ޔުނައިޓެޑުގެ އެއްބަސްވުން ޓެން ހާގް އައު ކޮށްފި

މެންޗެސްޓަރ ޔުނައިޓެޑަށް އިރުޝާދު ދެމުން އަންނަ ނެދަލެންޑްސްގެ އެރިކް ޓެން ހާގް، އެ ކުލަބުގެ އެއްބަސްވުން އައު ކޮށްފި އެވެ.

އުމުރުން 54 އަހަރުގެ ޓެން ހާގް، ޔުނައިޓެޑުގެ ކޯޗުކަމާ ހަވާލުވީ 2022 ވަނަ އަހަރުގެ އޭޕްރީލް މަހުގެ ތެރޭގަ އެވެ. އެ ކުލަބާއެކު އޭނާ ސޮއި ކޮށްފައި ވަނީ ތިން އަހަރު ދުވަހުގެ އެއްބަސްވުމެއްގަ އެވެ. އެ އެއްބަސްވުމުގެ މުއްދަތު ހަމަވާން އޮތީ 2025 ވަނަ އަހަރުގެ ޖޫން މަހުގެ ނިޔަލަށެވެ.

އެއްބަސްވުމުގައި ބާކީ އެއް އަހަރު އޮއްވާ، ޔުނައިޓެޑުން ޓެން ހާގް ވަކި ކުރަން އުޅޭ ކަމުގެ ވާހަކަތަކެއް ވެސް ވަނީ ދެކެވިފަ އެވެ. އެހެން ނަމަވެސް، ޓެން ހާގްގެ ކުރިމަގާ މެދު ޔުނައިޓެޑާ ދާދި ފަހުން ހަވާލުވި އިނިއޯސް ކުންފުނިން ނިންމާފައި ވަނީ އޭނާ ވަކިނުކޮށް، ކުލަބުގައި ބަހައްޓާށެވެ. އެގޮތަށް ނިންމައި އޭނާގެ އެއްބަސްވުން އައު ކުރާނެ ކަމަށް މީގެ ކުރިން އޮތީ ހާމަ ވެސް ކޮށްފަ އެވެ.

ޔުނައިޓެޑާ އެކު ޓެން ހާގް ސޮއި ކޮށްފައި ވަނީ އިތުރު އެއް އަހަރު ދުވަހުގެ އެއްބަސްވުމެއްގަ އެވެ. އެހެންކަމުން ޔުނައިޓެޑާއެކު ޓެން ހާގް ސޮއި ކުރި އައު އެއްބަސްވުމުގެ މުއްދަތު ހަމަވާނީ 2026 ވަނަ އަހަރުގެ ޖޫން މަހުގެ ނިޔަލަށެވެ. ޔުނައިޓެޑުގެ އެއްބަސްވުން ޓެން ހާގް އައު ކޮށްފައިވާކަން އެ ކުލަބުން ވަނީ ރަސްމީކޮށް އިއުލާން ވެސް ކޮށްފަ އެވެ.

ޔުނައިޓެޑަށް މިހާތަނަށް އިރުޝާދު ދިން ދެ ސީޒަންގައި ވެސް އޭނާ ވަނީ އެ ކުލަބަށް ތަށި ހޯދައިދީފަ އެވެ. އެގޮތުން ކަރަބޯ ކަޕް އަދި އެފްއޭ ކަޕް ވަނީ ޔުނައިޓެޑަށް ކާމިޔާބު ކޮށްދީފަ އެވެ.އެހެން ނަމަވެސް އިނގިރެސި ޕްރިމިއާ ލީގުގައި ޔުނައިޓެޑުގެ ނަތީޖާ ދަށްވުމުގެ ސަބަބުން ޓެން ހާގަށް ފާޑު ކިޔުން ވަނީ އަމާޒުވެފަ އެވެ.