ސަރުކާރުގެ ފަރާތުން އެންޓި-ކޮރަޕްޝަން ކޮމިޝަންގެ ޤާނޫނަށް އިސްލާހު ގެނައުމުގެ ބިލު މަޖިލީހަށް ހުށަހެޅުއްވީ ފެލިދޫ ދާއިރާގެ މެންބަރު އާދަމް ޒާހިރު
މަޖިލީހުގެ ގަލޮޅު ދެކުނު ދާއިރާގެ މެމްބަރު މީކާއިލް ނަސީމް
އެންޓި-ކޮރަޕްޝަން ކޮމިޝަން (އޭސީސީ) އާއި އިލެކްޝަންސް ކޮމިޝަން، (އީސީ) ގެ ރައީސާއި ނައިބު ރައީސް، ރައީސުލްޖުމްހޫރިއްޔާ އައްޔަން ކުރައްވާގޮތަށް ބަދަލުކުމަކީ ތިން ބާރު ވަކިވެފައިވާ ނިޒާމް ހަލާކުކޮށްލުން ކަމަށާއި މިއީ ރައީސް ޑރ.މުހައްމަދު މުއިއްޒު ދެއްވާ އިންޒާރެއް ކަމަށް ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެމްބަރު މީކާއިލް އަހުމަދު ނަސީމް ވިދާޅުވެއްޖެއެވެ.
އޭނާ އެފަދައިން ވިދާޅުވީ އަންގާރަ ދުވަހު އެންޓ-ިކޮރަޕްޝަން ކޮމިޝަނުގެ ޤާނޫނަށް ސަރުކާރުން ގެންނަ އިސްލާހުގެ ބިލުގެ އިބްތިދާއީ ބަހުސް މަރުހަލާގައި ވާހަކަދައްކަވަމުންނެވެ. ސަރުކާރުގެ ފަރާތުން އެންޓި-ކޮރަޕްޝަން ކޮމިޝަންގެ ޤާނޫނަށް އިސްލާހު ގެނައުމުގެ ބިލު މަޖިލީހަށް ހުށަހެޅުއްވީ ފެލިދޫ ދާއިރާގެ މެންބަރު އާދަމް ޒާހިރުއެވެ.
މަޖިލީހުގައި ވާހަކަދައްކަވަމުން، އިސްލާހު އެ ބަސްވެސް އެ ބިލަށް ބޭނުންކުރުން ރަނގަޅު ނޫން ކަމަށް މީކާއިލް ވަނީ ވިދާޅުވެފައެވެ. އިސްލާހަކީ ކުރިއަށް އެޅޭ ފިޔަވަޅެއް ކަމަށާއި އެއީ ރަނގަޅަކަށް ގެނެވޭ ބަދަލަކަށް ކިޔާ ނަމެއް ކަަމަށް މީކާއިލް ވަނީ ވިދާޅުވެފައެވެ. އެހެންނަމަވެސް މި އިސްލާހާއި އެކު ފެނިގެން ދަނީ އެތައް ބަޔަކު އެތައް ޒަމާނެއްވަންދެން ކުރި ބުރަ މަސައްކަތުން ހޯދާފައިވާ ތިން ބާރު ވަކިވެފައިވާ ނިޒާމެއް ހަލާކުކޮށްލާ މަންޒަރުކަމަށް މީކާއިލް ވަނީ ވިދާޅުވެފައެވެ.
މީކާއިލް ވަނީ މިހާރު އޭސީސީގެ ރައީސްއަކަށް ހުންނަ މީހަކު ހައްލާލަން މަސައްކަތް ކުރާ މަންޒަރު ފެންނަކަމަށް ސިފަކުރައްވާފައެވެ. އަދި އެ މަޤާމުގައި ހުންނަ މީހަކަށް ރިޝްވަތު ހުށަހަޅާ، އެ މީހަކަށް ރެހެންދި ފްލެޓް ދިން ޒަމާނަށް ރުޖޫއަވާން މަސައްކަތް ކުރަނީތޯ އޭނާ ސުވާލު އުފެއްދެވިއެވެ. އޭސީސީގެ ޒިންމާ އަދާ ނުކުރާ ކަމަށް ޤަބޫލުކުރައްވާ ކަަމަށް ފާހަގަކުރައްވާ މީކާއިލް ވަނީ އެމްޑީޕީގެ ސަރުކާރުގައި ވެސް އެކަން ފާހަގަކުރެވުނު ކަމަށް އޭނާ ވިދާޅުވިއެވެ. އެމްޑީޕީގެ ސަރުކާރުގައި އޭސީސީގެ ބަޔާނަކުން މަޝްރޫޢޫތައް ނުފެށެނީސް ހުއްޓުވި ކަމަށް އޭނާ ވިދާޅުވިއެވެ. ނަމަވެސް އޭސީސީގެ މެމްބަރުންނަށް ހުރަހަކަށް ވާން އެމްޑީޕީން މަސައްކަތްކޮށްފައި ނުވާނެ ކަމަށް އޭނާ ވިދާޅުވިއެވެ.
ސަބަބަކީ އެމްޑީޕީ އަށް ދިމާވާ ދަތިކަމަކަށް ވުރެ މިނިވަން މުއައްސަސާ އެއް އޭގެ ގޮތުގައި މަސައްކަތްކުރުން މުހިންމުކަމަށް އެ ޕާޓީން ޤަބޫލުކުރާތީ ކަމަށް ވެސް އޭނާ ވިދާޅުވިއެވެ. އޭސީސީ އަށް ދިމާވާ ދަތިކަންތައްތައް ހައްލުކުރެވޭނީ ރައީސް އައްޔަންކުރާ ބަޔަކު އެތާ ތިބެެގެން ކަމަށް ޤަބޫލުކުރަން ޖެހޭ ސަބަބެއް ނެތް ކަމަށް އޭނާ ވިދާޅުވިއެވެ.
އެންޓި-ކޮރަޕްޝަން ކޮމިޝަން (އޭސީސީ) އާއި އިލެކްޝަންސް ކޮމިޝަން، (އީސީ) ގެ ރައީސާއި ނައިބު ރައީސް، ރައީސުލްޖުމްހޫރިއްޔާ އައްޔަން ކުރައްވާގޮތަށް ބަދަލުކުރަން ޤާނޫނުތަކަށް ބަދަލު ގެންނަން ސަރުކާރުން ވަނީ ހުށަހަޅާފައެވެ.
