ދެކުނު ލުބުނާނުގައި ހުންނަ ހިޒްބުﷲ ގެ އެންމެ އިސް ކޮމާންޑަރު އިޒްރޭލުން ހަމަލާދީ މަރާލައިފި އެވެ.

ހިޒްބުﷲ އިން ބުދަ ދުވަހު ނެރުނު ބަޔާނެއްގައި އިޒްރޭލުން ހަމަލާދީ އެ ޖަމާއަތުގެ އިސް ކޮމާންޑަރު މުހައްމަދު ނައީމް ނާސިރު ޝަހީދު ކޮށްލައިފި ކަމަށް ބުނެފައިވެއެވެ.

ހިޒްބުﷲ އިން ބުނީ ކޮމާންޑަރަށް ދިން ހަމަލާގެ ބަދަލު ހިފުމުގެ ގޮތުން އިޒްރޭލުގެ އަސްކަރީ މަގާމް ތަކަށް 100 ރޮކެޓް ހަމަލާ ދީފައިވާ ކަމަށެވެ. އިޒްރޭލުން ބުނެފައިވަނީ ރޮކެޓް ހަމާލަތައް އަމާޒު ވީ ހުސް ބިމުގެ ސަރަހައްދަކަށް ކަމަށާއި، ހަމަލާ ތަކުން މީހަކަށް ގެއްލުމެއް ނުވާ ކަމަށެވެ.

މިއީ ފާއިތުވެ ދިޔަ ނުވަ ވަރަކަށް މަސްދުވަހުގެ ތެރޭގައި އިޒްރޭލުގެ ހަމަލާއެއްގައި މަރުވި ހިޒްބުﷲ ގެ އެންމެ އިސް އޮފިޝަލް ކަމަށް ރިޕޯޓްތައް ބުނެއެވެ.

އިޒްރޭލުން މި ހަމަލާ އާ ގުޅޭ ގޮތުން އަދި އެއްޗެއް ބުނެފައެއް ނުވެއެވެ.

ޚަބަރުތައް ބުނާ ގޮތުގައި އިޒްރޭލުން ވައިގެ މަގުން ދިން މި ހަމަލާގައި ނާސިރު ގެ އިތުރުން ހިޒްބުﷲ ގެ އިތުރު ހަނގުރާމަވެރިއަކާ އާއްމުންގެ މީހަކުވެސް ވަނީ މަރުވެފައެވެ.

ހިޒްބުﷲ ގެ އިސް ކޮމާންޑަރަކަށް އަމާޒު ކޮށް އިޒްރޭލުން މި ހަމަލާ ދިން އިރު، ހިޒްބުﷲ އާއި އިޒްރޭލާ ދެމެދު ބަދަލު ކުރެވެމުންދާ ހަމަލާތައް ދުވަހެއް ދުވަހަކަށް ހޫނުވަމުން ދާކަން މަސްރަހް ދިރާސާ ކުރާ ފަރާތްތަކުން އަންނަނީ ފާހަގަ ކުރަމުންނެވެ.

މަސްރަހް ހޫނުވެ ދެ ފަރާތުގެ ދެމެދުގައި ފުރިހަމަ ހަނގުރާމަ އެއް ފެށިދާނެ ކަމުގެ ބިރު އޮތުމާއެކު ލުބުނާންގައި ދިރިއުޅޭ އެހެން ގައުމު ތަކުގެ މީހުންނަށް އެމީހުން ނިސްބަތްވާ ގައުމު ތަކުގެ ސަރުކާރު ތަކުން އަންނަނީ ލުބުނާން ދޫކޮށް ދިއުމަށް އިރުޝާދު ދެމުން ނެވެ.

އިޒްރޭލާއި ހިޒްބުﷲ އާ ދެމެދު ބަދަލު ކުރެވެމުންދާ ހަމަލާ ތަކުގައި ލެބަނަން އިން 400 ށް ވުރެ ގިނަ މީހުން މިހާތަނަށް މަރުވެފައިވެއެވެ. އޭގެ ތެރޭގައި ގިނައީ ހިޒްބުﷲ ގެ ހަނގުރާމަވެރިން ކަމަށް ރިޕޯޓްތައް ބުނެއެވެ. އިޒްރޭލުން 25 މީހުން މަރުވެފައި ވާއިރު އޭގެ ތެރޭގައި ގިނައީ އިޒްރޭލް ސިފައިންނެވެ.

މަސްރަހް ހޫނު ވަމުން ދިއުމާއެކު ދެ ފަރާތުގެ ބޯޑަރު ސަރަހައްދުގައި ދިރިއުޅޭ އެތައް ހާސް މީހުން ވަނީ ސަރަހައްދު ދޫކޮށް ގޮސްފައެވެ.