ޒިޔާދު ވިދާޅުވީ ރައްޔިތުންނަށް އަނިޔާވެރިކަން ތަހައްމަލު ކުރަންޖެހުނީ ހޮޅި ވައުދެއްގައި ޖެހުމުގެ ސަބަބުން ކަމަށް
ވައިކަރަދޫ ދާއިރާގެ މެމްބަރު ހުސައިން ޒިޔާދު
ދައުލަތް ހުއްޓިއްޖެ ކަމަށާއި، އެކަން ވީ ސިޔާސީ މުވައްޒަފުން ގިނަ ވެގެން ކޮށި އަރައިގެން ކަމަށް މަޖިލީހުގެ ވައިކަރަދޫ ދާއިރާގެ މެމްބަރު ހުސައިން ޒިޔާދު(ފިއްޓޭ) ވިދާޅުވެއްޖެއެވެ.
އޭނާ އެފަދައިން ވިދާޅުވީ އެމްޑީޕީގެ ހަރުގެ ޖަލްސާއެއްގައި ވާހަކަދައްކަވަމުންނެވެ. ޒިޔާދު ވަނީ ގައުމުގައި ހިނގަ ހިނގާ ހުރި އެއްވެސް މަޝްރޫއެއް ނެތް ކަމަށާއި ހުރިހާ ކަމެއް ހުއްޓިފައިވާ ކަމަށް ވިދާޅުވެފައެވެ. ގައުމުގައި މިހާރު އޮތް ހަމައެކަނި ކަމަކީ ވައްކަމާއި ކަރަންޓު މީޓަރުގެ ވާހަކަ ކަމަށް އޭނާ ވިދާޅުވިއެވެ.
އެންސްޕާ އާއި އާސަންދަ ވެސް ހުއްޓިފައިވާ ކަމަށް އޭނާ ވަނީ ވިދާޅުވެފައެވެ. އިތުރަށް ޒިޔާދު ވިދާޅުވީ ރައްޔިތުންނަށް އަނިޔާވެރިކަން ތަހައްމަލު ކުރަންޖެހުނީ ހޮޅި ވައުދެއްގައި ޖެހުމުގެ ސަބަބުން ކަމަށެވެ.
މެމްބަރު ޒިޔާދު ވަނީ ރާއްޖޭގެ މާލީ ކަންކަން ކުރިއަށް ގެންދިއުމުގައި ބޮޑެތި ދަތިތައް ހުރި ކަމަށް ވެސް ވިދާޅުވެފައެވެ.
މާލީ ކަންކަމާއި މެދު ފާޑުކިޔުންތައް އަމާޒުކުރަން ފެށުމުން އެކަންކަން ރަނގަޅުކުރަން ސަރުކާރުން ކޮންމެވެސް ވަރެއްގެ މަސައްކަތްތަކެއް ކުރާ ކަމަށާއި އެކަން ކުރަނީ ފާޑުކިޔުން ބޮޑުވުމުން ކަމަށް އޭނާ ވިދާޅުވިއެވެ. މި ސަރުކާރުން އަބަދުވެސް ދައްކަނީ ކުރީ ސަރުކާރުގެ ވާހަކަ ކަމަށް ފާހަގަކުރައްވާ އެކަމަށް ވެސް ޒިޔާދު ފާޑު ވިދާޅުވިއެވެ. ސަރުކާރު ނުހިންގޭ ކަމަށާއި މި ސަރުކާރުން ފެންނަނީ ކްލަބް ޖަމިއްޔާގެ ސިފަ ކަމަށް އޭނާ ވިދާޅުވިއެވެ. މި ސަރުކާރަށް ފާޑު ވިދާޅުވަމުން ޒިޔާދު ވަނީ ކޮންމެ ވަޒީރެއްގެ ފަހަތުގައި އެއް ޓަނު ސްޓޭޓް މިނިސްޓަރުން ތިބި ކަމަށް ސިފަކުރައްވާފައެވެ.
