ސައިބަރ ކުށްތަކުން ރައްކާތެރި ކުރުވުމަށް މައުލޫމާތު ދިނުމުގެ ޕްރޮގްރާމެއް ކުޑަފަރީގައި ކުރިއަށް ގެންގޮސްފި
ތަމްރީނު ކުރިއަށް ދިޔައީ ޖޫން 30ން ޖުލައި 1ށް
އިންޓަނެޓު މެދުވެރިކޮށް ހިންގާ ކުށްތަކުން ރައްކާތެރި ކުރުވުމަށް މައުލޫމާތު ދިނުމުގެ ޕްރޮގްރާމެއް ކުޑަފަރީގައި ހިންގަނީ
އިންޓަނެޓު މެދުވެރިކޮށް ހިންގާ ކުށްތަކުން، ނ. ކުޑަފަރީ ސްކޫލު މުވައްޒަފުންނާއި ދަރިވަރުންނާއި ބެލެނިވެރިން ރައްކާތެރި ކުރުވުމަށް މައުލޫމާތުދިނުމުގެ ޕްރޮގްރާމެއް ކުރިއަށް ގެންގޮސްފިއެވެ.
ދިވެހި ފުލުހުންގެ ޚިދުމަތުގެ ސައިބަރ ސެންޓަރާއި ނ. ކުޑަފަރީ ޕޮލިސް ޕޯސްޓު ގުޅިގެން ޖޫން 30ން ޖުލައި 1ށް ކުރިއަށް ގެންދިޔަ މި ޕްރޮގްރާމްގައި، އިންޓަނެޓު މެދުވެރިކޮށް ހިންގާ ކުށްތަކުން ރައްކާތެރިވާނެ ގޮތުގެ މައުލޫމާތު ދީފައިވެއެވެ.
އެގޮތުން، ސްކޫލު ދަރިވަރުންނަށް ކުރިއަށް ގެންދިޔަ ޕްރޮގްރާމުގައި، ފުރާވަރު ކުދިންނަށް އަމާޒުކޮށް އިންޓަނެޓު މެދުވެރިކޮށް ހިންގާ ކުށްތަކާއި އެފަދަ ކުށްތަކުން ރައްކާތެރިވެ ތިބުމަށް މަސައްކަތްކުރާނެ ގޮތްތައް ބުނެދީފައިވެއެވެ.
އަދި އިންޓަނެޓު ބޭނުންކުރުމުގައި ސަމާލުކަން ދޭންވީ ކަންކަމާއި އެއްވެސް ކަމެއް ދިމާވެއްޖެ ހާލަތުގައި އަމަލުކުރާނެ ގޮތްތައް ބުނެދީފައިވެއެވެ. ބެލެނިވެރިންނާއި ސްކޫލު މުވައްޒަފުންނަށް ކުރިއަށް ގެންދިޔަ ޕްރޮގްރާމުގައި، މަކަރާއި ހީލަތުން އޮޅުވާލައިގެން ފައިސާ ހޯދުމުގައި ބޭނުން ކުރަމުން ގެންދާ އެންމެ ފަހުގެ އުކުޅުތަކާއި އެފަދަ ކަންކަމުން ރައްކާތެރިވާނެ ގޮތްތަކުގެ މައުލޫމާތު ހިއްސާކޮށްފައިވެއެވެ.
