ގަވަރުނަރު ހާޝިމް ވަކިކުރަން ރައީސްއަށް ލަފާދިނުމަށް މާލިއްޔަތު ކޮމިޓީން ފާސްކޮށްފި
މަނިޓަރީ ޕޮލިސީ ހިނގަމުން ނުދާ ކަމަށް ނާޒިމް ވިދާޅުވި
އެމްއެމްއޭގެ ގަވަރުނަރު އަލީ ހާޝިމް ވަކިކުރަން ރައީސްއަށް ލަފާއެރުވުމަށް މާލިއްޔަތު ކޮމިޓީން ވަނީ ނިންމާފައި
މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވަރުނަރު އަލީ ހާޝިމް، މަގާމުން ވަކިކުރަން ރައީސުލްޖުމްހުރިއްޔާ އަށް ލަފާ ދިނުމަށް ރައްޔިތުންގެ މަޖިލީހުގެ މާލިއްޔަތު ކޮމިޓީން ފާސްކޮށްފިއެވެ.
އެމްއެމްއޭގެ ގަވަރުނަރު އަލީ ހާޝިމް މަގާމުން ވަކިކުރުމަށް ހުށަހެޅުއްވީ މަޖިލީހުގެ ނައިބުރައީސް އަދި ދިއްގަރު ދާއިރާގެ މެންބަރު އަހުމަދު ނާޒިމެވެ. ނާޒިމް ވިދާޅުވީ ހާޝިމްއަށް އޭނާގެ ޒިންމާތައް އަދާކުރައްވަމުން ގެންދަވާތަން ނުފެންނާތީ މަގާމުން ވަކިކުރުމަށް ހުށަހަޅާ ކަމަށެވެ.
ނާޒިމް ވިދާޅުވީ އެމްއެމްއޭއަކީ 1981 ވަނަ އަހަރު އެކުލަވާލެވުނު މޯލްޑިވްސް މަނިޓަރީ ގަނޫނުގެ ދަށުން އެކުލަވާލާ ހިންގަމުންދާ މަރުކަޒީ ބޭންކު ކަމަށާއި، އެ ގާނޫނުގައި ސާފު އިބާރާތުން ބަޔާންކޮށްފައިވަނީ އެމްއެމްއޭގެ މައިގަނޑު މަގުސަދުތަކަކީ ފައިސާ ނެރުމާއި ފައިސާ ލިބެން ހުންނަ ގޮތްތައް އަދި ދިވެހި ރުފިޔާގެ ބައިނަލްއަގުވާމީ އަގު ކަނޑައެޅުމާއި ބޭންކިންގ އަދި މަނިޓަރީ މުއާމަލާތްތަކާއި ގުޅޭ ކަންތައްތަކުގައި ސަރުކާރަށް ލަފާދިނުމާއި، ރާއްޖޭގެ މާލީ ކަންތައްތައް ހަރުދަނާކުރުމަށް ބޭންކުގެ މުއާމަލާތްތައް އެކަށައަޅާ ހިނގާ ނުހިނގާ ބެލުން ހިމެނޭ ކަމަށެވެ.
ނާޒިމް ވިދާޅުވީ ގައުމުގެ އިގްތިސާދު ހީނަރުވެ އަލުން އިއާދަކުރުން އުނދަގޫ ހިސާބަކަށް ގޮސް ގައުމުގެ އިގްތިސާބު ނިކަމެތި ހިސާބަކަށް ދިޔައިރު އެމްއެމްއޭގެ ގާނޫނުގައި ބަޔާންކުރާ މަގުސަދުތައް ހާސިލްކުރެވިފައި ނެތް ކަމަށެވެ. އަދި އެމްއެމްއޭގެ މައިގަނޑު އެއް އަސާސުކަމުގައިވާ މަނިޓަރީ ޕޮލިސީ ހިނގަމުން ނުދާ ކަމަށް ވެސް ނާޒިމް މައްސަލަ ހުށަހަޅުއްވަމުން ވިދާޅުވިއެވެ.
ނާޒިމް ވިދާޅުވީ މި ސަބަބުތަކަށް ފުރިހަމައަށް ރިއާޔަތްކޮށް ދިވެހި ގައުމުގެ އިގްތިސާދު ހީނަރުވެ ބޮޑު އިގްތިސާދީ ކާރިސާއަކުން ސަލާމަތްކުރުމަށްޓަކައި އެމްއެމްއޭއަކީ މުހިންމު މަސައްކަތްތަކެއް ކުރަންޖެހޭ މުއައްސަސާއަށްވެފައި، އެމްއެމްއޭގެ އިސްވެރިޔާގެ ހައިސިއްޔަތުން އެ މަސައްކަތްތައް އެންމެ ފުރިހަމަގޮތުގައި އަދާކޮށްފައި ނުވާ ކަމަށެވެ.
އަދި މި ދަނޑިވަޅަކީ މަރުކަޒީ ބޭންކުގެ ފަރާތުން މަނިޓަރީ ޕޮލިސީގެ މިސްރާބު ބަދަލުކުރަންޖެހޭނަމަ އެކަން ކުރުމުގެ ވަގުތުކަމުން މަރުކަޒީ ބޭންކަށް ތާޒާ އައު ލީޑަރޝިޕެއް ބޭނުންވާ ކަމަށް ނާޒިމް ވިދާޅުވިއެވެ.
ނާޒިމް ހުށަހަޅުއްވާފައިވާ މައްސަލައަށް ތާއިދުކުރެއްވި، އެމްއެމްއޭގެ ގަވަރުނަރު އަލީ ހާޝިމް ވަކިކުރުމުގެ މައްސަލައަށް ތާއިދުކުރެއްވީ ފުވައްމުލަކު އުތުރު ދާއިރާގެ މެންބަރު ހަމަދު އަބްދުﷲ އެވެ.
މި މައްސަލައާއި ގުޅިގެން ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ ވިދާޅުވި މެންބަރު ނާޒިމް ހުށަހެޅުއްވި ގޮތަށް ގަވަރުނަރު ވަކިކުރަން ރައީސުލްޖުމްހޫރިއްޔާއަށް ލަފާދެއްވައިގެން ވަކިކުރަން ނުޖެހޭ ކަމަށާއި، ގަވަރުނަރު ވަކިކުރުމުގެ ކަންކަން ކޮމިޓީއަށް ވެސް ކުރެވޭނެ ކަމަށެވެ. އެހެންކަމުން އެކަން ނިމިގެން އައިސްފައިވަނީ ޕާޓީގެ ޕޮލިސީ ލެވެލްއިން ނިމިގެން އައި ކަމެއްގެ ގޮތުގައި ސިފަވާކަމަށް މެނަބްރު ޣަފޫރު ވިދާޅުވިއެވެ.
މި މައްސަލައާއި ގުޅިގެން ހުޅުމާލެ ދެކުނު ދާއިރާގެ މެންބަރު ޑރ. އަހުމަދު ޝަމްހީދު ވިދާޅުވީ ކޮންމެ މަގާމެއްގައި ހުންނެވި ބޭފުޅެއް ނަމަވެސް، އެބޭފުޅަކަށް ކުރެވޭ ތުހުމަތުތަކުން ބަރީއަވުމުގެ ފުރުސަތު ނުލިބި ގޮތެއް ނިންމުމަކީ ރަނގަޅު ގޮތެއް ނޫން ކަމަށެވެ. އަދި އެމްއެމްއޭގެ ގަވަރުނަރަަށް ކޮމިޓީއަށް ހާޒިރުކުރުމަށް ދައުވަތު ދެވިފައިވާ ކަމަށާއި، އެހެންކަމުން ޖަވާބުދާރީވުމުގެ ފުރުސަތު ދޭންޖެހޭ ކަމަށެވެ.
ކޮމިޓީން ވަނީ ގަވަރުނަރު އަލީ ހާޝިމަށް ޖަވާބުދާރީވުމުގެ ފުރުސަތު ދިނުމަށްވެސް ނިންމާފައެވެ. އަދި އޭނާ ވަކިކުރުމަށް ރައީސްއަށް ދެންނެވުމަށް މަޖިލީހުގެ ރައީސްއަށް ހުށަހެޅުމަށް ކޮމިޓީގެ މެންބަރުންގެ އަގުލަބިޔަތުން ވަނީ ފާސްކޮށްފައެވެ.
