މަކަރާއި ހީލަތުން އަތުލާ ފައިސާ އަނބުރާ ހޯދަން އުނދަގޫވާނެ، ސަމާލުވޭ: ޓެކްނޮލޮޖީ މިނިސްޓްރީ

މި ޒަމާނަކީ އިންޓަނެޓް މެދުވެރިކޮށް ފަސޭހަކަމާއެކު މަކަރާއި ހީލަތުން ފައިސާ އަތުލައިގަނެވޭ ޒަމާނަކަށްވާއިރު އެގޮތަށް އަތުލާ ފައިސާ އަނބުރާ ހޯދަން އުނދަގޫވާނެ ކަމަށާއި އެހެންވެ، އެފަދަ ކަންކަމަށް ސަމާލުވެ ތިބުމަށް މިނިސްޓްރީ އޮފް އެންވަޔަރަމަންޓް، ކްލައިމެޓް ޗޭންްޖް އެންޑް ޓެކްނޮލޮޖީ އިން ބުނެފިއެވެ.

ރާއްޖެ ޓީވީގެ "ފަލަސުރުޚީ" ގައި ސައިބަރ ސޭފް މޯލްޑިވްސް ކެމްޕޭނާ ގުޅޭ ގޮތުން މައުލޫމާތު ދެއްވަމުން އެ މިނިސްޓްރީގެ ސްޓޭޓް މިނިސްޓަރު މުޙައްމަދު ޝަރީފު ވިދާޅުވީ މަކަރާއި ހީލަތުން ފައިސާ ހޯދާ ފަރާތްތަކުން އެކަން ކުރަނީ ވަރަށް ބޮޑަށް ތައްޔާރުވެގެން، ސްކްރިޕްޓުކޮށްގެން ކަމަށެވެ. އެ ފަރާތްތަކުން އިންސާނުންގެ ސިކުނޑިއާ ކުޅެން އުކުޅުތައް ބޭނުން ކުރާ ކަމަށާއި އެހެންވެ، އެފަދަ ކަމެއް ދިމާވެދާނެ ކަމަށް އަބަދުވެސް ހުށިޔާރުވެގެން ތިބެން ޖެހޭ ކަމަށް އޭނާ ވިދާޅުވިއެވެ.

ޝަރީފު ވިދާޅުވީ އެއްވެސް ފަރާތަކުން އިނާމެއް ލިބިގެން ނުވަތަ އެ ނޫންވެސް ކަމެއްގައި ލިންކެއް ފޮނުވައިފިނަމަ އެންމެ ރަނގަޅު ގޮތަކީ އެ ލިންކަށް އެއްގޮތަކަށް ވެސް ނުފިއްތުން ކަމަށެވެ. އެ ލިންކު ލިބުމުން ލިންކު ލިބުނު ފަރާތެއް ބަލައި އެ ފަރާތެއްގެ ރަސްމީ ނަންބަރަށް ގުޅައި، އެފަދަ ލިންކެއް ހިއްސާ ކުރިތޯ ސުވާލުކުރުމަކީ ވެސް މިފަދަ ސްކޭމްތަކުން ސަލާމަތްވެވޭނެ ކަންކަން ކަމަށް އޭނާ ވިދާޅުވިއެވެ.

ޝަރީފު ވިދާޅުވި ގޮތުގައި މިފަދަ މަކަރާއި ހީލަތުގެ މައްސަލަތައް ގިނަވެ، ފޯނަށް ފޮނުވާ އޯޓީޕީ ނުފޮނުވަން ވެސް ބައެއް ޤައުމުތަކުން ދަނީ މަސައްކަތް ކުރަމުންނެވެ. އަދި އޭގެ ބަދަލުގައި އެހެން ސެކިއުރިޓީ ފީޗަރ އެއް ހޯދުމުގެ މަސައްކަތް ކުރާ ކަމަށް އޭނާ ވިދާޅުވިއެވެ.

އީމެއިލް އާއި އެސްއެމްއެސް މެދުވެރިކޮށް ލިބޭ ލިންކުތަކުގެ އިތުރުން ގޮތް ނޭނގޭ ވެބްސައިޓުތަކަށް ނުވަނުމާއި ސޯޝަލް މީޑިއާ އަދި ފޯނުފަދަ ތަކެތީގެ ސެކިއުރިޓީ ކޯޑު ވަރުގަދަ ކުރުމަކީ ވެސް ސައިބަރ ހަމަލާތަކުން ރައްކާތެރިވުމަށް އެޅިދާނެ ފިޔަވަޅުތަކެއް ކަމަށް ޝަރީފު ވިދާޅުވިއެވެ. އެގޮތުން، ޕާސްވޯޑެއްގެ ބަދަލުގައި ޕާސް ފްރޭސްއެއް ނުވަތަ ދިގު ކޯޑެއް ޖެހުން މުހިންމު ކަމަށް އޭނާ ވިދާޅުވިއެވެ.

ރާއްޖޭގައި ސައިބަރ ސޭފްޓީއަށް ހާއްސަކޮށްގެން މިނިސްޓްރީ އޮފް އެންޔަރަމަންޓް، ކްލައިމެޓް ޗޭންޖް އެންޑް ޓެކްނޮލޮޖީ އިން އަންނަނީ ސްކޫލް ކުދިންނާއި މުއައްސަސާތަކާއި ރައްޔިތުންނަށް ހާއްސަ ސެޝަންތަކެއް ކުރިއަށްގެންދަމުންނެވެ. މި ސެޝަންތަކުގައި ސައިބަރ ސޭފް މޯލްޑިވްސް ވެބްސައިޓް މެދުވެރިކޮށް ރަޖިސްޓްރީ ކުރެވޭއިރު އާއްމުންނަށް ހުޅުވާލައިގެން ބާއްވާ ސެޝަންތައް ކުރިއަށްގެންދަނީ ޤައުމީ ޔުނިވަރސިޓީގެ ބިޒްނަސް ސްކޫލް އޮޑިޓޯރިއަމްގައެވެ.