"ރައީސް މުއިއްޒުގެ އަރިހުގައި ގިނައީ ވަގުން، އެއީ ބައި އަޅައިގެން ވައްކަންކުރި މީހުން"
ރައީސް މުއިއްޒު ގާތްތިމާގެ ބޭފުޅުންނަށް ބޮޑެތި މަޤާމުތައް ދެއްވާފައިވާކަމަށް މީކާއިލް ވިދާޅުވި
ގިލަންވެރިކަމުގެ އެއް އަހަރު ކަވަރޭޖްގެ ތެރެއިން
ރައީސް ޑރ.މުހައްމަދު މުއިއްޒުގެ އަރިހުގައި ގިނައީ ވަގުން ކަމަށާއި އެއީ ބައި އަޅައިގެން ވައްކަންކުރި މީހުން ކަމަށް ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ގާނޫނީ ޓީމްގައި ހިމެނިވަޑައިގަންނަވާ އާދަމް އާސިފް ވިދާޅުވެއްޖެއެވެ.
އާސިފް އެފަދައިން ވިދާޅުވީ ރާއްޖެ ޓީވީގެ ގިލަންވެރިކަމުގެ 1 އަހަރު ކަވަރޭޖްގައި ވާހަކަދައްކަވަމުންނެވެ. އާސިފް ވިދާޅުވި ރައީސް މުއިއްޒުގެ އަރިހުގައި މިހާރު ތިއްބެވި ބޭފުޅުންގެ ތެރޭގައި އެކި ދުވަސްވަރު އެ މަނިކުފާނާއި އެކުގައި މަސައްކަތް ކުރެއްވި ބޭފުޅުން ހިމެނޭ ކަމަށެވެ. އެއީ އެއްވެސް ވަރަކަށް އިއްތިފާގެއް ކަމަށް ޤަބޫލު ނުކުރެވޭ ކަމަށް އާސިފް ވިދާޅުވިއެވެ. އެއީ ރޭވުންތެރިކަމާއި އެކު ކުރާ ކަމެއް ކަމަށް އޭނާ ވިދާޅުވިއެވެ. ސިޓީ ކައުންސިލްގެ މަޤާމުތަކުގައި އަރިހުގައި ކޮންސަލްޓެންޓުންގެ ގޮތުގައި ކުރިން ތިއްބެވި ބޭފުޅުން މިހާރު ތިއްބެވީ ރައީސް އޮފީހުގެ އަރިސް މަޤާމުތަކުގައި ކަމަށް ފާހަގަކުރައްވާ އާސިފް ވަނީ އެކަމަށް ފާޑު ވިދާޅުވެފައެވެ. އަދި އޭރު ރައީސް މުއިއްޒު އާއި މިފަދަ ބޭބޭފުޅުންނާއި އެކުގައި ކޮރަޕްޝަންގެ ގިނަ ޢަމަލުތަކެއް ހިންގާފައިވާ ކަމަށާއި އެކަމުގެ ހެކި އެބަހުރިކަމަށް ވެސް އާސިފް ވަނީ ވިދާޅުވެފައެވެ.
އެ ޕްރޮގްރާމްގައި ވާހަކަދައްކަވަމުން ރައްޔިތުންގެ މަޖިލީހުގެ މެދު ހެންވޭރު ދާއިރާގެ މެމްބަރު އަލީ އާޒިމް ވެސް ވަނީ އާސިފްގެ އެ ވާހަކަތަކަށް ތާއީދުކުރައްވާ ވާހަކަދައްކަވާފައެވެ. އާޒިމް ވަނީ އަރިހުގައި ތިއްބެވި ބޭފުޅުންގެ ތެރެއިން ބޭބޭފުޅުން ދުރަށް ދިޔަ ނުދިނުމަށް ރައީސް މަސައްކަތްކުރައްވާ ކަމަށް ވިދާޅުވެފައެވެ. އެހެންނަމަވެސް އަބަދު ކަންކަން ސިއްރުކޮށްގެން ރައީސް މުއިއްޒު އަށް ވެސް ނުހުންނެވޭނެ ކަމަށް އާޒިމް ވަނީ ވިދާޅުވެފައެވެ.
އެ ޕްރޮގްރާމްގައި ވާހަކަދައްކަވަމުން މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއިލް ނަސީމް ވަނީ މި ސަރުކާރުން ވެރިކަމަށް އައިސް މަޤާމުތަކަށް ލީ ނާޤާބިލް މީހުންކަމަށް ސިފަކުރައްވާފައެވެ. އަދި ގާތްތިމާގެ ބޭފުޅުންނަށް ބޮޑެތި މަޤާމުތައް ދެއްވާފައިވާކަމަށް މީކާއިލް ވިދާޅުވިއެވެ. މީކާއިލް ވަނީ ސަރުކާރުގެ މަތިބަރުވުމުން އެކަމަށް ވަރަށް ބޮޑަށް ފާޑު ވިދާޅުވެފައެވެ. އަދި ސަރުކާރުގެ އިޚުލާސްތެރިކަމާއި މެދުގައި ސުވާލު އުފެއްދެވިއެވެ.
އެ ތިން ބޭފުޅުންވެސް ވަނީ ސަރުކާރުގެ ސިޔާސީ މަޤާމުތައް އިތުރުވުމުން އެކަމަށް ވަރަށް ބޮޑަށް ފާޑު ވިދާޅުވެފައެވެ. އަދި ސަރުކާރު ހިންގުމުގައި ހަރުދަނާކަމެއް ނެތް ކަމަށް އެ ބޭފުޅުން ފާހަގަކުރައްވައެވެ.
