ކުޓީނިއޯއަކީ ވިއްކޭނޭ ކުޅުންތެރިއެއް ނޫން: ލިވަޕޫލް
11 އޯގަސްޓު 2017 | ހުކުރު 12:15ކުޓީނިއޯއަކީ އެއްވެސް ހާލަތެއްގައި ވިއްކޭނެ ކުޅުންތެރިއެއް ނޫން
ލިވަޕޫލްގެ ކޯޗު ކްލޮޕް ކުޓީނިއޯއާ އެއްކޮށް
ލިވަޕޫލްއަށް ކުޅެމުން އަންނަ ބްރެޒިލްގެ މިޑްފީލްޑަރ ފިލިޕޭ ކުޓީނިއޯއަކީ އެއްވެސް ހާލަތެއްގައި ވިއްކޭނެ ކުޅުންތެރިއެއް ނޫން ކަމަށް އެ ކްލަބުން ހާމަކޮށްފިއެވެ.
ލިވަޕޫލްގެ ރަސްމީ ވެބްސައިޓުގައި އާންމުކޮށްފައިވާ ބަޔާނެއްގައި އެކުލަބުން ބުނެފައިވަނީ މިހާރު ކުރިއަށްދާ ޓްރާންސްފާ މާކެޓުގައި ކުޓީނިއޯ އެހެން ކުލަބަކަށް ނުވިއްކާނެ ކަމަށާއި އޭނާ ގަންނަން ހުށަހަޅާ އެއްވެސް ބިޑެއް އެކުލަބުން ބަލައިނުގަންނާނެ ކަމަށެވެ.
ކުޓީނިއޯ ހޯދުމަށް ސްޕެއިންގެ ބާސެލޯނާއިން ވަނީ ދެފަހަރު ބިޑުކޮށްފައެވެ. އެހެންނަމަވެސް މިދެފަހަރުވެސް ލިވަޕޫލްއިން އެބިޑުތަށް ބަލައިގެންފައިނުވެއެވެ. ލިވަޕޫލްގެ މި ބަޔާނާއިއެއްކޮށް ބާސާއިން އޭނާ ހޯދުމަށް ކުރަމުން އަންނަ މަސައްކަތަށް ހުއްޓުމެއް އަންނާނެކަމަށް ބެލެވެއެވެ.
މީގެކުރިން ލިވަޕޫލްގެ ކޯޗު ޔާގެން ކްލޮޕްވެސް ވަނީ އެއްވެސް އަގަކަށް ކުޓީނިއޯ ނުވިއްކާނެކަމަށް މީޑިއާގައި ހާމަކޮށްފައެވެ.
އިޓަލީގެ އިންޓަ މިލާނުން 2012 ވަނަ އަހަރު ލިވަޕޫލަށް ބަދަލުވި ކުޓީނިއޯ ވަނީ އެ ކްލަބަށް މިހާތަށް ކުޅުނު 182 މެޗުގައި 42 ލަނޑު ކާމިޔާބުކޮށްފައެވެ.
ކުޓީނިއޯ ވަނީ ބްރެޒިލް ގައުމީ ޓީމާއެކު 20 އަހަރުން ދަށުގެ ވޯލްޑްކަޕް ކާމިޔާބުކޮށްފައެވެ. މީގެއިތުރުން އޭނާ ވަނީ ފާއިތުވެ ދިޔަ ދެ ސީޒަނުގައި ލިވަޕޫލްގެ އެންމެ މޮޅު ކުޅުންތެރިޔާގެ މަގާމުވެސް ހޯދާފައެވެ.
