އިންގްލެންޑުގެ ޤައުމީ ޓީމުގެ ކޯޗުކަމުގެ މަޤާމުން ވަކިވާން ގަރެތު ސައުތުގޭޓް ނިންމައިފި އެވެ.
އޭނާ މިހެން ނިންމާފައި ވަނީ ދާދި ފަހުން ޖަރުމަނުގައި ނިމުނު ޔޫރޯ ފުޓުބޯޅަ މުބާރާތުގެ ފައިނަލްގައި ސްޕެއިން އަތުން އިންގްލެންޑު ބަލިވުމުންނެވެ. އެ މެޗަށްފަހު ވެސް ސައުތުގޭޓާ އެ ސުވާލު އަމާޒު ކުރި އެވެ. އޭރު އޭނާ ބުނެފައި ވަނީ، މުސްތަޤުބަލާ މެދު ވާހަކަ ދައްކަން މާ އަވަސް ކަމަށެވެ.
އެހެން ނަމަވެސް، ޔޫރޯ މުބާރާތަށްފަހު އެނބުރި ޤައުމަށް އައިސް، އަންގާރަ ދުވަހު ސައުތުގޭޓް ނިންމާފައި ވަނީ ކޯޗުކަމުގެ މަގާމުން ވަކިވުމަށެވެ. އެ ނިންމުން އޭނާ ވަނީ އިއުލާން ވެސް ކޮށްފަ އެވެ. އެކަން އިއުލާން ކުރަމުން ސައުތުގޭޓް ބުނީ، އިންގްލެންޑުގެ ޤައުމީ ޓީމަށް ކުޅުމާއި، ޤައުމީ ޓީމަށް އިރުޝާދު ދިނުމަކީ އޭނާގެ ޙަޔާތުގައި ލިބުނު ވަރަށް ބޮޑު ފަޚުރެއް ކަމަށެވެ.
އިންގްލެންޑަށް އިރުޝާދު ދިނުމަކީ އޭނާ އަށް ލިބުނު ވަރަށް ބޮޑު ފުރުސަތެއް ކަމަށާއި، އެ ފުރުސަތުގައި އޭނާ އަށް ކުރެވެން އޮތް އެންމެ ރަނގަޅަކަށް މަސައްކަތް ކޮށްފައިވާނެ ކަމަށް ވެސް ސައުތުގޭޓް ބުންޏެވެ. އެހެން ނަމަވެސް، މިއީ އިންގްލެންޑަށް ބަދަލުތަކެއް އައިސް، އައު ޗަޕްޓަރެއް ފަށަން ޖެހޭ ވަގުތު ކަމަށް ވެސް އޭނާ ބުންޏެވެ. އެހެންވެ އިންގްލެންޑުގެ ކޯޗުކަމުން ވަކިވާން ނިންމާފައިވާ ކަމަށް ސައުތުގޭޓް ވަނީ އިއުލާން ކޮށްފަ އެވެ.
އިންގްލެންޑުގެ ކޯޗުކަމާ ސައުތުގޭޓް ހަވާލުވީ 2016 ވަނަ އަހަރު އެވެ. އޭގެ ފަހުން އެ ޓީމުން ވަނީ 2018 ވަނަ އަހަރު ރަޝިޔާގައި އޮތް ފީފާ ވޯލްޑް ކަޕްގެ ސެމީ ފައިނަލްގައި ކުޅެފަ އެވެ. އޭގެ ފަހުން 2021 ވަނަ އަހަރު އަމިއްލަ ޤައުމުގައި އޮތް ޔޫރޯގެ ފައިނަލްގައި ކުޅުނެވެ. އެއީ އިންގްލެންޑުން ޔޫރޯ މުބާރާތެެއްގެ ފައިނަލްގައި ކުޅުނު ފުރަތަމަ ފަހަރެވެ.
އޭގެ ފަހުން 2022 ވަނަ އަހަރު ޤަތަރުގައި އޮތް ފީފާ ވޯލްޑް ކަޕް ނިންމާލަން ޖެހުނީ ކުއާޓާ ފައިނަލާ ހަމައިންނެވެ. މިއަހަރުގެ ޔޫރޯގެ ފައިނަލްގައި އިންގްލެންޑު ކުޅެފައިވާއިރު، އެއީ އަމިއްލަ ޤައުމުން ބޭރުގައި އިންގްލެންޑު ކުޅުނު ފުރަތަމަ ފައިނަލް އެވެ.
