އޮގާވާ ފޮނުވާލުމަށްފަހު، ނިއު އަށް ލުބްނާންގެ ޑިފެންޑަރެއް ގެނެސްފި

ޖަޕާނުގެ ކިސްކީ އޮގާ ފޮނުވާލުމަށްފަހު، ނިއުރޭޑިއަންޓް ސްޕޯޓްސް ކްލަބަށް ލުބްނާންގެ ޑިފެންޑަރެއްކަމަށްވާ ހުސެއިން އެލްޑޯ ގެނެސްފި އެވެ.

ކިސްކީ ފޮނުވާލުމަށްފަހު ގެނައި އެލްޑޯ ނިއުގެ ޓީމާ ގުޅުމަށް ބުދަ ދުވަހު ރާއްޖެ އައިސްފައިވާއިރު، އޭނާ ޓީމާއެކު ފަރިތަކުރުންތައް ފަށާނީ ބުރާސްފަތި ދުވަހު ކަމަށް ނިއު އިން ބުނެއެވެ.

ނިއުގެ ޖެނެރަލް ސެކެޓްރީ ހަސަން ރަޝީދު (ޓެޑް) ވިދާޅުވީ، ނިއުގެ ކޯޗުކަމަށް އަލަށް ގެނައި ސްޕެއިންގެ އޮސްކާ ބުރުޒޮން ބޭނުންވަނީ އެޓީމުގެ ފަހަތް ވަރުގަދަ ކުރަން ކަމަށާއި، އެގޮތުން އެލްޑޯ ޓީމާ ގުޅުމުން ފަހަތް އިތުރަށް ވަރުގަދަ ވެގެންދާނެ ކަމަށެވެ.

ޓެޑް ވިދާޅުވީ، އޮގާވާ ފޮނުވާލަން ނިންމީ އޭނާ އަށް އަނިޔާގެ މައްސަލަތަކެއް ކުރިމަތިވުމުން ކަމަށާއި، އަދި މެނޭޖްމަންޓުން ހިތްހަމަޖެހޭފަދަ ޕާފޯމެންސްއެއްވެސް އޭނާ އަށް ދެއްކެމުން ނުދާ ކަމަށެވެ.

ނިއު އަށް ގެނައި އުމުރުން 23 އަހަރުގެ އެލްޑޯ އަންނަނީ ލެބްނާންގެ ގައުމީ ޓީމަށްވެސް ކުޅެމުންނެވެ. އޭނާ އެންމެ ފަހުން ކުޅެމުން އައީ ލެބްނާންގެ ފުރަތަމަ ޑިވިޝަންގެ ކްލަބެއްކަމަށްވާ ޝަބާބް އަލް ސަހެލް އަށެވެ. އެލްޑޯ ވަނީ ލެބްނާންގެ 16 އަހަރުން ދަށް، 17 އަހަރުން ދަށް، 18 އަހަރުން ދަށް، 19 އަހަރުން ދަށް، 21 އަހަރުން ދަށް އަދި 23 އަހަރުން ދަށުގެ ޓީމަށްވެސް ކުޅެފައެވެ.

އެލްޑޯ ވަނީ ވީބީ އައްޑޫ އެފްސީގެ ކުރީގެ ކޯޗު އަދި އެފްއޭއެމްގެ ޓެކްނިކަލް ޑައިރެކްޓަރު ކޭން ވަންލީގެ އިރުޝާދުގެ ދަށުން އަލް އަހުދު އެފްސީއަށްވެސް ކުޅެފައެވެ. އެގޮތުން އޭނާ ވަނީ އަލް އަހެދްއާ އެކު ލެބްނާން ސުޕާކަޕް ދެފަހަރު، ލެބްނާން ޕްރިމިއާ ލީގު ދެފަހަރު އަދި އެލީޓްކަޕް ތިންފަހަރު ކާމިޔާބުކޮށްފައެވެ.