ޤާނޫނު އަސާސީން މިބޭނުންވާ ހައްގު ހޯދަން ނިކުންނަ އެންމެން ހައްޔަރުކުރާ ނަމަ ފުލުހުންވެސް ދާނީ އެކުގައި: ފިއްޓެ

ޤާނޫނު އަސާސީން މިބޭނުންވާ ހައްގު ހޯދަން ނިކުންނަ އެންމެން ހައްޔަރުކުރާ ނަމަ ފުލުހުންވެސް ދާނީ އެކުގައި ކަމަށް ވައިކަރަދޫ ދާއިރާގެ މެމްބަރު ހުސެއިން ޒިޔާދު (ފިއްޓެ) ވިދާޅުވެއްޖެ އެވެ.

އަންގާރަ ދުވަހުގެރޭ އެމްޑީޕީން ބޭއްވި ކުއްލި އެއްވުމުގެ ތެރެއިން ވާހަކަދައްކަވަމުން ފިއްޓެ ވިދާޅުވީ، ރައްޔިތުން މިއަދު މަގުތަކަށް ނިކުތީ ދާނެ އިތުރު ތަނެއް ނެތިގެން ކަމަށާއި، ހައްގު ހޯދަން ނިކުންނަ އެންމެން ހައްޔަރުކުރާ ނަމަ، ފުލުހުންވެސް ދާން ޖެހޭނީ އެކީގައި ކަމަށެވެ.

ތިބޭފުޅުންނަށް އަޅުގަނޑުމެންގެ ތެރެއިން ބައެއް ބޭފުޅުން ހައްޔަރުކުރެވިދާނެ. ގެންދެވިވެސްދާނެ، ހުކުމްވެސް ކުރެވިދާނެ. އެހެންނަމަވެސް ޤާނޫނު އަސާސީން މި ބޭނުންވާ ހައްގު ހޯދަން ނިކުންނަން އެންމެނެއް ހައްޔަރެއް ނުކުރެވޭނެ. އޭރުން ތިބޭފުޅުންވެސް ތިބޭނީ ގޮޅީގައި

ވައިކަރަދޫ ދާއިރާގެ މެމްބަރު ހުސެއިން ޒިޔާދު (ފިއްޓެ)

ޤާނޫނު އަސާސީން ލިބިދޭ ބާރުގެ ތެރެއިން، ހައްގުތައް ލިބެންދެން މިމަސައްކަތް ހުއްޓާނުލާ ކުރިއަށް ގެންދާނެ ކަމަށް ވިދާޅުވަމުން އެމްޑީޕީން މަގުތަކަށް ނިކުތީ ދިވެހި އެތައް ރައްޔިތުންނެއްގެ ހައްގުގައި ކަމަށާއި ބޯހިޔާވަހިކަމާއި ބޭސް ސިޓީއަށް ސަލާންޖެހިފައި އޮތް އޮތުން ރައީސް މުއިއްޒުއަށް އަޑު އިއްވަން ކަމަށް ފިއްޓެ ވިދާޅުވި އެވެ.

ވެރިކަމަށް ވަޑައިގެންނެވުމުގެ ކުރިން އެތައް ތަނެއްގައި ރައީސް މުއިއްޒު ނުކުރާނެ ކަމަށް ވިދާޅުވި ހުރިހާ ކަމެއް މިއަދު ކުރައްވާފައިވާ ކަމަށާއި އެއިރު ވިދާޅުނުވެ އޮތީ ސިޔާސީ މީހުން ހިފާ ހައްޔަރުކުރާނެ ވާހަކަ އަށް ވާއިރު، މިއަދު އެކަންވެސް ދަނީ ފުލުހުން މެދުވެރިކޮށް ކުރަމުން ކަމަށް އޭނާ ވިދާޅުވި އެވެ.

ނަމަވެސް މިއަދު ރައްޔިތުންގެ ބުރަ މަސައްކަތުން ގެނައި ފެހި ޤާނޫނު އަސާސީގެ އުފާވެރިކަމުގެ ތެރެއިން ޚިޔާލު ފާޅުކުރުމުގެ މިނިވަންކަން ރައްޔިތުން ހޯދަމުންދާއިރު، ރައްޔިތުންގެ އަޑު އިއްވާނެ ނުވަތަ އަހާނެ އެއްވެސް މީހަކު މިއަދު މިސަރުކާރުގައި ނެތް ކަމަށާއި އެންމެ ފަހުން ނިކުންނަން ޖެހުނީ މަގުމައްޗަށް ކަމަށް ފިއްޓެ ވިދާޅުވި އެވެ.

އެހެންކަމުން ރައީސް މުއިއްޒު އަށް ރައްޔިތުން ބޭނުންވާ ކަންކަން އަޑު އިއްވަން ނިކުންނަން ރައްޔިތުން ފަހަތައް ނުޖެއްސޭނެ ކަމަށާއި މިމަސައްކައް ހުއްޓާނުލާ ކުރިއަށް ގެންދާނެ ކަމަށް ފިއްޓެ ވިދާޅުވި އެވެ.

އަދި ސްޕްރީމް ކޯޓު ގެ ފަނޑިޔާރުންގެ އަދަދު މަދު ކުރަން ނިންމި ނިމުން އަނބުރާ، ރައީސް މުއިއްޒުގެ މެޖޯރިޓީ އޮންނަ މަޖިލިސްއަށް ފޮނުވާލީ ޕީއެންސީ މެމްބަރުންނަކީ ލިޔަން ކިޔަން ނޭނގޭ މެމްބަރުންނަށް ހަދާފައި ކަމަށާއި ސަރުކާރުގެ ދޯހަޅި ސިޔާސަތުގެ ސަބަބުން ރައްޔިތުން މިއަދު މަގުތަކަށް ނިކުންނަން މަޖުބޫރުވީ ކަމަށްވެސް ފިއްޓެ ވިދާޅުވި އެވެ.