އުންމީދުން ފުރިގެންވާ ރިޔާސީ ބަޔާން އާޚިރުގައި ވެގެން ދިޔައީ ސަޅިބައިސާ އަށް

ގައުމުގެ ރައީސް އިއްވަވާ ރިޔާސީ ބަޔާނުން ގައުމުގެ ހާލަތާއި، ކުރެވޭ އުންމީދު ހާމަވެގެންދާނެއެވެ. އެގޮތުން މިދިޔަ އަހަރު ވެސް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވަނީ ގައުމުގެ ހާލަތު ބަޔާންކުރައްވައި، ވަރަށް އުންމީދީ ރިޔާސީ ބަޔާނެއް އިއްވަވާފައެވެ. އޭގެ އަހަރެއް ފަހުން އަނެއްކާ ވެސް 06 ފެބްރުއަރީ 2025ވާ ބުރާސްފަތި ދުވަހަކީ އެމަނިފާނުގެ ދެވަނަ ރިޔާސީ ބަޔާން އިއްވަވާ ދުވަހެވެ.

ނަމަވެސް ފުރަތަމަ ރިޔާސީ ބަޔާނުގައި ރައީސް މުއިއްޒު ރައްޔިތުންނަށް ދެއްވި އުންމީދާއި، ގައުމަށް ގެނެސްދެއްވަން ވައުދުވެވަޑައިގެންނެވި ތަރައްގީގެ ވައުދުފުޅުތަކުގައި ހަގީގީ ކުލަ ޖެހިގެންދިޔައީ ކިހައި މިންވަރަކަށްތޯ ރައްޔިތުން ދަނީ ސުވާލު އުފައްދަމުންނެވެ. އަދި ރައީސް މުއިއްޒުގެ ފުރަތަމަ ރިޔާސީ ބަޔާނުން ރައްޔިތުންގެ ދިރިއުޅުމަށް އައި ނަމަ އައި ކުރިއެރުމެއް އައީ ސަޅި ބައިސާތަކުންނެވެ. އެއިން ކަމަކަށް އަމަލީ ސިފައެއްގައި ލިބިފައިނުވެއެވެ.

ރައީސް މުއިއްޒު ރިޔާސީ ބަޔާނުގައި ފާއިތުވި އަހަރުގެ ތެރޭގައި ކޮށްދޭން ވައުދުވެވަޑައިގެންނެވި ބައެއް ކަންކަމަށް ބަލާއިރު، ރަސްމާލެއާއި، ގުޅީފަޅާއި، ގިރާވަރުފަޅުން އަދި ހުޅުމާލެއިން ހިއްކާ ސަރަހައްދުތަކުގެ މަގުތައް ހަދައި، އަސާސީ ޚިދުމަތްތައް ގާއިމުކުރުމުގެ މަސައްކަތް ވެސް ފަށާނެ ކަމަށް ވިދާޅުވެފައިވެއެވެ. ގޯތި ލިބޭނެކަމުގެ ލިޔުމެއް، ކުރިން ލިބިފައި އޮތް ހަމަ ކޮންމެ ރައްޔިތެއްގެ ހައްގު ލިއްބައިދޭނެކަމުގެ ޔަގީންކަން އެމަނިކުފާނު ދެއްވިއެވެ.

މީގެ އިތުރުން ރަށްރަށުގައި ހުރި ގޯތިގެދޮރުގެ ދަތިކަން ހައްލުކުރުމަށް، ބިން ހިއްކުމާއި، ގޯތި ދޫކުރުމާއި، ފުލެޓު ބިނާކުރުމުގެ މަޝްރޫއުތައް 2024 ވަނަ އަހަރު ފަށާނެ ކަމަށް ރައީސް މުއިއްޒު ވިދާޅުވެފައިވެއެވެ.

ނަމަވެސް މިމަޝްރޫއުތަކުގެ އަމަލީ މަސައްކަތް ކުރިއަށް ދިޔަ މިންވަރު ރައްޔިތުންނަށް އޮތީ ފެންނާށެވެ. އެ ވާހަކަފުޅުތައް ވިދާޅުވި ގޮތައް ނުވާ ކަމީ ފެންނަން އޮތް ހަގީގަތެކެވެ. އަދި ކުރީ ސަރުކާރުން ދޫކޮށްފައިވާ ފްލެޓާއި ގޯތި ވެސް ވަނީ ދޫނުކޮށް ހިފަހައްޓާފައެެވެ. ބަހަނާ އަކަށް ފަހު ބަހަނާ އެއް ދައްކާ ރައްޔިތުން ގަނަތެޅުވުން ނޫން ކަމެއް ސަރުކާރުން ކޮށްފައެއް ނުވެއެވެ. އެކަމުގެ ކަންބޮޑުވުންތަކާއެކު އާއްމު ރައްޔިތުން ދަނީ ސަރުކާރާ ދެކޮޅަށް މުޒާހަރާ ވެސް ކުރަމުންނެވެ.

ރައީސް މުއިއްޒު ވިދާޅުވީ ކައުންސިލްތަކުން ހިންގާ ޚާއްސާ މަޝްރޫއުތަކެއްގެ ގޮތުގައި ކުނި ނައްތައިލުމާއި، ގޮނޑުދޮށް ޙިމާޔަތްކުރުމުގެ މަސައްކަތްތައް ކުރިއަށް ގެންދެވޭނެ ކަމަށެވެ. އަދި 2024 ވަނަ އަހަރު 56 ރަށެއްގައި، އާ ކުނިކޮށި އަޅައިދެވޭނެ ކަމަށެވެ. އަހަރު ނިމުނު އިރުވެސް ހަމަ އެލަވަ އެގޮތައް ވިދާޅުވުން ނޫން ކަމެއް ނުވިއެވެ. އަމަލީ ސިފައެއް ނުޖެހުނެވެ.

އާސަންދަ ނިޒާމު ހަރަދަނާ ކުރުމާ ގުޅޭގޮތުން ވެސް ރައީސް މުއިއްޒު ރިޔާސީ ބަޔާނުގައި އަލިއްޅުއްވާލެއްވިއެވެ. ރައީސް މުއިއްޒު ވިދާޅުވީ އާސަންދަ ނިޒާމަކީވެސް، އޭގެ ހައްގުވެރި ފަރާތްތަކަށް އިސްކަން ލިބޭ ނިޒާމަކަށް ބަދަލުކުރާނެ ކަމަށެވެ.

ސަރުކާރުން އާސަންދަ ނިޒާމަށް ގެނައި ބަދަލާއެކު މިހާރު އާސަންދަ ޚިދުމަތް އާއްމު ރައްޔިތުންނަށް ނުލިބޭ ޝަކުވާ ވަނީ ބޮޑުވެފައެވެ. ބޭސް ސިޓީ އަށް ސަލާން ޖެހުން އާންމު ވެއްޖެއެވެ. ޑޮކްޓަރަށް ދައްކަން ކުރާ ހޭދަ އެތައް ގުނައެއް އިތުރުވެއްޖެއެވެ.

ރައީސް މުއިއްޒު ވިދާޅުވީ ރާއްޖޭގެ އެކި ސަރަހައްދުތަކުގައި ޓާޝަރީ ހޮސްޕިޓަލް ބިނާކުރުމަށް ސަރުކާރުން 2024 ފަށާ މަޝްރޫއު ފުރިހަމަވުމުން، މާލެ ނައިސް، ރަށާ ކައިރިން ސިއްހީ ފަރުވާ ހޯދޭނެ މަގު ފަހިވާނެ ކަމަށެވެ.

ނަމަވެސް 2024 ވަނަ އަހަރު ނިމިގެންދިޔައިރު ޓާޝަރީ ހޮސްޕިޓަލެއް ތަރައްގީ ކުރުމުގެ މަޝްރޫއެއް ހިންގާފައިނުވެއެވެ. އަދި ސިއްހީ ޚިދުމަތް ހޯދުމަށް ރައްޔިތުންނަށް ވަނީ އިތުރަށް އުދަނގޫތަކާ ކުރިމަތިވެފައެވެ.

ރައީސް މުއިއްޒު ވިދާޅުވީ ވެލާނާ އިންޓަރނޭޝަނަލް އެއަރޕޯޓް ތަރައްގީކުރުމުގެ މަޝްރޫއު 2024 ވަނަ އަހަރު ނިމި، އައު އެއަރލައިންތަކަށް ރާއްޖެއަށް ދަތުރުތައް ފަށަން ފުރުސަތު ދެވޭނެ ކަމަށެވެ.

މީގެ އިތުރުން ރައީސް މުއިއްޒު ވިދާޅުވީ ރާއްޖޭގެ އިގްތިސާދު ވަރުގަދަކުރުމަށް އެންމެ އިސްކަމެއްދޭންޖެހޭ އަނެއްކަމަކީ، ދަތުރުފަތުރުގެ ޚިދުމަތް ފުޅާކުރުން ކަމަށާއި، އައު 2 އެއަރޕޯޓުގެ މަސައްކަތް، 2024 ވަނަ އަހަރުގެ ތެރޭގައި ފަށާނެ ކަމަށެވެ.

މިސަރުކާރަށް އެއާޕޯޓެއްގެ އެއްވެސް އަމަލީ މަސައްކަތެއް ފެށިފައިނުވާއިރު، ކުރީ ސަރުކާރުގައި ފަށާފައިވާ އެއަރޕޯޓު ތަކުގެ މަސައްކަތްތައް ވެސް ވަނީ ހުއްޓިފައެވެ. ކުރިއަށްދާ މަދު މަސައްކަތެއްވެސް ދަނީ ފިނިހަކަ ދުވެލީގައެވެ. އާރްޓީއައި ލޯންޗު ފެރީގެ ޚިދުމަތް ވެސް މުޅި ރާއްޖެއަށް ތަރައްގީ ކުރެވިފައިނުވެއެވެ.

މީގެ އިތުރުން ގެއްލުނު ކަނޑު އަނބުރާ ހޯދުމަށް ރައީސް މުއިއްޒު ވައުދުވެވަޑައިގެންނެވިއެވެ.

ރައީސް މުއިއްޒު ވިދާޅުވެފައިވަނީ ރާއްޖޭގެ ކަނޑުގެ ސަރަހައްދުން ގެއްލުނު ބައި އަނބުރާ ހޯދުމަށް ބައިނަލްއަގުވާމީ ހަމަތަކުގެ މަތީން އަލުން އެދި، ވަކާލާތުކުރެވޭނެ ގޮތްތައް ހޯދައި ދިރާސާކުރުމުގެ މަސައްކަތް، ތަޖުރިބާކާރުންގެ ޓީމަކުން ހަލުހި ކަމާއެކު މަސައްކަތް ކުރައްވަމުން ގެންދަވާ ކަމަށެވެ.

މި މަސައްކަތުގައި ސަރުކާރުން ހަރަދުތަކެއް ކުރި ނަމަވެސް ނަތީޖާއެއް ފެންނާކަށް ނެތެވެ.

ރައީސް މުއިއްޒު ވިދާޅުވީ ވިޔަފާރި ފުޅާކުރުމަށް ސަރުކާރުން ބޮޑު އިސްކަމެއް ދޭނެ ކަމަށެވެ. އެގޮތުން ވަކީން ޚާއްސަކޮށް ކުދި އަދި މެދުފަންތީގެ ވިޔަފާރިތައް ކުރިއަރުވަން އިސްކަން ދޭނެ ކަމަށާއި، އެފަދަ ވިޔަފާރިތަކަށް ބޭނުންވާނެ ލޯނު ދޫކުރާނެ ކަމަށެވެ. ނަމަވެސް ކުދި ވިޔާފާރިތައް ފުނޑި ބައެއް ވިޔާފާރިތައް މުޅިން ވަނީ ހުއްޓުމަކަށް އައިސްފައެވެ. ލޯނު ނުދޭތާ ސަރުކާރުން ކުންފުނިތަކަށް ދޭން ޖެހޭ ފައިސާ ވެސް ގަވައިދުން ދީފައެއް ނުވެއެވެ.

ރައީސް މުއިއްިޒު ވިދާޅުވީ ޓޫރިޒަމްގެ ދާއިރާގައި ސަރުކާރުގެ އަމާޒަކީ، އައު 20 ރިޒޯޓް، 2024 ގައި ހުޅުވާނެ ކަމަށާއި، ނުހެދި ހުރި ރިޒޯޓުތައް ނިންމަން ފުރުސަތު ފަހިކޮށްދޭނެ ކަމަށެވެ. މިއިން އެއްކަމެއްވެސް އަހަރު ނިމުނު އިރު ހިނގާފައެއް ނުވެއެވެ.

ރިޔާސީ ބަޔާން ނިންމަވާލައްވަމުން ރައީސް މުއިއްޒު ވިދޅާުވީ ތަސައްވުރުގައި މިހުރި ގިނަ އިގްތިސާދީ މަޝްރޫއުތަކުގެ އަމަލީ މަސައްކަތް 2024 ވަނަ އަހަރު ފަށައިގަނެވޭނެ ކަމަށެވެ. މިއިން ކޮންމެ މަޝްރޫއެއް ފެށުމާއެކު، ރާއްޖޭގެ އިގްތިސާދަށް އޭގެ މަންފާކުރާނެ ކަމަށާއި، ވަޒީފާއާއި އާމްދަނީގެ މަގުތައް ހުޅުވިގެންދާނެ ކަމަށެވެ. ރައްޔިތުންނަށް ތިޔާގިކަމާއި ތަނަވަސްކަން ލިބޭނެކަމުގެ ފުރިހަމަ ޔަގީންކަން އެމަނިކުފާނު ދެއްވިއެވެ.

ނަމަވެސް 2024 ވަނަ އަހަރު ނިމި، 2025 ވަނަ އަހަރު ފެށިގެން ދިޔައީ ރައްޔިތުންނަށް އެމަނިކުފާނު ވެވަޑައިގެންނެވި އެއްވެސް ވައުދެއް ނުފުއްދިއެވެ. މަޝްރޫއުތައް ކުރިއަށް ނުގެންދިއުމުގައި ކުރީ ސަރުކާރު ބަދުނާމުކޮށް، ދައްކަމުންދިޔައީ ހުސްވެސް އުޒުރެވެ. 2024 ވަނަ އަހަރަށް ރައްޔިތުންގެ މަޖިލީހުން ފާސްކުރި 55 ބިލިއަން ބަޖެޓު ހުސްވެ، ބަޖެޓުން ކުރި އެއްވެސް މަސައްކަތެއް ފެންނާކަށް ނެތެވެ.

މީގެ އިތުރުން ސަރުކާރުގެ ހަރަދުތައް ކުޑަކުރުމުގެ ގޮތުން، އިސްތިސްނާ ހާލަތްތައް ފިޔަވައި، ސިޔާސީ އިސް މަގާމުތަކަށް މީހުން އިތުރަށް އައްޔަން ނުކުރާނެ ކަމަށް ރައީސް މުއިއްޒު ވިދާޅުވި ނަމަވެސް ސިޔާސީ މަގާމުތަކަށް މީހުން އައްޔަން ކޮށްފައިވާ އަދަދު އިންތިހާއަށް ވީ އިތުރެވެ. ސިޔާސީ މަގާމުތައް 700ށް ވުރެ އިތުރު ނުކުރާނެ ކަމަށް ވިދާޅުވި ނަމަވެސް މިސަރުކާރުގެ ސިޔާސީ މަގާމުތަކުގައި 1500ށް ވުރެ ގިނަ މީހުން ތިބި ކަމަށް ބެލެވެއެވެ. އޭގެ ތެރެއިން ގިނަ މީހުން ކުރާނެ މަސައްކަތެއްވެސް ނެތެވެ. ސަރުކާރުގެ ހިންގުމުގެ ޚަރަދު އިންތިހާ އަށް ބޮޑުވި ނަމަވެސް އެފަރާތްތަކަށް ހާހުން ދަނީ މުސާރަ ދެމުންނެވެ.

''އަޅުގަނޑުމެން މި ހުރިހާ މަސައްކަތެއްވެސް ކުރިއަށް ގެންދާނީ، ދެފުށް ފެންނަގޮތަށް. ހާމަކަން ބޮޑުކޮށް. ނޫސްވެރިއަކަށްވެސް، ރައްޔިތަކަށްވެސް އަޅުގަނޑުމެން ފޮރުވާނެ ކަމެއް ނޯންނާނެ.''ރައީސް މުއިއްޒު މިހެން ވިދާޅުވި ނަމަވެސް މިއަދާ ހަމައަށް ސިޔާސީ މަގާމުތަކުގެ ޖުމްލަ އަދަދު ވެސް ވަނީ ސިއްރުކޮށްފައެވެ. އަދި ރައީސް މުއިއްޒު ސަރުކާރު ފެނިގެންދަނީ ސިއްރުކަން ބޮޑު އަނދިރި ވެރިކަމެއްގެ ގޮތުގައެވެ. އާރުޓީއައި ހުށަހަޅައިގެން ނޫން ގޮތަކަށް މައުލޫމާތެއް ލިބޭނެ ގޮތެއް ނޯވެއެވެ.

2024 ވަނަ އަހަރުގެ ރިޔާސީ ބަޔާނުގައި ދެއްކެވި ފޮނި ވާހަކަތައް ވެގެން ދިޔައީ ހަމަ ހަގީގަތުގައިވެސް ސަޅިބައިސާ އަށެވެ.