށްނުވާނެ އެވެ.

ސްޕޭނުގެ ބާސެލޯނާ އަށް ކުޅެ އެކުލަބުގެ ކެޕްޓަންކަންކުރި ގާޑިއޯލާ ކޯޗުކަން ފެށީ ވެސް ބާސެލޯނާއިންނެވެ. ކާމިޔާބު ހަތަރު އަހަރަށް ފަހު ދެން އޭނާ ފެނިގެންދިޔައީ ޖަރުމަނުގެ ބަޔާން މިއުނިކުންނެވެ. އެއަށްފަހު މެންޗެސްޓާ ސިޓީއަށް 2015 ވަނަ އަހަރުން ފެށިގެން ކޯޗުކޮށްދީ މިހާތަނަށް އޭނާ ވަނީ 25 ތަށި ހާސިލްކޮށްފަ އެވެ.

ނަމަވެސް އިނގިރޭސިންނަށް އޮތް ބިރަކީ ދުނިޔޭގެ އެންމެ ކާމިޔާބު ކުލަބު ކޯޗު އޭނާގެ ގައުމު ސްޕޭނުގެ ގައުމީ ޓީމާ ހަވާލުވެދާނެ ކަމުގެ ބިރެވެ. ސްޕޭނުގެ ކޯޗުކަމުގައި މިހާރު ހުރި ލުއިސް ޑެލަ ފުއެންޓޭ އަށް ފަހު ސްޕޭނުގެ ކޯޗުކަން ކުރަން ގާޑިއޯލާ ވެސް ޝައުގުވެރިވުމަކީ ވުން ވަރަށް ގާތްކަމެކެވެ.

އިނގިރޭސިން ކޯޗަކު ހޯދަން ފެށީ ޖެހިޖެހިގެން ދެ ޔޫރޯ ފައިނަލް ކުޅެ ބަލިވުމުން މީގެ ތިން ދުވަސް ކުރިން ގެރެތް ސައުތު ގޭޓް މަގާމުން ވަކިވުމުންނެވެ. އިނގިރޭސި ކޯޗުކަމަށް ގާޑިއޯލާ ނުގެނެވޭނަމަ އެ މަގާމު ދިނުން އެކަށީގެންވާ އެހެން ކޯޗުންތަކެއް ވެސް އެބަތިއްބެވެ. އޭގެ ތެރޭގައި ލިވަޕޫލްގައި ކާމިޔާބު ދުވަސްތަކެއް ހޭދަކުރި ޖަރުމަނުގެ ކޯޗު ޔާގެން ކްލޮޕް އާއި ޗެލްސީ އާއި ބަޔާން މިއުނިކަށް ކޯޗުކޮށްދިން ޖަރުމަނުގެ ކޯޗު ތޯމަސް ޓުޗެލް އާއި ޗެލްސީގައި ހުސްވި ސީޒަނުގައި ހުރި ކޯޗު އާޖެންޓީނާގެ މައުރީސިއޯ ޕޮޗެޓީނޯ އާއި އިނގިރޭސި ކުރީގެ މިޑްފީލްޑަރު ފްރޭންކް ލަމްޕާޑާއި ޗެލްސީގެ ކުރީގެ ކޯޗު ގްރެހަމް ޕޮޓާ އާއި ނިއުކާސަލްގެ ކޯޗު އެޑީ ހޮވޭ އަދި އިނގިރޭސި 21 އަހަރުން ދަށުގެ ޓީމުގެ ކޯޗު ކްލާސީ ހިމެނެ އެވެ.