ބޮޑެތި މުބާރާތްތަކުގައި ސެކިއުރިޓީގެ ކަންކަން އިނގިރޭސި އެފްއޭއިން އިންތިޒާމްކުރާ ގޮތާއި ޔޫރޯގައި ކުޅުންތެރިންނާ ބައްދަލުކުރުމުގެ ފުރުސަތު ދޭ ގޮތާމެދު ކުޅުންތެރިންގެ އަނބިންނާއި ލޯބިވެރިން ހިތްހަމަނުޖެހިއްޖެ އެވެ.

އެންމެ ފަހުގެ ވޯލްޑްކަޕުގައި 2022ގައި ގަތަރުގައި ސެކިއުރިޓީގެ ކަންކަމަށް ކޮންމެ ކުޅުންތެރިއަކު 126000 ޑޮލަރު ހަރަދު ކުރަންޖެހުނެވެ. އިނގިރޭސި އެފްއޭއިން ސެކިއުރިޓީގެ ކަންކަން އިންތިޒާމްކުރި ގޮތުން ޔޫރޯގައި މި އަގު ބޮޑުވުމަކީ ވެސް ކުޅުންތެރިންގެ އާއިލާތަކުން ހިތްހަމަނުޖެހުނު ކަމެކެވެ. އަދި ސެކިއުރިޓީ މާބޮޑަށް ހަރުކަށި ކޮށްފައި އޮތުމަކީ ވެސް އެވެރިން ނުރުހުންވެފައި ތިބި ކަމެކެވެ. 

މިހެންވެ ކުޅުންތެރިންގެ އާއިލާތަކުން ޔޫރޯގައި ސަލާމަތީ ކަންކަން އިންތިޒާމްކުރުމުން ދަނީ އެފްއޭއާ ނުބައްސައި އަމިއްލައަށެވެ.

ޑިފެންޑަރު ހެރީ މެގުއާގެ ލޯބިވެރިޔާ ފާން މެގުއާ އާއި ގޯލްކީޕަރު ޖޯޑަން ޕިކްފޯޑްގެ ލޯބިވެރިޔާ މޭގަން ޕިކްފޯޑަކީ ޕެއާއެކެވެ. މި ދެ މީހުން ބޭނުންވަނީ ޔޫރޯގައި ސެކިއުރިޓީ ބިލްތައް ދެމީހުންނަށް އެއްވަރަކަށް ބަހާލުމަށެވެ. ބުކަޔޯ ސަކާގެ ލޯބިވެރިޔާ ތޮލަމީ ބެންސަން ވެސް ބޭނުންވެސް ބޭނުންވަނީ އަމިއްލަ އަށް ސެކިއުރިޓީގެ ކަންކަން ހަމަޖައްސާށެވެ.

އިނގިރޭސިވިލާތުގެ މީޑިއާތަކުން ބުނަނީ ކުޅުންތެރިންގެ އާއިލާތަކުން ސަލާމަތީ ކަންކަން ބަލަހައްޓަން ހަވާލުކޮށްފައިވަނީ ކުރިން މިލިޓަރީގައި މަސައްކަތްކޮށްފައިވާ ރިޓަޔާޑް މީހުންނާ ކަމަށެވެ.

ކުޅުންތެރިންގެ އާއިލާތަކުން މި ގޮތަށް ނިންމި އެހެން ސަބަބެއްވެސްވެ އެވެ. އެއީ މާޗު މަހު ރަޝިޔާގެ ވެރިރަށް މޮސްކޯގެ ކޮންސެޓެއް ބާއްވާތަނަށް ހޯލަކަށް ދިން ޓެރަރިސްޓް ހަމަލާއަށްފަހު މިފަދަ ބިރުވެރިކަމެއް ޖަރުމަނުގައި އޮވެދާނެ ކަމަށް އިނގިރޭސި ސަރުކާރުން ކުޅުންތެރިން ގާތުގައި ބުނުމުންނެވެ.

ދަ ސަންއިން ބުނަނީ އަމިއްލަ ސެކިއުރިޓީ ގެންގުޅުމުން ފުރަތަމަ ހަފުތާތަކުގައި ދައްކަންޖެހޭނީ 82000 ޑޮލަރު ކަމަށާއި އިނގިރޭސިން ފައިނަލްކުޅެ މުބާރާތް ނިންމާލިޔަސް އެކަމަށް ޖުމުލަ ހިނގާނީ 126000 ޑޮލަރުވަރު ކަމަށެވެ. މިއަދަދަކީ ވޯލްޑްކަޕުގައި ކޮންމެ ކުޅުންތެރިއަކު ހޭދަކުރަންޖެހުނު އަދަދެކެވެ.

އިނގިރޭސި ކޯޗު ސައުތްގޭޓަކީ ދަނޑު ބޭރުގައި ވެސް ކުޅުންތެރިންގެ ވަރަށް ގިނަ ކަންކަން ބަލައި އެކަންކަމާ ވާހަކަ ދައްކާ ކޯޗެކެވެ. ކުޅުންތެރިން މި ގޮތަށް އަމިއްލަ ސެކިއުރިޓީ ގެންގުޅުމާމެދު އޭނާ މުޅިން ހިތްހަމަނުޖެހެ އެވެ.

ސަބަބަކީ 2006ގެ ވޯލްޑްކަޕުގައި އިނގިރޭސި ކެޕްޓަން ޑޭވިޑް ބެކަމްގެ އަންހެނުން އަދި ކުރީގެ މަޝްހޫރު ލަވަކިއުންތެރިޔާ ވިކްޓޯރިއާ ބެކަމް އަށް ނޫސްވެރިންގެ ސަމާލުކަން ލިބިގެންދިޔަ މިންވަރު އިތުރުވުމެވެ. މުޅި މީޑިއާ ވިކްޓޯރިއާގެ ވާހަކަތަކުން ފުރާލުމުން އިނގިރޭސިންގެ ކުޅުމަށް އަސަރުކުރިކަމަށް ސައުތުގޭޓް ގަބޫލުކުރެ އެވެ. މިހެންވެ އޭނާ ބޭނުންވީ 1966ގެ ފަހުން ފުރަތަމަ ފަހަރަށް އިނގިރޭސިން ތައްޓެއް ހޯދުމަށް ކުރާ އުއްމީދަށް މިފަދަ އެއްވެސް ކަމަކުން ހުރަސް އެޅުނަނުދިނުމަށެވެ. މިހެންވެ ކުޅުންތެރިންގެ ލޯބިވެރިންނަށް ޓީމާ ބައްދަލުކުރަން އާދެވޭނީ ކަނޑައަޅާ ވަކި ދުވަހެއްގައި ވަކި ގަޑިތަކެއްގައި ކަަމަށް އޭނާ ވަނީ ނިންމާފަ އެވެ.