ދިވެހިންގެ ތެރެއިން ގިނަ ބަޔަކު ބޭސްފަރުވާ ހޯދަންދާ މަނިޕާލް ހޮސްޕިޓަލަށް އާސަންދަ ދިނުން ހުއްޓާލައިފިއެވެ.

އާސަންދަ ދިނުން ހުއްޓާލާފައިވަނީ މި މަހުގެ 1 ވަނަ ދުވަހުން ފެށިގެންނެވެ. މިކަމާއި ގުޅޭގޮތުން އާސަންދައިން ބުނެފައިވަނީ އިންޑިއާގެ މަނިޕާލް ހޮސްޕިޓަލާ އެކު މިވަގުތު އެއްބަސްވެފައިވާ އަގުތައް އެ ކުންފުނިން މުރާޖައާ ކުރަމުންދާތީވެ، އާސަންދަ ސްކީމުގެ ދަށުން އެ ހޮސްޕިޓަލަށް ބަލިމީހުން ފޮނުވުން މިވަގުތަށް ހުއްޓާލާފައި ވާ ކަމަށެވެ.

އާސަންދަ ކުންފުނިން ބުނީ އެގޮތަށް ނިންމާފައިވީނަމަވެސް އޭގެ ސަބަބުން މިވަގުތު އާސަންދައިގެ ދަށުން އެ ހޮސްޕިޓަލުން ފަރުވާ ހޯދަމުންދާ އެއްވެސް ބަލިމީހެއްގެ ފަރުވާއަށް މެދުކެނޑުމެއް ނާންނާނެ ކަމަށެވެ.

އާސަަންދަ ކުންފުނިން ބުނީ އެ ހޮސްޕިޓަލާއެކު އަގުތައް މުރާޖާ ކުރުމަށް މަސައްކަތް ކުރަމުން އަންނަ ކަމަށާއި، މަޝްވަރާތައް ވަރަށް އަވަހަށް ފަށާނެ ކަމަށެވެ. ނަމަވެސް އަލުން އެ ހޮސްޕިޓަލުން އާސަންދަ ދޭން ފަށާނެ ދުވަހެއް ނޭނގޭ ކަމަށް އާސަންދައިން ބުނެއެވެ.

މި ސަރުކާރު ވެރިކަމަށް އައިސް އިންޑިއާއެކު އޮންނަ ގުޅުންތައް ހީނަރުކޮށް، އެ ގައުމަށް ބޭސްފަރުވާއަށް ދިވެހިން ދިއުން ނިމުމަކަށް ގެނެސް ތައިލޭންޑާއި ދުބާއީ އިން އާސަންދައިގެ ދަށުން ސިއްހީ ހިދުމަތް ލިބޭނެ ގޮތް ހޯދާނެކަމަށް ބުނެފައިވެއެވެ. ނަމަވެސް މިހާތަަނަށް އައި އިރުވެސް އެ މަސައްކަތް ނުފެށެއެވެ.

އާސަންދަ ކުންފުނިން ބުނެފައިވަނީ ތައިލެންޑާއި ޔޫއޭއީ އިން ސިއްހީ ޚިދުމަތް ހޯދޭ ގޮތަށް އާސަންދަ ހިދުމަތް ފުޅާކުރުމުގެ މަސައްކަތް އަދިވެސް ނުނިމޭ ކަމަށެވެ. އެގޮތުން ތައިލެންޑް އަދި ޔޫއޭއީގައި ހިދުމަތް ފައްޓަން ކުރަންޖެހޭ ކަންކަން ކުރިއަށް ގެންދާ ކަމަށް ބުނެފައިވެއެވެ.