އެމްޑީޕީގެ ގައުމީ މަޖިލީހުގެ ބައި-އިލެކްޝަނަށް ހުޅުވާލައިފި

މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ގައުމީ މަޖިލީހުގެ ހުސްވެފައިވާ މަގާމުތަކަށް ކުރިމަތިލުމުގެ ފުރުސަތު ހުޅުވާލައިފިއެވެ.

އެމްޑީޕީން ބުނީ އެޕާޓީގެ ގައުމީ މަޖިލިސްގެ ހުސްވެފައިވާ މަގާމުތަކަށް ކުރިމަތިލުމުގެ ފުރުސަތު ހުޅުވާލާފައިވާއިރު އިންތިހާބު އޮންނާނީ 02 އޮގަސްޓް 2024 ވާ ހުކުރު ދުވަހު ކަމަށެވެ.

Advertisement

މަގާމުތަކަށް ކުރިމަތިލާ ބޭނުންވާ މެންބަރުން އިންތިހާބަށް ކުރިމަތިލުމަށް އެދޭ ފޯމް ފުރިހަމަކުރުމަށްފަހު 07 ޖުލައި 2024 ވާ އާދިއްތަ ދުވަހު މެންދުރު 2:00 ގެ ކުރިން ހުށަހެޅުމަށް ވަނީ އެދިފައެވެ.

ކުރިމަތިލުމަށް ހުޅުވާލާފައިވަނީ 29 ދާއިރާއެއްގެ ރައީސުންގެ މަގާމަށެވެ. މީގެ ތެރޭގައި ކުޅުދުއްފުށި ސިޓީގެ ރައީސާއި، ތިނަދޫ ސިޓީގެ ރައީސް އަދި މާލެ ސިޓީގެ ރައީސްގެ މަގާމުވެސް ހިމެނެއެވެ.

ފޯމާއެކު އެމްޑީޕީން ވަނީ އިގްރާރެއްވެސް ހިމަނާފައެވެ. އެގޮތުން އިގުރާރުގައި ބުނެފައިވަނީ ކުރިމަތިލާ މީހަކީ ޕާޓީގެ އަސާސީ ގަވާއިދަށާއި އިންތިހާބާބެހޭ ގަވާއިދުގައި ބުނެފައިވާ ޝަރުތުތައް ފުރިހަމަވާ މީހެކެވެ. އަދި ފޯމުގައިދީފައިވާ މައުލޫމާތަކީ ސައްހަ މައުލޫމާތުކަމަށާއި، ފޯމާއިއެކު ހުށަހަޅާފައިވާ ހުރިހާ ތަކެއްޗަކީ ސައްހަތަކެތިކަމަށް އިގުރާރުވާ ކަމަށެވެ.

އަދި އިންތިހާބަށް ކުރިމަތިލާ ހިނދު، އިންތިހާބުގައި ކާމިޔާބުވަންދެން އަދި ކާމިޔާބުވެއްޖެނަމަ އެމް.ޑީ.ޕީ މެމްބަރެއްގެ ގޮތުގައި ދެމިހުރުމަށް އިގުރާރުވާންޖޭހެކަމަށް ބުނެފައިވެއެވެ. އަދި މިއިގުރާރާއި ހިލާފުވެއްޖެނަމަ އެމް.ޑީ.ޕީގެ ފަރާތުން އެމީހަކާއި މެދު ފިޔަވަޅު އެޅުމާއިމެދު އިއުތިރާޒެއް ނެތްކަމަށް ވަނީ ބުނެފައެވެ.