އުރުގުއޭ އަތުން ބަލިވެ، އެމެރިކާ ކަޓައިފި

ދެކުނު އެމެރިކާ ސަރަހައްދުގެ ފުޓުބޯޅަ މުބާރާތް (ކޮޕާ އެމެރިކާ)ގެ ގްރޫޕް ސްޓޭޖުގެ ފަހު މެޗުގައި އުރުގުއޭ އަތުން ބަލިވެ، އެމެރިކާ މުބާރާތުން ކަޓައިފި އެވެ.

އެމެރިކާއާ ދެކޮޅަށް ކުޅުނު މެޗު އުރުގުއޭ އިން ކާމިޔާބު ކުރީ 1-0 އިންނެވެ. އެ މެޗާ ކުރިމަތިލީއިރު، އެމެރިކާ ކުރިން ކުޅުނު އެއް މެޗުން މޮޅުވެ، އަނެއް މެޗުން ވަނީ ބަލިވެފަ އެވެ. އެހެންވެ، މުބާރާތުގެ ކުއާޓާ ފައިނަލް އަށް ދިޔުމުގެ ފުރުސަތު އެމެރިކާ އަށް އޮތީ އެ މެޗުން މޮޅުވެގެންނެވެ.

ދެ ޓީމުގެ ފަރާތުން ވެސް ވާދަވެރި ކުޅުމެއް ފެނުނު މެޗުގައި އުރުގުއޭ އިން ލަނޑު ޖެހީ ފަހު ހާފުގަ އެވެ. މެޗުގެ ދެ ވަނަ ހާފުގައި އެ ޓީމަށް ލީޑު ނަގައިދިން ލަނޑު ޖެހީ ޑިފެންޑަރު މަތިއަސް އޮލިވެރާ އެވެ. އޭގެ ފަހުން އެމެރިކާ އަށް ވެސް ވަނީ މެޗުގައި ލަނޑު ޖަހާނެ ފުރުސަތު ލިބި، ބޭކާރުވެފަ އެވެ.

މެޗުން ބަލިވެ، އެމެރިކާ ދިޔައީ ގްރޫޕް ސީގެ ތިން ވަނަ އަށެވެ. އެއީ ކުޅުނު ތިން މެޗުން ލިބުނު ތިން ޕޮއިންޓާ އެކު އެވެ. އެމެރިކާ އަތުން މޮޅުވެ، އުރުގުއޭ އިން ވަނީ މި ގްރޫޕްގެ އެއް ވަނަ ހޯދައިފަ އެވެ. އެއީ ގްރޫޕް ސްޓޭޖުގައި ކުޅުނު ތިން މެޗުން ވެސް މޮޅުވެ، ނުވަ ޕޮއިންޓު ހޯދައިގެންނެވެ.