ހިތްދަތިކަން ފިލުވާލައި، އިންގްލެންޑަށް އުފާވެރިކަން ގެނެސް ދިނީ ސައުތުގޭޓް: ބޮޑު ވަޒީރު ސްޓާމާ

ފުޓުބޯޅައިގައި އިންގްލެންޑަށް ކުރިމަތިވެފައި އޮތް ހިތްދަތިކަން ފިލުވާލައި، އުންމީދާއި އުފާވެރިކަން ގެނެސް ދިނީ ގަރެތު ސައުތުގޭޓް ކަމަށް، އިނގިރޭސިވިލާތުގެ ބޮޑު ވަޒީރު ކެއި ސްޓާމާ ވިދާޅުވެެއްޖެ އެވެ.

ބޮޑު ވަޒީރު ސްޓާމާ މިފަދައިން ވިދާޅުވީ، އިންގްލެންޑުގެ ޤައުމީ ޓީމުގެ ކޯޗުކަމުން ވަކިވާން ސައުތުގޭޓް ނިންމުމާއެކު، އާންމު ކުރެއްވި ބަޔާނެއްގަ އެވެ. ކޯޗުކަމުން ވަކިވާން ސައުތުގޭޓް ނިންމީ، ޖަރުމަނުގައި ނިމުނު ޔޫރޯ ފުޓުބޯޅަ މުބާރާތުގެ ފައިނަލުން އިންގްލެންޑު ބަލިވެފައި ވަނިކޮށެވެ.

ސްޓާމާގެ ރަަސްމީ އެކްސް އެކައުންޓުގައި ކުރެއްވި ޕޯސްޓެއްގައި ވިދާޅުވެފައި ވަނީ، އިންގްލެންޑުގެ ކޯޗުކަމުގައި ސައުތުގޭޓް ހޭދަކޮށްފައިވާ ދުވަސްތަކަކީ އަބަދަށް ހަނދާނުގައި ހުންނާނެ ދުވަސްތަކެއް ކަމަށެވެ. އެތައް އަހަރުތަކެއް ވަންދެން އިންގްލެންޑުން ކުރަމުން އައި ހިތާމަތައް އެއްފަރާތްކޮށް، އުންމީދެއް ގެނެސްދިން ދުވަސްތަކެއްގެ ގޮތުގައި އެ ދުވަސްތައް ވާނެ ކަމަށް ވެސް ސްޓާމާ ވިދާޅުވި އެވެ.

ސްޓާމާ ވަނީ އެ މުއްދަތުގައި އިންގްލެންޑުން ހޯދާފައިވާ ކާމިޔާބީތައް ޙިއްސާ ކުރައްވައިފަ އެވެ. އެގޮތުން 2018 ވަނަ އަހަރުގެ ފީފާ ވޯލްޑް ކަޕްގެ ސެމީ ފައިނަލްގައި އިންގްލެންޑުން ކުޅުނުކަން ފާހަގަ ކުރެއްވި އެވެ. އަދި، ފުރަތަމަ ފަހަރަށް ޔޫރޯ ފުޓުބޯޅަ މުބާރާތެއްގެ ފައިނަލްގައި 2021 ވަނަ އަހަރު ކުޅުނު ކަމަށާއި، ދެ ވަނަ ފަހަރަށް ފައިނަލްގައި މިއަހަރު ކުޅެފައިވާކަން ވެސް ފާހަގަ ކުރައްވާފައިވެ އެވެ. އޭގެ އިތުރުން 2021 ވަނަ އަހަރު އިންގްލެންޑުގެ ރަސްމީ ސްޓޭޑިއަމް ވެމްބްލީގައި ޖަރުމަނު އަދި ޑެންމާކުގެ މައްޗަށް ހޯދި މޮޅަކީ އުންމީދުން ފުރިގެންވާ މެޗުތަކެއް ކަމަށް ވިދާޅުވި އެވެ.

މީގެ އިތުރުން އިންގްލެންޑުގެ ކޯޗުކަމުގެ ވަޒީފާގައި ސައުތުގޭޓް މަސައްކަތް ކޮށްފައި ވަނީ ވަރަށް ފުރިހަމަ އަށް ކަމަށް ސްޓާމާ ވިދާޅުވި އެވެ. ސައުތުގޭޓަކީ އިންގްލެންޑުގެ ޒުވާން ކުޅުންތެރިންނަށް ނަމޫނާއެއްގެ ގޮތުގައި ސްޓާމާ ސިފަ ކުރެއްވި އެވެ. އެގޮތުން މުޅި އިންގްލެންޑުގެ އުންމީދުތަކާއި، ހުވަފެންތައް އަމިއްލަ ކޮނޑު މަތީގައި އުފުލާފައިވާކަން ވެސް ބޮޑު ވަޒީރު ވަނީ ފާހަގަ ކުރައްވައިފަ އެވެ. މުސްތަޤުބަލަށް ގިނަ މަސައްކަތްތަކެއް ކޮށްފައިވާ ކަމަށާއި، ސައުތުގޭޓްގެ ޚިދުމަތަކަށް އެންމެ ފުރިހަމަ އަށް ޝުކުރު އަދާ ކުރައްވާ ކަމަށް ވެސް ސްޓާމާ ވިދާޅުވި އެވެ.

އިންގްލެންޑުގެ ކޯޗުކަމާ ސައުތުގޭޓް ހަވާލުވީ 2016 ވަނަ އަހަރު އެވެ. އޭގެ ފަހުން އިންގްލެންޑު ވަނީ މުބާރާތެއްގެ ތަށު ހޯދުމާ ގާތަށް ވެސް ޖެހިލައިފަ އެވެ. މިއަހަރުގެ ޔޫރޯ މުބާރާތް އިންގްލެންޑަށް ކާމިޔާބުކޮށް ނުދެވިއްޖެ ނަަމަ، ކޯޗުކަމުން އިސްތިއުފާ ދޭނެ ކަހަލަ އިޝާރާތެއް ސައުތުގޭޓް އޮތީ ކުރިން ވެސް ދީފަ އެވެ.