ޔުވެންޓަސްގެ މަޝްހޫރު 10 ނަމްބަރ ޖާޒީ ޑިބާލާއަށް

އިޓަލީގެ މަޝްހޫރު ގިނަ ކުޅުންތެރިން ކުޅެފައިވާ 10 ނަމްބަރ ޖާޒީ، ޔުވެންޓަސްއަށް ކުޅެމުންއަންނަ އާޖެންޓީނާގެ ހުނަރުވެރި ޒުވާން ފޯވާޑް ޕައޮލޯ ޑިބާލާއަށް ދީފިއެވެ.

އިޓަލީގެ ކުރީގެ މަޝްހޫރު ތަރި ރޮބާޓޯ ބާޖިއޯ އަދި އަލެސަންދްރޯ ޑެލް ޕިއޭރޯ ބޭނުން ކޮށްފައިވާ ޔުވެންޓަސްގެ 10 ނަމްބަރ ޖާޒީ ޑިބާލާއަށް ދީފައި މިވަނީ ޔުވެންޓަސްގައި ޑިބާލާ ދައްކާ މޮޅު ކުޅުމުގެ ސަބަބުން ކަމަށް ޔުވެންޓަސްއިން ވަނީ ބުނެފައެވެ.

ޔުވެންޓަސްއިން ބުނީ 10 ނަމްބަރ ޖާޒީ އަކީ ޔުވެންޓަސްގެ ވަރަށް ފަޚުރުވެރި ނަމްބަރެއް ކަމަށާއި އެ ނަމްބަރ މިވަގުތު އެންމެ ހައްޤުވާ ފަރާތަކީ ޒުވާން ފޯވަޑް ޑިބާލާ ކަމަށެވެ. ޑިބާލާވެސް ވަނީ 10 ނަމްބަރ ޖާޒީ ލިބުމަކީ ފަޚުރެއް ކަމަށް ބުނެފައެވެ.

ޔުވެންޓަސް އިން ވަނީ ކުރިން ޑިބާލާ ބޭނުން ކުރަމުންއައި 21 ނަމްބަރު ޖާޒީގެ ބަދަލުގައި ޑީބަލާ އަންނަ ސީޒަން ފެށިގެން ބޭނުންކުރާނީ 10 ނަމްބަރު ޖާޒީ ކަމަށް މީގެ ކުރިންވެސް ބުނެފައެވެ.

ޔުވެންޓަސްއިން މިހެން ބުނެފައި ވީނަމަވެސް ދުނިޔޭގެ ބައެއް މަޝްހޫރު މީޑިއާތަކުން ރިޕޯޓްކޮށްފައިޥާ ގޮތުގައި ޑީބަލާއަށް ޔުވެންޓަސް އިން 10 ނަމްބަރު ޖާޒީ ދީފައި މިވަނީ އެހެން ކުލަބުތަކުން އޭނާ ގެންދަން މަސައްކަތް ކުރާދަނޑިވަޅެއްގައި ކުލަބުގައި މަޑުކުރުވުމުގެ ބޭނުމުގައެވެ. ޑިބާލާ ގެންދަން އެންމެ ބޮޑަށް މަސައްކަތް ކުރަމުން އަންނަނީ ސްޕެއިންގެ ބާސެލޯނާއިންނެވެ.

ބާސެލޯނާއިން ޑިބާލާ ހޯދަން މަސައްކަތް ކުރިނަމަވެސް ޔުވެންޓަސްއިން ވަނީ ޑިބާލާ ނުވިއްކާނެކަމަށް ބުނެފައެވެ. އެޓީމުން ބުނެފައިވަނީ ޑިބާލާގެ އިތުރުން މިވަގުތު ޓީމުގައި ތިބި އެއްވެސް ކުޅުންތެރިޔަކު ދޫނުކުރާނެއެވެ.

"ޑިބާލާއަކީ ޔުވެންޓަސްއަށް މުހިންމު ކުޅުންތެރިއެއް. 10 ނަމްބަރ ޖާޒީވެސް ދިނީ އެގޮތުން. އޭނާ އެހެން ކުލަބަކަށް ނުވިއްކާނަން. ޑިބާލާ ހުންނާނީ ޔުވެންޓަސްގައި" ޔުވެންޓަސްއިން ބުންޏެވެ.

ޔުވެންޓަސްއަށް ގިނަ އަހަރުތަކެއް ވަންދެން ކުޅެ، ބޮޑެތި ކާމިޔާބީތަކެއް ހޯދާފައިވާ ޑެލް ޕިއޭރޯ ވަނީ 10 ނަމްބަރ ޖާޒީ ޑިބާލާއަށް ދިނުމާއި އެކު އެކަމާ މަރުޙަބާކިޔާ ޓްވީޓެއްވެސް ކޮށްފައެވެ. މި ޓްވީޓުގައި އޭނާވަނީ ޑިބާލާއަށް 10 ނަމްބަރ ޖާޒީ ލިބުމަކީ އުފާކުރާކަމެއްކަމަށް ބުނެފައެވެ.

ޑެލްޕިއޭރޯ ވަނީ ޔުވެންޓަސްއާ އެއްކޮށް އިޓާލިއަން ލީގު ހަ ފަހަރު އަދި ޗެމްޕިއަންސް ލީގު އެއް ފަހަރު ކާމިޔާބުކޮށްފައެވެ.

ބާޖިއޯ އަދި ޑެލް ޕިއޭރޯގެ އިތުރުން ޔުވެންޓަސްގެ 10 ނަމްބަރު ޖާޒީ ބޭނުންކޮށްފައިވާ ކުޅުންތެރިންނަކީ ފްރާންސުގެ ކުރީގެ ތަރި މިޝޭލް ޕްލެޓިނީ އާއި އާޖެންޓީނާ ފޯވާޑް ކާލޯސް ޓެވޭޒެވެ.

ޔުވެންޓަސްގެ 10 ނަމްބަރ ޖާޒީ އެންމެ ފަހުން ބޭނުންކޮށްފައިވަނީ މިހާރު މެންޗެސްޓާ ޔުނައިޓެޑަށް ކުޅެމުންއަންނަ ފްރާންސް މިޑްފީލްޑަރ ޕައުލް ޕޮގްބާއެވެ.