ޕީއެންސީގެ މަޖިލިސް މެންބަރުން މުޒާހަރާތަކުގައި ބައިވެރިވާނެ، މިވެރިކަން ވައްޓާލާނަން: މެންބަރު މައުރޫފު
މުޒާހަރާތަކާއި ގުޅިގެން ސަރުކާރަށް ވަރަށް ބޮޑަށް އަސަރުކުރޭ
ބުދަ ދުވަހުގެ ރޭ ކުރިއަށް ގެންދިޔަ ކުއްލި އެއްވުމުގައި ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މައުރޫފު ޒާކިރު ވާހަކަދައްކަވަނީ
ކުރިއަށް އޮތްތަނުގައި ޕީއެންސީގެ ރައްޔިތުން މަޖިލީހުގެ މެންބަރުން ސަރުކާރާ ދެކޮޅަށް ކުރާ މުޒާހަރާތަކުގައި ބައިވެރިވާނެ ކަމަށާއި، މިވެރިކަން ވައްޓާލާނެ ކަމަށް ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މައުރޫފު ޒާކިރު ވިދާޅުވެއްޖެ އެވެ.
ބުދަ ދުވަހުގެ ރޭ އެމްޑީޕީން ކުރިއަށް ގެންދިޔަ ކުއްލި އެއްވުމުގައި މެންބަރު މައުރޫފު ވިދާޅުވީ ސަރުކާރާ ދެކޮޅަށް ކުރަމުންދާ މުޒާހަރާތަކާއި ގުޅިގެން ސަރުކާރަށް ވަރަށް ބޮޑަށް އަސަރު ކޮށްފައިވާ ކަމަށާއި، މުޒާހަރާތަކުގައި ދައްކާ ހުރިހާ ވާހަކަތަކާއި، މަންޒަރުތައް ވަރަށް ގާތުން ބަލަމުންދާ ކަމަށެވެ.
މެންބަރު މައުރޫފު ވިދާޅުވީ ރައީސް ޑރ. މުހައްމަދު މުއިއްޒުގެ ސަރުކާރެއްގެ ދޮޅު އަހަރެއްހާ ދުވަހުގެ ތެރޭގައި ރައްޔިތުން މުޒާހަރާއަށް ނުކުތީ ގައުމުގެ ގިނަ ކަންކަން ގޯސްވުމުން ކަމަށާއި، މި މުޒާހަރާތައް ސަރުކާރަށް ނުހުއްޓުވޭނެ ކަމަށެވެ.
ކުރިއަށް އޮތްތަނުގައި މުޒާހަރާތައް ވަރުގަދަވެ ބައިވެރިވާ މީހުން ގިނަވާނެކަން ފާހަގަކުރައްވައި މެންބަރު މައުރޫފު ވިދާޅުވީ ކުރިއަށް އޮތްތަނުގައި އެމްޕީގެ ލީޑަރޝިޕް އެއްކޮށް ނުކުންނާނެ ކަމަށާއި، ޕީއެންސީ މެންބަރުން ވެސް މި މުޒާހަރާތަކަށް ނުކުންނާނެ ކަމަށެވެ. އަދި ވިދާޅުވީ ރައްޔިތުން މަޖިލީހުގެ ތަޅުމުގައި ވެސް ޕީއެންސީގެ މެންބަރުން ސަރުކާރާ ދެކޮޅަށް މިހާރު ވާހަކަ ދައްކަވާ ކަމަށާއި، އެކަމާއި ގުޅިގެން ބައެއް މެންބަރުންނަށް މަޖިލީހުގައި ވާހަކަ ދެއްކުމުގެ ފުރުސަތު ނުދޭ ކަމަށެވެ.
މީގެ އިތުރުން މެންބަރު މައުރޫފު ވިދާޅުވީ ރައީސް މުއިއްޒަށް އަބަދަކު މަޖިލިސް މެންބަރުން ކޮންޓްރޯލް ކޮށްގެން ނުގެންގުޅެވޭނެ ކަމަށާއި، ބަލިކަށިވާނެ ކަމަށެވެ.
އަޅުގަނޑަށް އެކަން އެނގޭ ސަބަބަކީ ޕީއެންސީގެ މެންބަރުން މިހާރު މަޖިލިސް ތެރޭގައި ސަރުކާރާ ދެކޮޅަށް ވާހަކަ ދައްކަމުންދާތީ ބަސް ބުނަމުންދާތީ މަނާކޮށްފި ވާހަކަ ދެއްކުން. ވަކި ބަޔަކަށް ނޫނީ މިހާރު މަޖިލީހުގައި ޕީއެންސީ މެންބަރުންނަށް މިހާރު ވާހަކަ ދެއްކުން މަނާކޮށްފި. މިއަދު ވެސް އަޅުގަނޑުމެންނަށް ފެނިގެންދިޔައީ ބައެއް މެންބަރުން އާދޭސްކޮށް އެދެމުންދިޔަ އެހެންނަމަވެސް ހަމަ ލީޑަރު ފަލާހު މި ބުނަނީ ނެތޭ ދެވޭކަށް މަތިން އަންގާފައޭ އޮތީ. ބައެއް މީހުންނަށޭ ފުރުސަތު ދެވޭނީ. ކޮބައިތޯ މިވާ ގޮތަކީ. އެބޭފުޅުންގެ ކަންބޮޑުވުން ހިތްހަމަ ނުޖެހުން ހިތް ނުތަނަވަސްކަން މަޖިލީހުގެ ތަޅުމުގައި ފާޅުކުރަމުންދާތީވެ ތިން ބާރު ވަކިވެފައި އޮތް ދައުލަތެއް މިރާއްޖޭގައި ނުހިނގާ ވާހަކަ ޕީއެންސީގެ މެންބަރުން މަޖިލީހުގައި މިހާރު ދައްކަމުންދޭ. އެވާހަކަތައް ކުރިއަށް އޮތްތަނުގައި އިތުރަށް ދައްކާނެ.ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މައުރޫފު ޒާކިރު
މެންބަރު މައުރޫފު ވިދާޅުވީ މިސަރުކާރުން މަޖިލިސް، ސުޕްރީމް ކޯޓުގެ ބާރު ކަނޑާލުވާލާފައިވާ ކަމަށާއި، ނަމަވެސް ރައްޔިތުންގެ ބާރު ކަނޑުވާނުލެވޭނެ ކަމަށެވެ. ދައުވާ ކޮށްގެން ވެސް ގާނޫނު އަސާސީން ވެސް އެކަން ނުކުރާނެ ކަމަށް މެންބަރު މައުރޫފް ވިދާޅުވި އެވެ.
ޕާޓީ ނިޒާމުގެ ތެރެއިން ދެފަހަރު ރައްޔިތުންގެ ލޮއެއްބާއެކު ވެރިކަން ހޯދައިފައިވާ ޕާޓީއަކީ އެމްޑީޕީކަން ފާހަގަކުރައްވައި މެންބަރު މައުރޫފު ވިދާޅުވީ ރައްޔިތުންނާއެކު އެމްޑީޕީން ނުކުމެ މިސަރުކާރު ހަމަ މަގަށް އަޅުވާނެ ކަމަށާއި، މި ވެރިކަން ވައްޓާލާނެ ކަމަށެވެ.
މެންބަރު މައުރޫފު ވިދާޅުވީ މުޒާހަރާތަކާއި ގުޅިގެން ސަރުކާރުން ބިރު ދެއްކުމަށް މަސައްކަތް ކުރި ނަމަވެސް ބިރު ނުދެއްކޭނެ ކަމަށާއި، ކުރިއަށް އޮތްތަނުގައި މި މަގުތައް ފުރާލައި ދިވެހި ފުލުހުން ވެސް ފަހަތަށް ޖައްސާނެ ކަމަށެވެ.
