ޔޫރޯ ފުޓުބޯޅަ މުބާރާތުގެ ކުއާޓާ ފައިނަލްގައި ޖަރުމަނު ބަލި ކުރަން ސްޕެއިން އަށް އުނދަގޫ ވާނެ ކަމަށް އެ ޓީމުގެ ކޯޗު ހޫލިއަން ނާގަލްސްމަން ބުނެފި އެވެ.

އޭނާ މިހެން ބުނީ އަމިއްލަ ޤައުމުގައި މިހާރު ކުރިއަށްދާ ޔޫރޯ ފުޓުބޯޅަ މުބާރާތުގެ ކުއާޓާ ފައިނަލްގައި ސްޕެއިންއާ ދެކޮޅަށް ޖަރުމަނު ނިކުންނަ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުންނެވެ.

މިއަހަރުގެ ޔޫރޯގެ ގްރޫޕް ސްޓޭޖުގެ އިތުރުން، ގަދަ 16 ވަނަ ބުރުގެ މެޗުގައި ވެސް ޖަރުމަނުން ރަނގަޅު ކުޅުމެއް ދައްކާފައިވާއިރު، އެ ޓީމަކީ މިއަހަރުގެ މުބާރާތުގެ ފޭވަރިޓުންގެ ތެރޭގައި ހިމެނޭ ޓީމެކެވެ. އަދި އަމިއްލަ ޤައުމުގައި އޮންނަ ޔޫރޯ ކާމިޔާބު ކުރަން ޖަރުމަނުން ވަނީ ވަރަށް ބޮޑަށް ތައްޔާރު ވެސް ވެފަ އެވެ.

ސްޕެއިން މެޗުގެ ކުރިން ވާހަކަ ދައްކަމުން ނާގަލްސްމަން ބުނީ، ނޮކް އައުޓް ބުރުގެ މެޗުތަކަކީ އެންމެ އުނދަގޫ މެޗުތައް ކަމަށެވެ. ޚާއްސަކޮށް މުބާރާތުގެ ގަދަ އަށް ޓީމަށް ބަލާއިރު، އެއްވެސް ޓީމަކީ ދަށް ޓީމެއް ކަމަށް ނުބުނެވޭނެ ކަމަށް ވެސް ނާގަލްސްމަން ބުންޏެވެ.

މުބާރާތުގެ ގަދަ 16 ވަނަ ބުރުގައި ޖަރުމަނުން ޑެންމާކާ ދެކޮޅަށް ކުޅުނު މެޗަށް އިޝާރާތް ކުރަމުން ނާގަލްސްމަން ބުނީ، އެ މެޗުގައި، ޚާއްސަކޮށް މެޗުގެ ފުރަތަމަ 20 މިނެޓުގައި ޖަރުމަނުން ދެއްކީ މޮޅު ކުޅުމެއް ކަމަށެވެ. އެހެން ނަމަވެސް، ކުރިއަށް އޮތް މެޗަށް ނިކުންނައިރު ވިސްނަންވީ އެ ކުޅުން ތަކުރާރުކޮށް، މުޅި މެޗުގައި އެ ކުޅުން ދެއްކުމަށް ކަމަށް ވެސް ނާގަލްސްމަން ވަނީ ބުނެފަ އެވެ.

މީގެ އިތުރުން އޭނާ ބުނީ، ކުރިއަށް ދާން ޖެހޭނީ ކެތްތެރިކަމާއެކު ކަމަށާއި، މެޗައް ތައްޔާރު ވާނީ ވެސް ވިސްނުންތެރިކަމާއި ރޭވުންތެރިކަމާއެކު ކަަމަށެވެ. ކުޅުމަށް ޚާއްސަ އިސްކަމެއް ދީގެން ކުޅެފި ނަމަ، އެ މެޗުގައި ޖަރުމަނު ބަލި ކުރަން ސްޕެއިން އަށް އުނދަގޫ ވާނެ ކަމަށް ވެސް ނާގަލްސްމަން ބުންޏެވެ.

ކުއާޓާ ފައިނަލްގައި ޖަރުމަނުން ސްޕެއިންއާ ދެކޮޅަށް ނިކުންނާނީ ހުކުރު ދުވަހުގެ ރޭ ދަންވަރު ރާއްޖެ ގަޑިން 12 ޖަހާއިރު އެވެ.